౭. ఉప్పాదసుత్తం

౧౨౦. సావత్థియం విహరతి…పే… ‘‘యో, భిక్ఖవే, పథవీధాతుయా ఉప్పాదో ఠితి అభినిబ్బత్తి పాతుభావో, దుక్ఖస్సేసో ఉప్పాదో రోగానం ఠితి జరామరణస్స పాతుభావో. యో ఆపోధాతుయా…పే… యో తేజోధాతుయా… యో వాయోధాతుయా ఉప్పాదో ఠితి అభినిబ్బత్తి పాతుభావో, దుక్ఖస్సేసో ఉప్పాదో రోగానం ఠితి జరామరణస్స పాతుభావో’’.

‘‘యో చ ఖో, భిక్ఖవే, పథవీధాతుయా నిరోధో వూపసమో అత్థఙ్గమో, దుక్ఖస్సేసో నిరోధో రోగానం వూపసమో జరామరణస్స అత్థఙ్గమో. యో ఆపోధాతుయా…పే… యో తేజోధాతుయా… యో వాయోధాతుయా నిరోధో వూపసమో అత్థఙ్గమో, దుక్ఖస్సేసో నిరోధో రోగానం వూపసమో జరామరణస్స అత్థఙ్గమో’’తి. సత్తమం.