౫. చఙ్కమసుత్తం

౯౯. ఏకం సమయం భగవా రాజగహే విహరతి గిజ్ఝకూటే పబ్బతే. తేన ఖో పన సమయేన ఆయస్మా సారిపుత్తో సమ్బహులేహి భిక్ఖూహి సద్ధిం భగవతో అవిదూరే చఙ్కమతి; ఆయస్మాపి ఖో మహామోగ్గల్లానో సమ్బహులేహి భిక్ఖూహి సద్ధిం భగవతో అవిదూరే చఙ్కమతి; ఆయస్మాపి ఖో మహాకస్సపో సమ్బహులేహి భిక్ఖూహి సద్ధిం భగవతో అవిదూరే చఙ్కమతి; ఆయస్మాపి ఖో అనురుద్ధో సమ్బహులేహి భిక్ఖూహి సద్ధిం భగవతో అవిదూరే చఙ్కమతి; ఆయస్మాపి ఖో పుణ్ణో మన్తానిపుత్తో సమ్బహులేహి భిక్ఖూహి సద్ధిం భగవతో అవిదూరే చఙ్కమతి; ఆయస్మాపి ఖో ఉపాలి సమ్బహులేహి భిక్ఖూహి సద్ధిం భగవతో అవిదూరే చఙ్కమతి; ఆయస్మాపి ఖో ఆనన్దో సమ్బహులేహి భిక్ఖూహి సద్ధిం భగవతో అవిదూరే చఙ్కమతి; దేవదత్తోపి ఖో సమ్బహులేహి భిక్ఖూహి సద్ధిం భగవతో అవిదూరే చఙ్కమతి.

అథ ఖో భగవా భిక్ఖూ ఆమన్తేసి – ‘‘పస్సథ నో తుమ్హే, భిక్ఖవే, సారిపుత్తం సమ్బహులేహి భిక్ఖూహి సద్ధిం చఙ్కమన్త’’న్తి? ‘‘ఏవం, భన్తే’’. ‘‘సబ్బే ఖో ఏతే, భిక్ఖవే, భిక్ఖూ మహాపఞ్ఞా. పస్సథ నో తుమ్హే, భిక్ఖవే, మోగ్గల్లానం సమ్బహులేహి భిక్ఖూహి సద్ధిం చఙ్కమన్త’’న్తి? ‘‘ఏవం, భన్తే’’. ‘‘సబ్బే ఖో ఏతే, భిక్ఖవే, భిక్ఖూ మహిద్ధికా. పస్సథ నో తుమ్హే, భిక్ఖవే, కస్సపం సమ్బహులేహి భిక్ఖూహి సద్ధిం చఙ్కమన్త’’న్తి? ‘‘ఏవం, భన్తే’’. ‘‘సబ్బే ఖో ఏతే, భిక్ఖవే, భిక్ఖూ ధుతవాదా. పస్సథ నో తుమ్హే, భిక్ఖవే, అనురుద్ధం సమ్బహులేహి భిక్ఖూహి సద్ధిం చఙ్కమన్త’’న్తి? ‘‘ఏవం, భన్తే’’. ‘‘సబ్బే ఖో ఏతే, భిక్ఖవే, భిక్ఖూ దిబ్బచక్ఖుకా. పస్సథ నో తుమ్హే, భిక్ఖవే, పుణ్ణం మన్తానిపుత్తం సమ్బహులేహి భిక్ఖూహి సద్ధిం చఙ్కమన్త’’న్తి? ‘‘ఏవం, భన్తే’’. ‘‘సబ్బే ఖో ఏతే, భిక్ఖవే, భిక్ఖూ ధమ్మకథికా. పస్సథ నో తుమ్హే, భిక్ఖవే, ఉపాలిం సమ్బహులేహి భిక్ఖూహి సద్ధిం చఙ్కమన్త’’న్తి? ‘‘ఏవం, భన్తే’’. ‘‘సబ్బే ఖో ఏతే, భిక్ఖవే, భిక్ఖూ వినయధరా. పస్సథ నో తుమ్హే, భిక్ఖవే, ఆనన్దం సమ్బహులేహి భిక్ఖూహి సద్ధిం చఙ్కమన్త’’న్తి? ‘‘ఏవం, భన్తే’’. ‘‘సబ్బే ఖో ఏతే, భిక్ఖవే, భిక్ఖూ బహుస్సుతా. పస్సథ నో తుమ్హే, భిక్ఖవే, దేవదత్తం సమ్బహులేహి భిక్ఖూహి సద్ధిం చఙ్కమన్త’’న్తి? ‘‘ఏవం, భన్తే’’. ‘‘సబ్బే ఖో ఏతే, భిక్ఖవే, భిక్ఖూ పాపిచ్ఛా’’.

‘‘ధాతుసోవ, భిక్ఖవే, సత్తా సంసన్దన్తి సమేన్తి. హీనాధిముత్తికా హీనాధిముత్తికేహి సద్ధిం సంసన్దన్తి సమేన్తి; కల్యాణాధిముత్తికా కల్యాణాధిముత్తికేహి సద్ధిం సంసన్దన్తి సమేన్తి. అతీతమ్పి ఖో, భిక్ఖవే, అద్ధానం ధాతుసోవ సత్తా సంసన్దింసు సమింసు. హీనాధిముత్తికా హీనాధిముత్తికేహి సద్ధిం సంసన్దింసు సమింసు; కల్యాణాధిముత్తికా కల్యాణాధిముత్తికేహి సద్ధిం సంసన్దింసు సమింసు.

‘‘అనాగతమ్పి ఖో, భిక్ఖవే, అద్ధానం ధాతుసోవ సత్తా సంసన్దిస్సన్తి సమేస్సన్తి. హీనాధిముత్తికా హీనాధిముత్తికేహి సద్ధిం సంసన్దిస్సన్తి సమేస్సన్తి; కల్యాణాధిముత్తికా కల్యాణాధిముత్తికేహి సద్ధిం సంసన్దిస్సన్తి సమేస్సన్తి.

‘‘ఏతరహిపి ఖో, భిక్ఖవే, పచ్చుప్పన్నం అద్ధానం ధాతుసోవ సత్తా సంసన్దన్తి సమేన్తి. హీనాధిముత్తికా హీనాధిముత్తికేహి సద్ధిం సంసన్దన్తి సమేన్తి; కల్యాణాధిముత్తికా కల్యాణాధిముత్తికేహి సద్ధిం సంసన్దన్తి సమేన్తీ’’తి. పఞ్చమం.