౧౦. మోగ్గల్లానసుత్తం

౨౧౮. ఏకం సమయం భగవా రాజగహే విహరతి ఇసిగిలిపస్సే కాళసిలాయం మహతా భిక్ఖుసఙ్ఘేన సద్ధిం పఞ్చమత్తేహి భిక్ఖుసతేహి సబ్బేహేవ అరహన్తేహి. తేసం సుదం ఆయస్మా మహామోగ్గల్లానో చేతసా చిత్తం సమన్నేసతి [సమన్వేసతి (స్యా. అట్ఠ.)] విప్పముత్తం నిరుపధిం. అథ ఖో ఆయస్మతో వఙ్గీసస్స ఏతదహోసి – ‘‘అయం ఖో భగవా రాజగహే విహరతి ఇసిగిలిపస్సే కాళసిలాయం మహతా భిక్ఖుసఙ్ఘేన సద్ధిం పఞ్చమత్తేహి భిక్ఖుసతేహి సబ్బేహేవ అరహన్తేహి. తేసం సుదం ఆయస్మా మహామోగ్గల్లానో చేతసా చిత్తం సమన్నేసతి విప్పముత్తం నిరుపధిం. యంనూనాహం ఆయస్మన్తం మహామోగ్గల్లానం భగవతో సమ్ముఖా సారుప్పాహి గాథాహి అభిత్థవేయ్య’’న్తి.

అథ ఖో ఆయస్మా వఙ్గీసో ఉట్ఠాయాసనా ఏకంసం ఉత్తరాసఙ్గం కరిత్వా యేన భగవా తేనఞ్జలిం పణామేత్వా భగవన్తం ఏతదవోచ – ‘‘పటిభాతి మం, భగవా, పటిభాతి మం, సుగతా’’తి. ‘‘పటిభాతు తం, వఙ్గీసా’’తి భగవా అవోచ. అథ ఖో ఆయస్మా వఙ్గీసో ఆయస్మన్తం మహామోగ్గల్లానం భగవతో సమ్ముఖా సారుప్పాహి గాథాహి అభిత్థవి –

‘‘నగస్స పస్సే ఆసీనం, మునిం దుక్ఖస్స పారగుం;

సావకా పయిరుపాసన్తి, తేవిజ్జా మచ్చుహాయినో.

‘‘తే చేతసా అనుపరియేతి [అనుపరియేసతి (సీ. స్యా. కం.)], మోగ్గల్లానో మహిద్ధికో;

చిత్తం నేసం సమన్నేసం [సమన్వేసం (స్యా. అట్ఠ.)], విప్పముత్తం నిరూపధిం.

‘‘ఏవం సబ్బఙ్గసమ్పన్నం, మునిం దుక్ఖస్స పారగుం;

అనేకాకారసమ్పన్నం, పయిరుపాసన్తి గోతమ’’న్తి.