౭. మహాచత్తారీసకసుత్తం

౧౩౬. ఏవం మే సుతం – ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. తత్ర ఖో భగవా భిక్ఖూ ఆమన్తేసి – ‘‘భిక్ఖవో’’తి. ‘‘భదన్తే’’తి తే భిక్ఖూ భగవతో పచ్చస్సోసుం. భగవా ఏతదవోచ – ‘‘అరియం వో, భిక్ఖవే, సమ్మాసమాధిం దేసేస్సామి సఉపనిసం సపరిక్ఖారం. తం సుణాథ, సాధుకం మనసి కరోథ; భాసిస్సామీ’’తి. ‘‘ఏవం, భన్తే’’తి ఖో తే భిక్ఖూ భగవతో పచ్చస్సోసుం. భగవా ఏతదవోచ –

‘‘కతమో చ, భిక్ఖవే, అరియో సమ్మాసమాధి సఉపనిసో సపరిక్ఖారో? సేయ్యథిదం – సమ్మాదిట్ఠి, సమ్మాసఙ్కప్పో, సమ్మావాచా, సమ్మాకమ్మన్తో, సమ్మాఆజీవో, సమ్మావాయామో, సమ్మాసతి; యా ఖో, భిక్ఖవే, ఇమేహి సత్తహఙ్గేహి చిత్తస్స ఏకగ్గతా పరిక్ఖతా – అయం వుచ్చతి, భిక్ఖవే, అరియో సమ్మాసమాధి సఉపనిసో ఇతిపి, సపరిక్ఖారో ఇతిపి. తత్ర, భిక్ఖవే, సమ్మాదిట్ఠి పుబ్బఙ్గమా హోతి. కథఞ్చ, భిక్ఖవే, సమ్మాదిట్ఠి పుబ్బఙ్గమా హోతి? మిచ్ఛాదిట్ఠిం ‘మిచ్ఛాదిట్ఠీ’తి పజానాతి, సమ్మాదిట్ఠిం ‘సమ్మాదిట్ఠీ’తి పజానాతి – సాస్స హోతి సమ్మాదిట్ఠి.

‘‘కతమా చ, భిక్ఖవే, మిచ్ఛాదిట్ఠి? ‘నత్థి దిన్నం, నత్థి యిట్ఠం, నత్థి హుతం, నత్థి సుకతదుక్కటానం కమ్మానం ఫలం విపాకో, నత్థి అయం లోకో, నత్థి పరో లోకో, నత్థి మాతా, నత్థి పితా, నత్థి సత్తా ఓపపాతికా, నత్థి లోకే సమణబ్రాహ్మణా సమ్మగ్గతా సమ్మాపటిపన్నా యే ఇమఞ్చ లోకం పరఞ్చ లోకం సయం అభిఞ్ఞా సచ్ఛికత్వా పవేదేన్తీ’తి – అయం, భిక్ఖవే, మిచ్ఛాదిట్ఠి.

‘‘కతమా చ, భిక్ఖవే, సమ్మాదిట్ఠి? సమ్మాదిట్ఠింపహం [సమ్మాదిట్ఠిమహం (క.) ఏవం సమ్మాసఙ్కప్పంపహంక్యాదీసుపి], భిక్ఖవే, ద్వాయం [ద్వయం (సీ. స్యా. కం. పీ.) టీకా ఓలోకేతబ్బా] వదామి – అత్థి, భిక్ఖవే, సమ్మాదిట్ఠి సాసవా పుఞ్ఞభాగియా ఉపధివేపక్కా; అత్థి, భిక్ఖవే, సమ్మాదిట్ఠి అరియా అనాసవా లోకుత్తరా మగ్గఙ్గా. కతమా చ, భిక్ఖవే, సమ్మాదిట్ఠి సాసవా పుఞ్ఞభాగియా ఉపధివేపక్కా? ‘అత్థి దిన్నం, అత్థి యిట్ఠం, అత్థి హుతం, అత్థి సుకతదుక్కటానం కమ్మానం ఫలం విపాకో, అత్థి అయం లోకో, అత్థి పరో లోకో, అత్థి మాతా, అత్థి పితా, అత్థి సత్తా ఓపపాతికా, అత్థి లోకే సమణబ్రాహ్మణా సమ్మగ్గతా సమ్మాపటిపన్నా యే ఇమఞ్చ లోకం పరఞ్చ లోకం సయం అభిఞ్ఞా సచ్ఛికత్వా పవేదేన్తీ’తి – అయం, భిక్ఖవే, సమ్మాదిట్ఠి సాసవా పుఞ్ఞభాగియా ఉపధివేపక్కా.

‘‘కతమా చ, భిక్ఖవే, సమ్మాదిట్ఠి అరియా అనాసవా లోకుత్తరా మగ్గఙ్గా? యా ఖో, భిక్ఖవే, అరియచిత్తస్స అనాసవచిత్తస్స అరియమగ్గసమఙ్గినో అరియమగ్గం భావయతో పఞ్ఞా పఞ్ఞిన్ద్రియం పఞ్ఞాబలం ధమ్మవిచయసమ్బోజ్ఝఙ్గో సమ్మాదిట్ఠి మగ్గఙ్గం [మగ్గఙ్గా (సీ. పీ.)] – అయం వుచ్చతి, భిక్ఖవే, సమ్మాదిట్ఠి అరియా అనాసవా లోకుత్తరా మగ్గఙ్గా. సో మిచ్ఛాదిట్ఠియా పహానాయ వాయమతి, సమ్మాదిట్ఠియా, ఉపసమ్పదాయ, స్వాస్స [స్వాయం (క.)] హోతి సమ్మావాయామో. సో సతో మిచ్ఛాదిట్ఠిం పజహతి, సతో సమ్మాదిట్ఠిం ఉపసమ్పజ్జ విహరతి, సాస్స [సాయం (క.)] హోతి సమ్మాసతి. ఇతియిమే [ఇతిమే (సీ.), ఇతిస్సిమే (స్యా. కం. పీ.)] తయో ధమ్మా సమ్మాదిట్ఠిం అనుపరిధావన్తి అనుపరివత్తన్తి, సేయ్యథిదం – సమ్మాదిట్ఠి, సమ్మావాయామో, సమ్మాసతి.

౧౩౭. ‘‘తత్ర, భిక్ఖవే, సమ్మాదిట్ఠి పుబ్బఙ్గమా హోతి. కథఞ్చ, భిక్ఖవే, సమ్మాదిట్ఠి పుబ్బఙ్గమా హోతి? మిచ్ఛాసఙ్కప్పం ‘మిచ్ఛాసఙ్కప్పో’తి పజానాతి, సమ్మాసఙ్కప్పం ‘సమ్మాసఙ్కప్పో’తి పజానాతి, సాస్స హోతి సమ్మాదిట్ఠి.

‘‘కతమో చ, భిక్ఖవే, మిచ్ఛాసఙ్కప్పో? కామసఙ్కప్పో, బ్యాపాదసఙ్కప్పో, విహింసాసఙ్కప్పో – అయం, భిక్ఖవే, మిచ్ఛాసఙ్కప్పో.

‘‘కతమో చ, భిక్ఖవే, సమ్మాసఙ్కప్పో? సమ్మాసఙ్కప్పంపహం, భిక్ఖవే, ద్వాయం వదామి – అత్థి, భిక్ఖవే, సమ్మాసఙ్కప్పో సాసవో పుఞ్ఞభాగియో ఉపధివేపక్కో; అత్థి, భిక్ఖవే, సమ్మాసఙ్కప్పో అరియో అనాసవో లోకుత్తరో మగ్గఙ్గో. కతమో చ, భిక్ఖవే, సమ్మాసఙ్కప్పో సాసవో పుఞ్ఞభాగియో ఉపధివేపక్కో? నేక్ఖమ్మసఙ్కప్పో, అబ్యాపాదసఙ్కప్పో, అవిహింసాసఙ్కప్పో – ‘అయం, భిక్ఖవే, సమ్మాసఙ్కప్పో సాసవో పుఞ్ఞభాగియో ఉపధివేపక్కో’’’.

‘‘కతమో చ, భిక్ఖవే, సమ్మాసఙ్కప్పో అరియో అనాసవో లోకుత్తరో మగ్గఙ్గో? యో ఖో, భిక్ఖవే, అరియచిత్తస్స అనాసవచిత్తస్స అరియమగ్గసమఙ్గినో అరియమగ్గం భావయతో తక్కో వితక్కో సఙ్కప్పో అప్పనా బ్యప్పనా చేతసో అభినిరోపనా వచీసఙ్ఖారో – అయం, భిక్ఖవే, సమ్మాసఙ్కప్పో అరియో అనాసవో లోకుత్తరో మగ్గఙ్గో. సో మిచ్ఛాసఙ్కప్పస్స పహానాయ వాయమతి, సమ్మాసఙ్కప్పస్స ఉపసమ్పదాయ, స్వాస్స హోతి సమ్మావాయామో. సో సతో మిచ్ఛాసఙ్కప్పం పజహతి, సతో సమ్మాసఙ్కప్పం ఉపసమ్పజ్జ విహరతి; సాస్స హోతి సమ్మాసతి. ఇతియిమే తయో ధమ్మా సమ్మాసఙ్కప్పం అనుపరిధావన్తి అనుపరివత్తన్తి, సేయ్యథిదం – సమ్మాదిట్ఠి, సమ్మావాయామో, సమ్మాసతి.

౧౩౮. ‘‘తత్ర, భిక్ఖవే, సమ్మాదిట్ఠి పుబ్బఙ్గమా హోతి. కథఞ్చ, భిక్ఖవే, సమ్మాదిట్ఠి పుబ్బఙ్గమా హోతి? మిచ్ఛావాచం ‘మిచ్ఛావాచా’తి పజానాతి, సమ్మావాచం ‘సమ్మావాచా’తి పజానాతి; సాస్స హోతి సమ్మాదిట్ఠి. కతమా చ, భిక్ఖవే, మిచ్ఛావాచా? ముసావాదో, పిసుణా వాచా, ఫరుసా వాచా, సమ్ఫప్పలాపో – అయం, భిక్ఖవే, మిచ్ఛావాచా. కతమా చ, భిక్ఖవే, సమ్మావాచా? సమ్మావాచంపహం, భిక్ఖవే, ద్వాయం వదామి – అత్థి, భిక్ఖవే, సమ్మావాచా సాసవా పుఞ్ఞభాగియా ఉపధివేపక్కా; అత్థి, భిక్ఖవే, సమ్మావాచా అరియా అనాసవా లోకుత్తరా మగ్గఙ్గా. కతమా చ, భిక్ఖవే, సమ్మావాచా సాసవా పుఞ్ఞభాగియా ఉపధివేపక్కా? ముసావాదా వేరమణీ, పిసుణాయ వాచాయ వేరమణీ, ఫరుసాయ వాచాయ వేరమణీ, సమ్ఫప్పలాపా వేరమణీ – అయం, భిక్ఖవే, సమ్మావాచా సాసవా పుఞ్ఞభాగియా ఉపధివేపక్కా. కతమా చ, భిక్ఖవే, సమ్మావాచా అరియా అనాసవా లోకుత్తరా మగ్గఙ్గా? యా ఖో, భిక్ఖవే, అరియచిత్తస్స అనాసవచిత్తస్స అరియమగ్గసమఙ్గినో అరియమగ్గం భావయతో చతూహి వచీదుచ్చరితేహి ఆరతి విరతి పటివిరతి వేరమణీ – అయం, భిక్ఖవే, సమ్మావాచా అరియా అనాసవా లోకుత్తరా మగ్గఙ్గా. సో మిచ్ఛావాచాయ పహానాయ వాయమతి, సమ్మావాచాయ ఉపసమ్పదాయ; స్వాస్స హోతి సమ్మావాయామో. సో సతో మిచ్ఛావాచం పజహతి, సతో సమ్మావాచం ఉపసమ్పజ్జ విహరతి; సాస్స హోతి సమ్మాసతి. ఇతియిమే తయో ధమ్మా సమ్మావాచం అనుపరిధావన్తి అనుపరివత్తన్తి, సేయ్యథిదం – సమ్మాదిట్ఠి, సమ్మావాయామో, సమ్మాసతి.

౧౩౯. ‘‘తత్ర, భిక్ఖవే, సమ్మాదిట్ఠి పుబ్బఙ్గమా హోతి. కథఞ్చ, భిక్ఖవే, సమ్మాదిట్ఠి పుబ్బఙ్గమా హోతి? మిచ్ఛాకమ్మన్తం ‘మిచ్ఛాకమ్మన్తో’తి పజానాతి, సమ్మాకమ్మన్తం ‘సమ్మాకమ్మన్తో’తి పజానాతి; సాస్స హోతి సమ్మాదిట్ఠి. కతమో చ, భిక్ఖవే, మిచ్ఛాకమ్మన్తో? పాణాతిపాతో, అదిన్నాదానం, కామేసుమిచ్ఛాచారో – అయం, భిక్ఖవే, మిచ్ఛాకమ్మన్తో. కతమో చ, భిక్ఖవే, సమ్మాకమ్మన్తో? సమ్మాకమ్మన్తంపహం, భిక్ఖవే, ద్వాయం వదామి – అత్థి, భిక్ఖవే, సమ్మాకమ్మన్తో సాసవో పుఞ్ఞభాగియో ఉపధివేపక్కో; అత్థి, భిక్ఖవే, సమ్మాకమ్మన్తో అరియో అనాసవో లోకుత్తరో మగ్గఙ్గో. కతమో చ, భిక్ఖవే, సమ్మాకమ్మన్తో సాసవో పుఞ్ఞభాగియో ఉపధివేపక్కో? పాణాతిపాతా వేరమణీ, అదిన్నాదానా వేరమణీ, కామేసుమిచ్ఛాచారా వేరమణీ – అయం, భిక్ఖవే, సమ్మాకమ్మన్తో సాసవో పుఞ్ఞభాగియో ఉపధివేపక్కో. కతమో చ, భిక్ఖవే, సమ్మాకమ్మన్తో అరియో అనాసవో లోకుత్తరో మగ్గఙ్గో? యా ఖో, భిక్ఖవే, అరియచిత్తస్స అనాసవచిత్తస్స అరియమగ్గసమఙ్గినో అరియమగ్గం భావయతో తీహి కాయదుచ్చరితేహి ఆరతి విరతి పటివిరతి వేరమణీ – అయం, భిక్ఖవే, సమ్మాకమ్మన్తో అరియో అనాసవో లోకుత్తరో మగ్గఙ్గో. సో మిచ్ఛాకమ్మన్తస్స పహానాయ వాయమతి, సమ్మాకమ్మన్తస్స ఉపసమ్పదాయ; స్వాస్స హోతి సమ్మావాయామో. సో సతో మిచ్ఛాకమ్మన్తం పజహతి, సతో సమ్మాకమ్మన్తం ఉపసమ్పజ్జ విహరతి; సాస్స హోతి సమ్మాసతి. ఇతియిమే తయో ధమ్మా సమ్మాకమ్మన్తం అనుపరిధావన్తి అనుపరివత్తన్తి, సేయ్యథిదం – సమ్మాదిట్ఠి, సమ్మావాయామో, సమ్మాసతి.

౧౪౦. ‘‘తత్ర, భిక్ఖవే, సమ్మాదిట్ఠి పుబ్బఙ్గమా హోతి. కథఞ్చ, భిక్ఖవే, సమ్మాదిట్ఠి పుబ్బఙ్గమా హోతి? మిచ్ఛాఆజీవం ‘మిచ్ఛాఆజీవో’తి పజానాతి, సమ్మాఆజీవం ‘సమ్మాఆజీవో’తి పజానాతి; సాస్స హోతి సమ్మాదిట్ఠి. కతమో చ, భిక్ఖవే, మిచ్ఛాఆజీవో? కుహనా, లపనా, నేమిత్తికతా, నిప్పేసికతా, లాభేన లాభం నిజిగీసనతా [నిజిగిం సనతా (సీ. స్యా. కం. పీ.)] – అయం, భిక్ఖవే, మిచ్ఛాఆజీవో. కతమో చ, భిక్ఖవే, సమ్మాఆజీవో? సమ్మాఆజీవంపహం, భిక్ఖవే, ద్వాయం వదామి – అత్థి, భిక్ఖవే, సమ్మాఆజీవో సాసవో పుఞ్ఞభాగియో ఉపధివేపక్కో; అత్థి, భిక్ఖవే, సమ్మాఆజీవో అరియో అనాసవో లోకుత్తరో మగ్గఙ్గో. కతమో చ, భిక్ఖవే, సమ్మాఆజీవో సాసవో పుఞ్ఞభాగియో ఉపధివేపక్కో? ఇధ, భిక్ఖవే, అరియసావకో మిచ్ఛాఆజీవం పహాయ సమ్మాఆజీవేన జీవికం కప్పేతి – అయం, భిక్ఖవే, సమ్మాఆజీవో సాసవో పుఞ్ఞభాగియో ఉపధివేపక్కో. కతమో చ, భిక్ఖవే, సమ్మాఆజీవో అరియో అనాసవో లోకుత్తరో మగ్గఙ్గో? యా ఖో, భిక్ఖవే, అరియచిత్తస్స అనాసవచిత్తస్స అరియమగ్గసమఙ్గినో అరియమగ్గం భావయతో మిచ్ఛాఆజీవా ఆరతి విరతి పటివిరతి వేరమణీ – అయం, భిక్ఖవే, సమ్మాఆజీవో అరియో అనాసవో లోకుత్తరో మగ్గఙ్గో. సో మిచ్ఛాఆజీవస్స పహానాయ వాయమతి, సమ్మాఆజీవస్స ఉపసమ్పదాయ; స్వాస్స హోతి సమ్మావాయామో. సో సతో మిచ్ఛాఆజీవం పజహతి, సతో సమ్మాఆజీవం ఉపసమ్పజ్జ విహరతి; సాస్స హోతి సమ్మాసతి. ఇతియిమే తయో ధమ్మా సమ్మాఆజీవం అనుపరిధావన్తి అనుపరివత్తన్తి, సేయ్యథిదం – సమ్మాదిట్ఠి, సమ్మావాయామో, సమ్మాసతి.

౧౪౧. ‘‘తత్ర, భిక్ఖవే, సమ్మాదిట్ఠి పుబ్బఙ్గమా హోతి. కథఞ్చ, భిక్ఖవే, సమ్మాదిట్ఠి పుబ్బఙ్గమా హోతి? సమ్మాదిట్ఠిస్స, భిక్ఖవే, సమ్మాసఙ్కప్పో పహోతి, సమ్మాసఙ్కప్పస్స సమ్మావాచా పహోతి, సమ్మావాచస్స సమ్మాకమ్మన్తో పహోతి, సమ్మాకమ్మన్తస్స సమ్మాఆజీవో పహోతి, సమ్మాఆజీవస్స సమ్మావాయామో పహోతి, సమ్మావాయామస్స సమ్మాసతి పహోతి, సమ్మాసతిస్స సమ్మాసమాధి పహోతి, సమ్మాసమాధిస్స సమ్మాఞాణం పహోతి, సమ్మాఞాణస్స సమ్మావిముత్తి పహోతి. ఇతి ఖో, భిక్ఖవే, అట్ఠఙ్గసమన్నాగతో సేక్ఖో [అట్ఠఙ్గసమన్నాగతా సేఖా పటిపదా (సీ.), అట్ఠఙ్గసమన్నాగతో సేఖో పాటిపదో (పీ. క.) ( ) నత్థి సీ. స్యా. కం. పీ. పోత్థకేసు], దసఙ్గసమన్నాగతో అరహా హోతి. (తత్రపి సమ్మాఞాణేన అనేకే పాపకా అకుసలా ధమ్మా విగతా భావనాపారిపూరిం గచ్ఛన్తి).

౧౪౨. ‘‘తత్ర, భిక్ఖవే, సమ్మాదిట్ఠి పుబ్బఙ్గమా హోతి. కథఞ్చ, భిక్ఖవే, సమ్మాదిట్ఠి పుబ్బఙ్గమా హోతి? సమ్మాదిట్ఠిస్స, భిక్ఖవే, మిచ్ఛాదిట్ఠి నిజ్జిణ్ణా హోతి. యే చ మిచ్ఛాదిట్ఠిపచ్చయా అనేకే పాపకా అకుసలా ధమ్మా సమ్భవన్తి తే చస్స నిజ్జిణ్ణా హోన్తి. సమ్మాదిట్ఠిపచ్చయా అనేకే కుసలా ధమ్మా భావనాపారిపూరిం గచ్ఛన్తి. సమ్మాసఙ్కప్పస్స, భిక్ఖవే, మిచ్ఛాసఙ్కప్పో నిజ్జిణ్ణో హోతి…పే… సమ్మావాచస్స, భిక్ఖవే, మిచ్ఛావాచా నిజ్జిణ్ణా హోతి… సమ్మాకమ్మన్తస్స, భిక్ఖవే, మిచ్ఛాకమ్మన్తో నిజ్జిణ్ణో హోతి… సమ్మాఆజీవస్స, భిక్ఖవే, మిచ్ఛాఆజీవో నిజ్జిణ్ణో హోతి… సమ్మావాయామస్స, భిక్ఖవే, మిచ్ఛావాయామో నిజ్జిణ్ణో హోతి… సమ్మాసతిస్స, భిక్ఖవే, మిచ్ఛాసతి నిజ్జిణ్ణా హోతి… సమ్మాసమాధిస్స, భిక్ఖవే, మిచ్ఛాసమాధి నిజ్జిణ్ణో హోతి… సమ్మాఞాణస్స, భిక్ఖవే, మిచ్ఛాఞాణం నిజ్జిణ్ణం హోతి… సమ్మావిముత్తస్స, భిక్ఖవే, మిచ్ఛావిముత్తి నిజ్జిణ్ణా హోతి. యే చ మిచ్ఛావిముత్తిపచ్చయా అనేకే పాపకా అకుసలా ధమ్మా సమ్భవన్తి తే చస్స నిజ్జిణ్ణా హోన్తి. సమ్మావిముత్తిపచ్చయా చ అనేకే కుసలా ధమ్మా భావనాపారిపూరిం గచ్ఛన్తి.

‘‘ఇతి ఖో, భిక్ఖవే, వీసతి కుసలపక్ఖా, వీసతి అకుసలపక్ఖా – మహాచత్తారీసకో ధమ్మపరియాయో పవత్తితో అప్పటివత్తియో సమణేన వా బ్రాహ్మణేన వా దేవేన వా మారేన వా బ్రహ్మునా వా కేనచి వా లోకస్మిం.

౧౪౩. ‘‘యో హి కోచి, భిక్ఖవే, సమణో వా బ్రాహ్మణో వా ఇమం మహాచత్తారీసకం ధమ్మపరియాయం గరహితబ్బం పటిక్కోసితబ్బం మఞ్ఞేయ్య తస్స దిట్ఠేవ ధమ్మే దససహధమ్మికా వాదానువాదా గారయ్హం ఠానం ఆగచ్ఛన్తి – సమ్మాదిట్ఠిం చే భవం గరహతి, యే చ మిచ్ఛాదిట్ఠీ సమణబ్రాహ్మణా తే భోతో పుజ్జా, తే భోతో పాసంసా; సమ్మాసఙ్కప్పం చే భవం గరహతి, యే చ మిచ్ఛాసఙ్కప్పా సమణబ్రాహ్మణా తే భోతో పుజ్జా, తే భోతో పాసంసా; సమ్మావాచం చే భవం గరహతి…పే… సమ్మాకమ్మన్తం చే భవం గరహతి… సమ్మాఆజీవం చే భవం గరహతి… సమ్మావాయామం చే భవం గరహతి… సమ్మాసతిం చే భవం గరహతి… సమ్మాసమాధిం చే భవం గరహతి… సమ్మాఞాణం చే భవం గరహతి … సమ్మావిముత్తిం చే భవం గరహతి, యే చ మిచ్ఛావిముత్తీ సమణబ్రాహ్మణా తే భోతో పుజ్జా, తే భోతో పాసంసా. యో కోచి, భిక్ఖవే, సమణో వా బ్రాహ్మణో వా ఇమం మహాచత్తారీసకం ధమ్మపరియాయం గరహితబ్బం పటిక్కోసితబ్బం మఞ్ఞేయ్య తస్స దిట్ఠేవ ధమ్మే ఇమే దససహధమ్మికా వాదానువాదా గారయ్హం ఠానం ఆగచ్ఛన్తి. యేపి తే, భిక్ఖవే, అహేసుం ఓక్కలా వస్సభఞ్ఞా [వయభిఞ్ఞా (క.) సం. ని. ౩.౬౨; అ. ని. ౪.౩౦ పస్సితబ్బం] అహేతువాదా అకిరియవాదా నత్థికవాదా తేపి మహాచత్తారీసకం ధమ్మపరియాయం న గరహితబ్బం నపటిక్కోసితబ్బం అమఞ్ఞింసు [మఞ్ఞేయ్యుం (క.)]. తం కిస్స హేతు? నిన్దాబ్యారోసఉపారమ్భభయా’’తి.

ఇదమవోచ భగవా. అత్తమనా తే భిక్ఖూ భగవతో భాసితం అభినన్దున్తి.

మహాచత్తారీసకసుత్తం నిట్ఠితం సత్తమం.