౯. పీతవిమానవత్థు

౭౯౫. ‘‘పీతవత్థే పీతధజే, పీతాలఙ్కారభూసితే;

పీతచన్దనలిత్తఙ్గే, పీతఉప్పలమాలినీ [పీతుప్పలమధారినీ (స్యా. క.), పీతుప్పలమాలినీ (పీ.)].

౭౯౬. ‘‘పీతపాసాదసయనే, పీతాసనే పీతభాజనే;

పీతఛత్తే పీతరథే, పీతస్సే పీతబీజనే.

౭౯౭. ‘‘కిం కమ్మమకరీ భద్దే, పుబ్బే మానుసకే భవే;

దేవతే పుచ్ఛితాచిక్ఖ, కిస్స కమ్మస్సిదం ఫల’’న్తి.

౭౯౮. ‘‘కోసాతకీ నామ లతత్థి భన్తే, తిత్తికా అనభిచ్ఛితా;

తస్సా చత్తారి పుప్ఫాని, థూపం అభిహరిం అహం.

౭౯౯. ‘‘సత్థు సరీరముద్దిస్స, విప్పసన్నేన చేతసా;

నాస్స మగ్గం అవేక్ఖిస్సం, న తగ్గమనసా [తదగ్గమనసా (సీ.), తదఙ్గమనసా (స్యా.)] సతీ.

౮౦౦. ‘‘తతో మం అవధీ గావీ, థూపం అపత్తమానసం;

తఞ్చాహం అభిసఞ్చేయ్యం, భియ్యో [భీయో (సీ. అట్ఠ.)] నూన ఇతో సియా.

౮౦౧. ‘‘తేన కమ్మేన దేవిన్ద, మఘవా దేవకుఞ్జరో;

పహాయ మానుసం దేహం, తవ సహబ్య [సహబ్యత (సీ. స్యా.)] మాగతా’’తి.

౮౦౨. ఇదం సుత్వా తిదసాధిపతి, మఘవా దేవకుఞ్జరో;

తావతింసే పసాదేన్తో, మాతలిం ఏతదబ్రవి [ఏతదబ్రూవీతి (సీ.)].

౮౦౩. ‘‘పస్స మాతలి అచ్ఛేరం, చిత్తం కమ్మఫలం ఇదం;

అప్పకమ్పి కతం దేయ్యం, పుఞ్ఞం హోతి మహప్ఫలం.

౮౦౪. ‘‘నత్థి చిత్తే పసన్నమ్హి, అప్పకా నామ దక్ఖిణా;

తథాగతే వా సమ్బుద్ధే, అథ వా తస్స సావకే.

౮౦౫. ‘‘ఏహి మాతలి అమ్హేపి, భియ్యో భియ్యో మహేమసే;

తథాగతస్స ధాతుయో, సుఖో పుఞ్ఞాన ముచ్చయో.

౮౦౬. ‘‘తిట్ఠన్తే నిబ్బుతే చాపి, సమే చిత్తే సమం ఫలం;

చేతోపణిధిహేతు హి, సత్తా గచ్ఛన్తి సుగ్గతిం.

౮౦౭. ‘‘బహూనం [బహున్నం (సీ. స్యా.)] వత అత్థాయ, ఉప్పజ్జన్తి తథాగతా;

యత్థ కారం కరిత్వాన, సగ్గం గచ్ఛన్తి దాయకా’’తి.

పీతవిమానం నవమం.