౬. దద్దల్లవిమానవత్థు
౬౧౯. ‘‘దద్దల్లమానా [దద్దళ్హమానా (క.)] వణ్ణేన, యససా చ యసస్సినీ;
సబ్బే దేవే తావతింసే, వణ్ణేన అతిరోచసి.
౬౨౦. ‘‘దస్సనం నాభిజానామి, ఇదం పఠమదస్సనం;
కస్మా కాయా ను ఆగమ్మ, నామేన భాససే మమ’’న్తి.
౬౨౧. ‘‘అహం భద్దే సుభద్దాసిం, పుబ్బే మానుసకే భవే;
సహభరియా చ తే ఆసిం, భగినీ చ కనిట్ఠికా.
౬౨౨. ‘‘సా అహం కాయస్స భేదా, విప్పముత్తా తతో చుతా;
నిమ్మానరతీనం దేవానం, ఉపపన్నా సహబ్యత’’న్తి.
౬౨౩. ‘‘పహూతకతకల్యాణా, తే దేవే యన్తి పాణినో;
యేసం త్వం కిత్తయిస్ససి, సుభద్దే జాతిమత్తనో.
౬౨౪. ‘‘అథ [కథం (సీ. స్యా.)] త్వం కేన వణ్ణేన, కేన వా అనుసాసితా;
కీదిసేనేవ దానేన, సుబ్బతేన యసస్సినీ.
౬౨౫. ‘‘యసం ఏతాదిసం పత్తా, విసేసం విపులమజ్ఝగా;
దేవతే పుచ్ఛితాచిక్ఖ, కిస్స కమ్మస్సిదం ఫల’’న్తి.
౬౨౬. ‘‘అట్ఠేవ పిణ్డపాతాని, యం దానం అదదం పురే;
దక్ఖిణేయ్యస్స సఙ్ఘస్స, పసన్నా సేహి పాణిభి.
౬౨౭. ‘‘తేన మేతాదిసో వణ్ణో…పే…వణ్ణో చ మే సబ్బదిసా పభాసతీ’’తి.
౬౨౯. ‘‘అహం తయా బహుతరే భిక్ఖూ, సఞ్ఞతే బ్రహ్మచారయో [బ్రహ్మచరినో (స్యా.), బ్రహ్మచారియే (పీ. క.)];
తప్పేసిం అన్నపానేన, పసన్నా సేహి పాణిభి.
౬౩౦. ‘‘తయా బహుతరం దత్వా, హీనకాయూపగా అహం [అహుం (క. సీ.)];
కథం త్వం అప్పతరం దత్వా, విసేసం విపులమజ్ఝగా;
దేవతే పుచ్ఛితాచిక్ఖ, కిస్స కమ్మస్సిదం ఫల’’న్తి.
౬౩౧. ‘‘మనోభావనీయో భిక్ఖు, సన్దిట్ఠో మే పురే అహు;
తాహం భత్తేన [భద్దే (క.)] నిమన్తేసిం, రేవతం అత్తనట్ఠమం.
౬౩౨. ‘‘సో మే అత్థపురేక్ఖారో, అనుకమ్పాయ రేవతో;
సఙ్ఘే దేహీతి మంవోచ, తస్సాహం వచనం కరిం.
౬౩౩. ‘‘సా దక్ఖిణా సఙ్ఘగతా, అప్పమేయ్యే పతిట్ఠితా;
పుగ్గలేసు తయా దిన్నం, న తం తవ మహప్ఫల’’న్తి.
౬౩౪. ‘‘ఇదానేవాహం జానామి, సఙ్ఘే దిన్నం మహప్ఫలం;
సాహం గన్త్వా మనుస్సత్తం, వదఞ్ఞూ వీతమచ్ఛరా;
సఙ్ఘే దానాని దస్సామి [సఙ్ఘే దానం దస్సామిహం (స్యా.)], అప్పమత్తా పునప్పున’’న్తి.
౬౩౫. ‘‘కా ఏసా దేవతా భద్దే, తయా మన్తయతే సహ;
సబ్బే దేవే తావతింసే, వణ్ణేన అతిరోచతీ’’తి.
౬౩౬. ‘‘మనుస్సభూతా దేవిన్ద, పుబ్బే మానుసకే భవే;
సహభరియా చ మే ఆసి, భగినీ చ కనిట్ఠికా;
సఙ్ఘే దానాని దత్వాన, కతపుఞ్ఞా విరోచతీ’’తి.
౬౩౭. ‘‘ధమ్మేన పుబ్బే భగినీ, తయా భద్దే విరోచతి;
యం సఙ్ఘమ్హి అప్పమేయ్యే, పతిట్ఠాపేసి దక్ఖిణం.
౬౩౮. ‘‘పుచ్ఛితో హి మయా బుద్ధో, గిజ్ఝకూటమ్హి పబ్బతే;
విపాకం సంవిభాగస్స, యత్థ దిన్నం మహప్ఫలం.
౬౩౯. ‘‘యజమానానం మనుస్సానం, పుఞ్ఞపేక్ఖాన పాణినం;
కరోతం ఓపధికం పుఞ్ఞం, యత్థ దిన్నం మహప్ఫలం.
౬౪౦. ‘‘తం మే బుద్ధో వియాకాసి, జానం కమ్మఫలం సకం;
విపాకం సంవిభాగస్స, యత్థ దిన్నం మహప్ఫలం.
౬౪౧. [వి. వ. ౭౫౦; కథా. ౭౯౮] ‘‘చత్తారో చ పటిపన్నా, చత్తారో చ ఫలే ఠితా;
ఏస సఙ్ఘో ఉజుభూతో, పఞ్ఞాసీలసమాహితో.
౬౪౨. [వి. వ. ౭౫౧; కథా. ౭౯౮] ‘‘యజమానానం మనుస్సానం, పుఞ్ఞపేక్ఖాన పాణినం;
కరోతం ఓపధికం పుఞ్ఞం, సఙ్ఘే దిన్నం మహప్ఫలం.
౬౪౩. [వి. వ. ౭౫౨; కథా. ౭౯౮] ‘‘ఏసో హి సఙ్ఘో విపులో మహగ్గతో, ఏసప్పమేయ్యో ఉదధీవ సాగరో;
ఏతే హి సేట్ఠా నరవీరసావకా, పభఙ్కరా ధమ్మముదీరయన్తి [ధమ్మకథం ఉదీరయన్తి (స్యా.)].
౬౪౪. [వి. వ. ౭౫౩; కథా. ౭౯౮] ‘‘తేసం సుదిన్నం సుహుతం సుయిట్ఠం, యే సఙ్ఘముద్దిస్స దదన్తి దానం;
సా దక్ఖిణా సఙ్ఘగతా పతిట్ఠితా, మహప్ఫలా లోకవిదూన [లోకవిదూహి (స్యా. క.)] వణ్ణితా.
౬౪౫. [వి. వ. ౭౫౪; కథా. ౭౯౮] ‘‘ఏతాదిసం యఞ్ఞమనుస్సరన్తా [పుఞ్ఞమనుస్సరన్తా (స్యా. క.)], యే వేదజాతా విచరన్తి లోకే;
వినేయ్య మచ్ఛేరమలం సమూలం, అనిన్దితా సగ్గముపేన్తి ఠాన’’న్తి.
దద్దల్లవిమానం [దద్దళ్హవిమానం (క.)] ఛట్ఠం.