౭. ఉపోసథావిమానవత్థు

౨౨౯. ‘‘అభిక్కన్తేన వణ్ణేన, యా త్వం తిట్ఠసి దేవతే;

ఓభాసేన్తీ దిసా సబ్బా, ఓసధీ వియ తారకా.

౨౩౦. ‘‘కేన తేతాదిసో వణ్ణో…పే…

వణ్ణో చ తే సబ్బదిసా పభాసతీ’’తి.

౨౩౨. సా దేవతా అత్తమనా…పే… యస్స కమ్మస్సిదం ఫలం.

౨౩౩. ‘‘ఉపోసథాతి మం అఞ్ఞంసు, సాకేతాయం ఉపాసికా;

సద్ధా సీలేన సమ్పన్నా, సంవిభాగరతా సదా.

౨౩౪. ‘‘అచ్ఛాదనఞ్చ భత్తఞ్చ, సేనాసనం పదీపియం;

అదాసిం ఉజుభూతేసు, విప్పసన్నేన చేతసా.

౨౩౫. ‘‘చాతుద్దసిం పఞ్చదసిం, యా చ పక్ఖస్స అట్ఠమీ;

పాటిహారియపక్ఖఞ్చ, అట్ఠఙ్గసుసమాగతం.

౨౩౬. ‘‘ఉపోసథం ఉపవసిస్సం, సదా సీలేసు సంవుతా;

సఞ్ఞమా సంవిభాగా చ, విమానం ఆవసామహం.

౨౩౭. ‘‘పాణాతిపాతా విరతా, ముసావాదా చ సఞ్ఞతా;

థేయ్యా చ అతిచారా చ, మజ్జపానా చ ఆరకా.

౨౩౮. ‘‘పఞ్చసిక్ఖాపదే రతా, అరియసచ్చాన కోవిదా;

ఉపాసికా చక్ఖుమతో, గోతమస్స యసస్సినో.

౨౩౯. ‘‘తేన మేతాదిసో వణ్ణో…పే…

వణ్ణో చ మే సబ్బదిసా పభాసతీ’’తి.

౨౪౧. ‘‘అభిక్ఖణం నన్దనం సుత్వా, ఛన్దో మే ఉదపజ్జథ [ఉపపజ్జథ (బహూసు)];

తత్థ చిత్తం పణిధాయ, ఉపపన్నమ్హి నన్దనం.

౨౪౨. ‘‘నాకాసిం సత్థు వచనం, బుద్ధస్సాదిచ్చబన్ధునో;

హీనే చిత్తం పణిధాయ, సామ్హి పచ్ఛానుతాపినీ’’తి.

౨౪౩. ‘‘కీవ చిరం విమానమ్హి, ఇధ వచ్ఛసుపోసథే [వస్ససుపోసథే (సీ.)];

దేవతే పుచ్ఛితాచిక్ఖ, యది జానాసి ఆయునో’’తి.

౨౪౪. ‘‘సట్ఠివస్ససహస్సాని [సట్ఠి సతసహస్సాని (?)], తిస్సో చ వస్సకోటియో;

ఇధ ఠత్వా మహాముని, ఇతో చుతా గమిస్సామి;

మనుస్సానం సహబ్యత’’న్తి.

౨౪౫. ‘‘మా త్వం ఉపోసథే భాయి, సమ్బుద్ధేనాసి బ్యాకతా;

సోతాపన్నా విసేసయి, పహీనా తవ దుగ్గతీ’’తి.

ఉపోసథావిమానం సత్తమం.