౫. కుఞ్జరవిమానవత్థు

౩౧. ‘‘కుఞ్జరో తే వరారోహో, నానారతనకప్పనో;

రుచిరో థామవా జవసమ్పన్నో, ఆకాసమ్హి సమీహతి.

౩౨. ‘‘పదుమి పద్మ [పదుమ… (సీ. స్యా.) ఏవముపరిపి] పత్తక్ఖి, పద్ముప్పలజుతిన్ధరో;

పద్మచుణ్ణాభికిణ్ణఙ్గో, సోణ్ణపోక్ఖరమాలధా [… మాలవా (సీ. స్యా.)].

౩౩. ‘‘పదుమానుసటం మగ్గం, పద్మపత్తవిభూసితం.

ఠితం వగ్గుమనుగ్ఘాతీ, మితం గచ్ఛతి వారణో.

౩౪. ‘‘తస్స పక్కమమానస్స, సోణ్ణకంసా రతిస్సరా;

తేసం సుయ్యతి నిగ్ఘోసో, తురియే పఞ్చఙ్గికే యథా.

౩౫. ‘‘తస్స నాగస్స ఖన్ధమ్హి, సుచివత్థా అలఙ్కతా;

మహన్తం అచ్ఛరాసఙ్ఘం, వణ్ణేన అతిరోచసి.

౩౬. ‘‘దానస్స తే ఇదం ఫలం, అథో సీలస్స వా పన;

అథో అఞ్జలికమ్మస్స, తం మే అక్ఖాహి పుచ్ఛితా’’తి;

౩౭. సా దేవతా అత్తమనా, మోగ్గల్లానేన పుచ్ఛితా;

పఞ్హం పుట్ఠా వియాకాసి, యస్స కమ్మస్సిదం ఫలం.

౩౮. ‘‘దిస్వాన గుణసమ్పన్నం, ఝాయిం ఝానరతం సతం;

అదాసిం పుప్ఫాభికిణ్ణం, ఆసనం దుస్ససన్థతం.

౩౯. ‘‘ఉపడ్ఢం పద్మమాలాహం, ఆసనస్స సమన్తతో;

అబ్భోకిరిస్సం పత్తేహి, పసన్నా సేహి పాణిభి.

౪౦. ‘‘తస్స కమ్మకుసలస్స [కమ్మస్స కుసలస్స (సీ. పీ.)], ఇదం మే ఈదిసం ఫలం;

సక్కారో గరుకారో చ, దేవానం అపచితా అహం.

౪౧. ‘‘యో వే సమ్మావిముత్తానం, సన్తానం బ్రహ్మచారినం;

పసన్నో ఆసనం దజ్జా, ఏవం నన్దే యథా అహం.

౪౨. ‘‘తస్మా హి అత్తకామేన [అత్థకామేన (క.)], మహత్తమభికఙ్ఖతా;

ఆసనం దాతబ్బం హోతి, సరీరన్తిమధారిన’’న్తి.

కుఞ్జరవిమానం పఞ్చమం.