౭. అజకలాపకసుత్తం

౭. ఏవం మే సుతం – ఏకం సమయం భగవా పావాయం [పాటలియం (పీ.)] విహరతి అజకలాపకే చేతియే, అజకలాపకస్స యక్ఖస్స భవనే. తేన ఖో పన సమయేన భగవా రత్తన్ధకారతిమిసాయం అబ్భోకాసే నిసిన్నో హోతి; దేవో చ ఏకమేకం ఫుసాయతి. అథ ఖో అజకలాపకో యక్ఖో భగవతో భయం ఛమ్భితత్తం లోమహంసం ఉప్పాదేతుకామో యేన భగవా తేనుపసఙ్కమి; ఉపసఙ్కమిత్వా భగవతో అవిదూరే తిక్ఖత్తుం ‘‘అక్కులో పక్కులో’’తి అక్కులపక్కులికం అకాసి – ‘‘ఏసో తే, సమణ, పిసాచో’’తి.

అథ ఖో భగవా ఏతమత్థం విదిత్వా తాయం వేలాయం ఇమం ఉదానం ఉదానేసి –

‘‘యదా సకేసు ధమ్మేసు, పారగూ హోతి బ్రాహ్మణో;

అథ ఏతం పిసాచఞ్చ, పక్కులఞ్చాతివత్తతీ’’తి. సత్తమం;