౧. సీసూపచాలాథేరీగాథా

౧౯౬. ‘‘భిక్ఖునీ సీలసమ్పన్నా, ఇన్ద్రియేసు సుసంవుతా;

అధిగచ్ఛే పదం సన్తం, అసేచనకమోజవం’’.

౧౯౭. ‘‘తావతింసా చ యామా చ, తుసితా చాపి దేవతా;

నిమ్మానరతినో దేవా, యే దేవా వసవత్తినో;

తత్థ చిత్తం పణీధేహి, యత్థ తే వుసితం పురే’’.

౧౯౮. ‘‘తావతింసా చ యామా చ, తుసితా చాపి దేవతా;

నిమ్మానరతినో దేవా, యే దేవా వసవత్తినో.

౧౯౯. ‘‘కాలం కాలం భవాభవం, సక్కాయస్మిం పురక్ఖతా;

అవీతివత్తా సక్కాయం, జాతిమరణసారినో.

౨౦౦. ‘‘సబ్బో ఆదీపితో లోకో, సబ్బో లోకో పదీపితో;

సబ్బో పజ్జలితో లోకో, సబ్బో లోకో పకమ్పితో.

౨౦౧. ‘‘అకమ్పియం అతులియం, అపుథుజ్జనసేవితం;

బుద్ధో ధమ్మమదేసేసి, తత్థ మే నిరతో మనో.

౨౦౨. ‘‘తస్సాహం వచనం సుత్వా, విహరిం సాసనే రతా;

తిస్సో విజ్జా అనుప్పత్తా, కతం బుద్ధస్స సాసనం.

౨౦౩. ‘‘సబ్బత్థ విహతా నన్దీ, తమోఖన్ధో పదాలితో;

ఏవం జానాహి పాపిమ, నిహతో త్వమసి అన్తక’’.

… సీసూపచాలా థేరీ….

అట్ఠకనిపాతో నిట్ఠితో.