౪. సుజాతాథేరీగాథా

౧౪౫. ‘‘అలఙ్కతా సువసనా, మాలినీ చన్దనోక్ఖితా;

సబ్బాభరణసఞ్ఛన్నా, దాసీగణపురక్ఖతా.

౧౪౬. ‘‘అన్నం పానఞ్చ ఆదాయ, ఖజ్జం భోజ్జం అనప్పకం;

గేహతో నిక్ఖమిత్వాన, ఉయ్యానమభిహారయిం.

౧౪౭. ‘‘తత్థ రమిత్వా కీళిత్వా, ఆగచ్ఛన్తీ సకం ఘరం;

విహారం దట్ఠుం పావిసిం, సాకేతే అఞ్జనం వనం.

౧౪౮. ‘‘దిస్వాన లోకపజ్జోతం, వన్దిత్వాన ఉపావిసిం;

సో మే ధమ్మమదేసేసి, అనుకమ్పాయ చక్ఖుమా.

౧౪౯. ‘‘సుత్వా చ ఖో మహేసిస్స, సచ్చం సమ్పటివిజ్ఝహం;

తత్థేవ విరజం ధమ్మం, ఫుసయిం అమతం పదం.

౧౫౦. ‘‘తతో విఞ్ఞాతసద్ధమ్మా, పబ్బజిం అనగారియం;

తిస్సో విజ్జా అనుప్పత్తా, అమోఘం బుద్ధసాసన’’న్తి.

… సుజాతా థేరీ….