౮. పుణ్ణికాథేరీఅపదానం

౧౮౪. ‘‘విపస్సినో భగవతో, సిఖినో వేస్సభుస్స చ;

కకుసన్ధస్స మునినో, కోణాగమనతాదినో.

౧౮౫. ‘‘కస్సపస్స చ బుద్ధస్స, పబ్బజిత్వాన సాసనే;

భిక్ఖునీ సీలసమ్పన్నా, నిపకా సంవుతిన్ద్రియా.

౧౮౬. ‘‘బహుస్సుతా ధమ్మధరా, ధమ్మత్థపటిపుచ్ఛికా;

ఉగ్గహేతా చ ధమ్మానం, సోతా పయిరుపాసితా.

౧౮౭. ‘‘దేసేన్తీ జనమజ్ఝేహం, అహోసిం జినసాసనే;

బాహుసచ్చేన తేనాహం, పేసలా అతిమఞ్ఞిసం.

౧౮౮. ‘‘పచ్ఛిమే చ భవే దాని, సావత్థియం పురుత్తమే;

అనాథపిణ్డినో గేహే, జాతాహం కుమ్భదాసియా.

౧౮౯. ‘‘గతా ఉదకహారియం, సోత్థియం దిజమద్దసం;

సీతట్టం తోయమజ్ఝమ్హి, తం దిస్వా ఇదమబ్రవిం.

౧౯౦. ‘‘‘ఉదహారీ అహం సీతే, సదా ఉదకమోతరిం;

అయ్యానం దణ్డభయభీతా, వాచాదోసభయట్టితా [వాచారోసభయట్టితా (స్యా.)].

౧౯౧. ‘‘‘కస్స బ్రాహ్మణ త్వం భీతో, సదా ఉదకమోతరి;

వేధమానేహి గత్తేహి, సీతం వేదయసే భుసం’.

౧౯౨. ‘‘‘జానన్తీ వత మం భోతి, పుణ్ణికే పరిపుచ్ఛసి;

కరోన్తం కుసలం కమ్మం, రున్ధన్తం [నిద్ధన్తం (సీ. పీ.), నుదన్తం (స్యా.)] కతపాపకం.

౧౯౩. ‘‘‘యో చే వుడ్ఢో దహరో వా, పాపకమ్మం పకుబ్బతి;

దకాభిసిఞ్చనా సోపి [భోతి (సీ. క.) థేరీగా. ౨౩౯], పాపకమ్మా పముచ్చతి’.

౧౯౪. ‘‘ఉత్తరన్తస్స అక్ఖాసిం, ధమ్మత్థసంహితం పదం;

తఞ్చ సుత్వా స సంవిగ్గో [సుసంవిగ్గో (స్యా.)], పబ్బజిత్వారహా అహు.

౧౯౫. ‘‘పూరేన్తీ ఊనకసతం, జాతా దాసికులే యతో;

తతో పుణ్ణాతి నామం మే, భుజిస్సం మం అకంసు తే.

౧౯౬. ‘‘సేట్ఠిం తతోనుజానేత్వా [తతో అనుమోదేత్వా (సీ. స్యా.), తతో అనుమానేత్వా (పీ.)], పబ్బజిం అనగారియం;

న చిరేనేవ కాలేన, అరహత్తమపాపుణిం.

౧౯౭. ‘‘ఇద్ధీసు చ వసీ హోమి, దిబ్బాయ సోతధాతుయా;

చేతోపరియఞాణస్స, వసీ హోమి మహామునే.

౧౯౮. ‘‘పుబ్బేనివాసం జానామి, దిబ్బచక్ఖు విసోధితం;

సబ్బాసవపరిక్ఖీణా, నత్థి దాని పునబ్భవో.

౧౯౯. ‘‘అత్థధమ్మనిరుత్తీసు, పటిభానే తథేవ చ;

ఞాణం మే విమలం సుద్ధం, బుద్ధసేట్ఠస్స వాహసా.

౨౦౦. ‘‘భావనాయ మహాపఞ్ఞా, సుతేనేవ సుతావినీ;

మానేన నీచకులజా, న హి కమ్మం వినస్సతి [పనస్సతి (స్యా.)].

౨౦౧. ‘‘కిలేసా ఝాపితా మయ్హం…పే… విహరామి అనాసవా.

౨౦౨. ‘‘స్వాగతం వత మే ఆసి…పే… కతం బుద్ధస్స సాసనం.

౨౦౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం పుణ్ణికా భిక్ఖునీ ఇమా గాథాయో అభాసిత్థాతి.

పుణ్ణికాథేరియాపదానం అట్ఠమం.