౫. పఞ్చదీపదాయికాథేరీఅపదానం

౬౧. ‘‘నగరే హంసవతియా, చారికీ [చారికా (సీ. స్యా.)] ఆసహం తదా;

ఆరామేన చ ఆరామం [ఆరామేన విహారేన (స్యా. పీ.)], చరామి కుసలత్థికా.

౬౨. ‘‘కాళపక్ఖమ్హి దివసే, అద్దసం బోధిముత్తమం;

తత్థ చిత్తం పసాదేత్వా, బోధిమూలే నిసీదహం.

౬౩. ‘‘గరుచిత్తం ఉపట్ఠేత్వా, సిరే కత్వాన అఞ్జలిం;

సోమనస్సం పవేదేత్వా, ఏవం చిన్తేసి తావదే.

౬౪. ‘‘‘యది బుద్ధో అమితగుణో, అసమప్పటిపుగ్గలో;

దస్సేతు పాటిహీరం మే, బోధి ఓభాసతు అయం’.

౬౫. ‘‘సహ ఆవజ్జితే మయ్హం, బోధి పజ్జలి తావదే;

సబ్బసోణ్ణమయా ఆసి, దిసా సబ్బా విరోచతి.

౬౬. ‘‘సత్తరత్తిన్దివం తత్థ, బోధిమూలే నిసీదహం;

సత్తమే దివసే పత్తే, దీపపూజం అకాసహం.

౬౭. ‘‘ఆసనం పరివారేత్వా, పఞ్చ దీపాని పజ్జలుం;

యావ ఉదేతి సూరియో, దీపా మే పజ్జలుం తదా.

౬౮. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౬౯. ‘‘తత్థ మే సుకతం బ్యమ్హం, పఞ్చదీపాతి వుచ్చతి;

సట్ఠియోజనముబ్బేధం, తింసయోజనవిత్థతం.

౭౦. ‘‘అసఙ్ఖియాని దీపాని, పరివారే జలింసు మే;

యావతా దేవభవనం, దీపాలోకేన జోతతి.

౭౧. ‘‘పరమ్ముఖా [పుబ్బముఖా (స్యా.)] నిసీదిత్వా, యది ఇచ్ఛామి పస్సితుం;

ఉద్ధం అధో చ తిరియం, సబ్బం పస్సామి చక్ఖునా.

౭౨. ‘‘యావతా అభికఙ్ఖామి, దట్ఠుం సుగతదుగ్గతే [సుకతదుక్కటే (పీ.)];

తత్థ ఆవరణం నత్థి, రుక్ఖేసు పబ్బతేసు వా.

౭౩. ‘‘అసీతి దేవరాజూనం, మహేసిత్తమకారయిం;

సతానం చక్కవత్తీనం, మహేసిత్తమకారయిం.

౭౪. ‘‘యం యం యోనుపపజ్జామి, దేవత్తం అథ మానుసం;

దీపసతసహస్సాని, పరివారే జలన్తి మే.

౭౫. ‘‘దేవలోకా చవిత్వాన, ఉప్పజ్జిం మాతుకుచ్ఛియం;

మాతుకుచ్ఛిగతా సన్తీ, అక్ఖి మే న నిమీలతి.

౭౬. ‘‘దీపసతసహస్సాని, పుఞ్ఞకమ్మసమఙ్గితా;

జలన్తి సూతికాగేహే, పఞ్చదీపానిదం ఫలం.

౭౭. ‘‘పచ్ఛిమే భవే సమ్పత్తే, మానసం వినివత్తయిం;

అజరామతం సీతిభావం, నిబ్బానం ఫస్సయిం అహం.

౭౮. ‘‘జాతియా సత్తవస్సాహం, అరహత్తమపాపుణిం;

ఉపసమ్పాదయీ బుద్ధో, గుణమఞ్ఞాయ గోతమో.

౭౯. ‘‘మణ్డపే రుక్ఖమూలే వా, సుఞ్ఞాగారే వసన్తియా;

సదా పజ్జలతే దీపం, పఞ్చదీపానిదం ఫలం.

౮౦. ‘‘దిబ్బచక్ఖు విసుద్ధం మే, సమాధికుసలా అహం;

అభిఞ్ఞాపారమిప్పత్తా, పఞ్చదీపానిదం ఫలం.

౮౧. ‘‘సబ్బవోసితవోసానా, కతకిచ్చా అనాసవా;

పఞ్చదీపా మహావీర, పాదే వన్దామి చక్ఖుమ.

౮౨. ‘‘సతసహస్సితో కప్పే, యం దీపమదదిం తదా;

దుగ్గతిం నాభిజానామి, పఞ్చదీపానిదం ఫలం.

౮౩. ‘‘కిలేసా ఝాపితా మయ్హం…పే… విహరామి అనాసవా.

౮౪. ‘‘స్వాగతం వత మే ఆసి…పే… కతం బుద్ధస్స సాసనం.

౮౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం పఞ్చదీపదాయికా భిక్ఖునీ ఇమా గాథాయో అభాసిత్థాతి.

పఞ్చదీపదాయికాథేరియాపదానం పఞ్చమం.