౯. పఞ్చదీపికాథేరీఅపదానం

౯౧. ‘‘నగరే హంసవతియా, చారికీ [చారినిం (స్యా.)] ఆసహం తదా;

ఆరామేన చ ఆరామం, చరామి కుసలత్థికా.

౯౨. ‘‘కాళపక్ఖమ్హి దివసే, అద్దసం బోధిముత్తమం;

తత్థ చిత్తం పసాదేత్వా, బోధిమూలే నిసీదహం.

౯౩. ‘‘గరుచిత్తం ఉపట్ఠేత్వా, సిరే కత్వాన అఞ్జలిం;

సోమనస్సం పవేదేత్వా, ఏవం చిన్తేసి తావదే.

౯౪. ‘‘‘యది బుద్ధో అమితగుణో, అసమప్పటిపుగ్గలో;

దస్సేతు పాటిహీరం మే, బోధి ఓభాసతు అయం’.

౯౫. ‘‘సహ ఆవజ్జితే మయ్హం, బోధి పజ్జలి తావదే;

సబ్బసోణ్ణమయా ఆసి, దిసా సబ్బా విరోచతి.

౯౬. ‘‘సత్తరత్తిన్దివం [సత్తరత్తిదివం (పీ. క.)] తత్థ, బోధిమూలే నిసీదహం;

సత్తమే దివసే పత్తే, దీపపూజం అకాసహం.

౯౭. ‘‘ఆసనం పరివారేత్వా, పఞ్చదీపాని పజ్జలుం;

యావ ఉదేతి సూరియో, దీపా మే పజ్జలుం తదా.

౯౮. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౯౯. ‘‘తత్థ మే సుకతం బ్యమ్హం, పఞ్చదీపాతి వుచ్చతి;

సట్ఠియోజనముబ్బేధం [సతయోజనముబ్బేధం (సీ. స్యా. పీ.)], తింసయోజనవిత్థతం [సట్ఠి… (స్యా. పీ.)].

౧౦౦. ‘‘అసఙ్ఖియాని దీపాని, పరివారే జలన్తి మే;

యావతా దేవభవనం, దీపాలోకేన జోతతి.

౧౦౧. ‘‘పరమ్ముఖా నిసీదిత్వా [పురత్థాభిముఖా సన్తి (స్యా.), పురత్థాభిముఖా థితా (పీ.)], యది ఇచ్ఛామి పస్సితుం;

ఉద్ధం అధో చ తిరియం, సబ్బం పస్సామి చక్ఖునా.

౧౦౨. ‘‘యావతా అభికఙ్ఖామి, దట్ఠుం సుగతదుగ్గతే [సుకతదుక్కతే (పీ.];

తత్థ ఆవరణం నత్థి, రుక్ఖేసు పబ్బతేసు వా.

౧౦౩. ‘‘అసీతి దేవరాజూనం, మహేసిత్తమకారయిం;

సతానం చక్కవత్తీనం, మహేసిత్తమకారయిం.

౧౦౪. ‘‘యం యం యోనుపపజ్జామి, దేవత్తం అథ మానుసం;

దీపసతసహస్సాని, పరివారే జలన్తి మే.

౧౦౫. ‘‘దేవలోకా చవిత్వాన, ఉప్పజ్జిం మాతుకుచ్ఛియం;

మాతుకుచ్ఛిగతా సన్తీ [మాతుకుచ్ఛిగతం సన్తిం (సీ.)], అక్ఖి మే న నిమీలతి.

౧౦౬. ‘‘దీపసతసహస్సాని, పుఞ్ఞకమ్మసమఙ్గితా;

జలన్తి సూతికాగేహే [సూతిఘరే పజ్జలన్తి (సబ్బత్థ)], పఞ్చదీపానిదం ఫలం.

౧౦౭. ‘‘పచ్ఛిమే భవే సమ్పత్తే, మానసం వినివత్తయిం;

అజరామతం సీతిభావం, నిబ్బానం ఫస్సయిం అహం.

౧౦౮. ‘‘జాతియా సత్తవస్సాహం, అరహత్తమపాపుణిం;

ఉపసమ్పాదయీ బుద్ధో, గుణమఞ్ఞాయ గోతమో.

౧౦౯. ‘‘మణ్డపే రుక్ఖమూలే వా, పాసాదేసు గుహాసు వా;

సుఞ్ఞాగారే వసన్తియా [చ ఝాయన్తే (సీ.), చ ఝాయన్తా (పీ.), పజ్ఝాయన్తా (స్యా.)], పఞ్చదీపా జలన్తి మే.

౧౧౦. ‘‘దిబ్బచక్ఖు విసుద్ధం మే, సమాధికుసలా అహం;

అభిఞ్ఞాపారమిప్పత్తా, పఞ్చదీపానిదం ఫలం.

౧౧౧. ‘‘సబ్బవోసితవోసానా, కతకిచ్చా అనాసవా;

పఞ్చదీపా మహావీర, పాదే వన్దామి [వన్దతి (సీ. క.)] చక్ఖుమ.

౧౧౨. ‘‘సతసహస్సితో కప్పే, యం దీపమదదిం తదా;

దుగ్గతిం నాభిజానామి, పఞ్చదీపానిదం ఫలం.

౧౧౩. ‘‘కిలేసా ఝాపితా మయ్హం…పే… విహరామి అనాసవా.

౧౧౪. ‘‘స్వాగతం వత మే ఆసి…పే… కతం బుద్ధస్స సాసనం.

౧౧౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం పఞ్చదీపికా భిక్ఖునీ ఇమా గాథాయో అభాసిత్థాతి.

పఞ్చదీపికాథేరియాపదానం నవమం.