౬. సప్పదాసత్థేరగాథా
౪౦౫. ‘‘పణ్ణవీసతివస్సాని, యతో పబ్బజితో అహం;
అచ్ఛరాసఙ్ఘాతమత్తమ్పి, చేతోసన్తిమనజ్ఝగం.
౪౦౬. ‘‘అలద్ధా చిత్తస్సేకగ్గం, కామరాగేన అట్టితో [అద్దితో (స్యా. సీ. అట్ఠ.), అడ్డితో (క.)];
బాహా పగ్గయ్హ కన్దన్తో, విహారా ఉపనిక్ఖమిం [నూపనిక్ఖమిం (సబ్బత్థ), దుపనిక్ఖమిం (?)].
౪౦౭. ‘‘సత్థం వా ఆహరిస్సామి, కో అత్థో జీవితేన మే;
కథం హి సిక్ఖం పచ్చక్ఖం, కాలం కుబ్బేథ మాదిసో.
౪౦౮. ‘‘తదాహం ఖురమాదాయ, మఞ్చకమ్హి ఉపావిసిం;
పరినీతో ఖురో ఆసి, ధమనిం ఛేత్తుమత్తనో.
౪౦౯. ‘‘తతో మే మనసీకారో, యోనిసో ఉదపజ్జథ;
ఆదీనవో పాతురహు, నిబ్బిదా సమతిట్ఠథ.
౪౧౦. ‘‘తతో చిత్తం విముచ్చి మే, పస్స ధమ్మసుధమ్మతం;
తిస్సో విజ్జా అనుప్పత్తా, కతం బుద్ధస్స సాసన’’న్తి.
… సప్పదాసో థేరో….
౭.కాతియానత్థేరగాథా
౪౧౧. ‘‘ఉట్ఠేహి నిసీద కాతియాన, మా నిద్దాబహులో అహు జాగరస్సు;
మా తం అలసం పమత్తబన్ధు, కూటేనేవ జినాతు మచ్చురాజా.
౪౧౨. ‘‘సేయ్యథాపి [సయథాపి (సీ. పీ.)] మహాసముద్దవేగో, ఏవం జాతిజరాతివత్తతే తం;
సో కరోహి సుదీపమత్తనో త్వం, న హి తాణం తవ విజ్జతేవ అఞ్ఞం.
౪౧౩. ‘‘సత్థా హి విజేసి మగ్గమేతం, సఙ్గా జాతిజరాభయా అతీతం;
పుబ్బాపరరత్తమప్పమత్తో, అనుయుఞ్జస్సు దళ్హం కరోహి యోగం.
౪౧౪. ‘‘పురిమాని పముఞ్చ బన్ధనాని, సఙ్ఘాటిఖురముణ్డభిక్ఖభోజీ;
మా ఖిడ్డారతిఞ్చ మా నిద్దం, అనుయుఞ్జిత్థ ఝాయ కాతియాన.
౪౧౫. ‘‘ఝాయాహి జినాహి కాతియాన, యోగక్ఖేమపథేసు కోవిదోసి;
పప్పుయ్య అనుత్తరం విసుద్ధిం, పరినిబ్బాహిసి వారినావ జోతి.
౪౧౬. ‘‘పజ్జోతకరో పరిత్తరంసో, వాతేన వినమ్యతే లతావ;
ఏవమ్పి తువం అనాదియానో, మారం ఇన్దసగోత్త నిద్ధునాహి;
సో వేదయితాసు వీతరాగో, కాలం కఙ్ఖ ఇధేవ సీతిభూతో’’తి.
… కాతియానో థేరో….