౧. మహామోగ్గల్లానత్థేరగాథా
౧౧౪౯. ‘‘ఆరఞ్ఞికా పిణ్డపాతికా, ఉఞ్ఛాపత్తాగతే రతా;
దాలేము మచ్చునో సేనం, అజ్ఝత్తం సుసమాహితా.
౧౧౫౦. ‘‘ఆరఞ్ఞికా పిణ్డపాతికా, ఉఞ్ఛాపత్తాగతే రతా;
ధునామ మచ్చునో సేనం, నళాగారంవ కుఞ్జరో.
౧౧౫౧. ‘‘రుక్ఖమూలికా సాతతికా, ఉఞ్ఛాపత్తాగతే రతా;
దాలేము మచ్చునో సేనం, అజ్ఝత్తం సుసమాహితా.
౧౧౫౨. ‘‘రుక్ఖమూలికా సాతతికా, ఉఞ్ఛాపత్తాగతే రతా;
ధునామ మచ్చునో సేనం, నళాగారంవ కుఞ్జరో.
౧౧౫౩. ‘‘అట్ఠికఙ్కలకుటికే, మంసన్హారుపసిబ్బితే;
ధిరత్థు పురే దుగ్గన్ధే, పరగత్తే మమాయసే.
౧౧౫౪. ‘‘గూథభస్తే తచోనద్ధే, ఉరగణ్డిపిసాచిని;
నవ సోతాని తే కాయే, యాని సన్దన్తి సబ్బదా.
౧౧౫౫. ‘‘తవ సరీరం నవసోతం, దుగ్గన్ధకరం పరిబన్ధం;
భిక్ఖు పరివజ్జయతే తం, మీళ్హం చ యథా సుచికామో.
౧౧౫౬. ‘‘ఏవఞ్చే తం జనో జఞ్ఞా, యథా జానామి తం అహం;
ఆరకా పరివజ్జేయ్య, గూథట్ఠానంవ పావుసే’’.
౧౧౫౭. ‘‘ఏవమేతం మహావీర, యథా సమణ భాససి;
ఏత్థ చేకే విసీదన్తి, పఙ్కమ్హివ జరగ్గవో.
౧౧౫౮. ‘‘ఆకాసమ్హి హలిద్దియా, యో మఞ్ఞేథ రజేతవే;
అఞ్ఞేన వాపి రఙ్గేన, విఘాతుదయమేవ తం.
౧౧౫౯. ‘‘తదాకాససమం చిత్తం, అజ్ఝత్తం సుసమాహితం;
మా పాపచిత్తే ఆసాది, అగ్గిఖన్ధంవ పక్ఖిమా.
౧౧౬౦. ‘‘పస్స చిత్తకతం బిమ్బం, అరుకాయం సముస్సితం;
ఆతురం బహుసఙ్కప్పం, యస్స నత్థి ధువం ఠితి.
౧౧౬౧. ‘‘పస్స చిత్తకతం రూపం, మణినా కుణ్డలేన చ;
అట్ఠిం తచేన ఓనద్ధం, సహ వత్థేహి సోభతి.
౧౧౬౨. ‘‘అలత్తకకతా పాదా, ముఖం చుణ్ణకమక్ఖితం;
అలం బాలస్స మోహాయ, నో చ పారగవేసినో.
౧౧౬౩. ‘‘అట్ఠపదకతా కేసా, నేత్తా అఞ్జనమక్ఖితా;
అలం బాలస్స మోహాయ, నో చ పారగవేసినో.
౧౧౬౪. ‘‘అఞ్జనీవ నవా చిత్తా, పూతికాయో అలఙ్కతో;
అలం బాలస్స మోహాయ, నో చ పారగవేసినో.
౧౧౬౫. ‘‘ఓదహి మిగవో పాసం, నాసదా వాగురం మిగో;
భుత్వా నివాపం గచ్ఛామ, కద్దన్తే మిగబన్ధకే.
౧౧౬౬. ‘‘ఛిన్నో పాసో మిగవస్స, నాసదా వాగురం మిగో;
భుత్వా నివాపం గచ్ఛామ, సోచన్తే మిగలుద్దకే.
౧౧౬౭. ‘‘తదాసి యం భింసనకం, తదాసి లోమహంసనం;
అనేకాకారసమ్పన్నే, సారిపుత్తమ్హి నిబ్బుతే.
౧౧౬౮. [దీ. ని. ౨.౨౨౧, ౨౭౨; సం. ని. ౧.౧౮౬; ౨.౧౪౩; అప. థేర ౧.౨.౧౧౫; జా. ౧.౧.౯౫] ‘‘అనిచ్చా వత సఙ్ఖారా ఉప్పాదవయ ధమ్మినో.
ఉపజ్జిత్వా నిరుజ్ఝన్తి, తేసం వూపసమో సుఖో.
౧౧౬౯. ‘‘సుఖుమం తే పటివిజ్ఝన్తి, వాలగ్గం ఉసునా యథా;
యే పఞ్చక్ఖన్ధే పస్సన్తి, పరతో నో చ అత్తతో.
౧౧౭౦. ‘‘యే చ పస్సన్తి సఙ్ఖారే, పరతో నో చ అత్తతో;
పచ్చబ్యాధింసు నిపుణం, వాలగ్గం ఉసునా యథా.
౧౧౭౧. [సం. ని. ౧.౨౧, ౯౭] ‘‘సత్తియా వియ ఓమట్ఠో, డయ్హమానోవ మత్థకే;
కామరాగప్పహానాయ, సతో భిక్ఖు పరిబ్బజే.
౧౧౭౨. [సం. ని. ౧.౨౧, ౯౭]‘‘సత్తియా వియ ఓమట్ఠో, డయ్హమానోవ మత్థకే;
భవరాగప్పహానాయ, సతో భిక్ఖు పరిబ్బజే’’.
౧౧౭౩. ‘‘చోదితో భావితత్తేన, సరీరన్తిమధారినా;
మిగారమాతుపాసాదం, పాదఙ్గుట్ఠేన కమ్పయిం.
౧౧౭౪. ‘‘నయిదం సిథిలమారబ్భ, నయిదం అప్పేన థామసా;
నిబ్బానమధిగన్తబ్బం, సబ్బగన్థ-పమోచనం.
౧౧౭౫. ‘‘అయఞ్చ దహరో భిక్ఖు, అయముత్తమపోరిసో;
ధారేతి అన్తిమం దేహం, జేత్వా మారం సవాహినిం [సవాహనం (క.)].
౧౧౭౬. ‘‘వివరమనుపభన్తి విజ్జుతా, వేభారస్స చ పణ్డవస్స చ;
నగవివరగతో ఝాయతి, పుత్తో అప్పటిమస్స తాదినో.
౧౧౭౭. ‘‘ఉపసన్తో ఉపరతో, పన్తసేనాసనో ముని;
దాయాదో బుద్ధసేట్ఠస్స, బ్రహ్మునా అభివన్దితో.
౧౧౭౮. ‘‘ఉపసన్తం ఉపరతం, పన్తసేనాసనం మునిం;
దాయాదం బుద్ధసేట్ఠస్స, వన్ద బ్రాహ్మణ కస్సపం.
౧౧౭౯. ‘‘యో చ జాతిసతం గచ్ఛే, సబ్బా బ్రాహ్మణజాతియో;
సోత్తియో వేదసమ్పన్నో, మనుస్సేసు పునప్పునం.
౧౧౮౦. ‘‘అజ్ఝాయకోపి చే అస్స, తిణ్ణం వేదాన పారగూ;
ఏతస్స వన్దనాయేతం, కలం నాగ్ఘతి సోళసిం.
౧౧౮౧. ‘‘యో సో అట్ఠ విమోక్ఖాని, పురేభత్తం అఫస్సయి [అపస్సయి (సీ. క.), అఫుస్సయి (స్యా.)];
అనులోమం పటిలోమం, తతో పిణ్డాయ గచ్ఛతి.
౧౧౮౨. ‘‘తాదిసం భిక్ఖుం మాసాది [మా హని (సీ.)], మాత్తానం ఖణి బ్రాహ్మణ;
అభిప్పసాదేహి మనం, అరహన్తమ్హి తాదినే;
ఖిప్పం పఞ్జలికో వన్ద, మా తే విజటి మత్థకం.
౧౧౮౩. ‘‘నేసో పస్సతి సద్ధమ్మం, సంసారేన పురక్ఖతో;
అధోగమం జిమ్హపథం, కుమ్మగ్గమనుధావతి.
౧౧౮౪. ‘‘కిమీవ మీళ్హసల్లిత్తో, సఙ్ఖారే అధిముచ్ఛితో;
పగాళ్హో లాభసక్కారే, తుచ్ఛో గచ్ఛతి పోట్ఠిలో.
౧౧౮౫. ‘‘ఇమఞ్చ పస్స ఆయన్తం, సారిపుత్తం సుదస్సనం;
విముత్తం ఉభతోభాగే, అజ్ఝత్తం సుసమాహితం.
౧౧౮౬. ‘‘విసల్లం ఖీణసంయోగం, తేవిజ్జం మచ్చుహాయినం;
దక్ఖిణేయ్యం మనుస్సానం, పుఞ్ఞక్ఖేత్తం అనుత్తరం.
౧౧౮౭. ‘‘ఏతే సమ్బహులా దేవా, ఇద్ధిమన్తో యసస్సినో;
దస దేవసహస్సాని, సబ్బే బ్రహ్మపురోహితా;
మోగ్గల్లానం నమస్సన్తా, తిట్ఠన్తి పఞ్జలీకతా.
౧౧౮౮. ‘‘‘నమో తే పురిసాజఞ్ఞ, నమో తే పురిసుత్తమ;
యస్స తే ఆసవా ఖీణా, దక్ఖిణేయ్యోసి మారిస’.
౧౧౮౯. ‘‘పూజితో నరదేవేన, ఉప్పన్నో మరణాభిభూ;
పుణ్డరీకంవ తోయేన, సఙ్ఖారేనుపలిప్పతి.
౧౧౯౦. ‘‘యస్స ముహుత్తేన సహస్సధా లోకో, సంవిదితో సబ్రహ్మకప్పో వసి;
ఇద్ధిగుణే చుతుపపాతే కాలే, పస్సతి దేవతా స భిక్ఖు.
౧౧౯౧. ‘‘సారిపుత్తోవ పఞ్ఞాయ, సీలేన ఉపసమేన చ;
యోపి పారఙ్గతో భిక్ఖు, ఏతావపరమో సియా.
౧౧౯౨. ‘‘కోటిసతసహస్సస్స, అత్తభావం ఖణేన నిమ్మినే;
అహం వికుబ్బనాసు కుసలో, వసీభూతోమ్హి ఇద్ధియా.
౧౧౯౩. ‘‘సమాధివిజ్జావసిపారమీగతో, మోగ్గల్లానగోత్తో అసితస్స సాసనే;
ధీరో సముచ్ఛిన్ది సమాహితిన్ద్రియో, నాగో యథా పూతిలతంవ బన్ధనం.
౧౧౯౪. ‘‘పరిచిణ్ణో మయా సత్థా, కతం బుద్ధస్స సాసనం;
ఓహితో గరుకో భారో, భవనేత్తి సమూహతా.
౧౧౯౫. ‘‘యస్స చత్థాయ పబ్బజితో, అగారస్మానగారియం;
సో మే అత్థో అనుప్పత్తో, సబ్బసంయోజనక్ఖయో.
౧౧౯౬. [మ. ని. ౧.౫౧౩] ‘‘కీదిసో నిరయో ఆసి, యత్థ దుస్సీ అపచ్చథ;
విధురం సావకమాసజ్జ, కకుసన్ధఞ్చ బ్రాహ్మణం.
౧౧౯౭. ‘‘సతం ఆసి అయోసఙ్కూ, సబ్బే పచ్చత్తవేదనా;
ఈదిసో నిరయో ఆసి, యత్థ దుస్సీ అపచ్చథ;
విధురం సావకమాసజ్జ, కకుసన్ధఞ్చ బ్రాహ్మణం.
౧౧౯౮. ‘‘యో ఏతమభిజానాతి, భిక్ఖు బుద్ధస్స సావకో;
తాదిసం భిక్ఖుమాసజ్జ, కణ్హ దుక్ఖం నిగచ్ఛసి.
౧౧౯౯. ‘‘మజ్ఝేసరస్మిం [సరస్స (సీ.), సాగరస్మిం (క.)] తిట్ఠన్తి, విమానా కప్పఠాయినో;
వేళురియవణ్ణా రుచిరా, అచ్చిమన్తో పభస్సరా;
అచ్ఛరా తత్థ నచ్చన్తి, పుథు నానత్తవణ్ణియో.
౧౨౦౦. ‘‘యో ఏతమభిజానాతి…పే… కణ్హ దుక్ఖం నిగచ్ఛసి.
౧౨౦౧. ‘‘యో వే బుద్ధేన చోదితో, భిక్ఖుసఙ్ఘస్స పేక్ఖతో;
మిగారమాతుపాసాదం, పాదఙ్గుట్ఠేన కమ్పయి.
౧౨౦౨. ‘‘యో ఏతమభిజానాతి…పే… కణ్హ దుక్ఖం నిగచ్ఛసి.
౧౨౦౩. ‘‘యో వేజయన్తపాసాదం, పాదఙ్గుట్ఠేన కమ్పయి;
ఇద్ధిబలేనుపత్థద్ధో, సంవేజేసి చ దేవతా.
౧౨౦౪. ‘‘యో ఏతమభిజానాతి…పే… కణ్హ దుక్ఖం నిగచ్ఛసి.
౧౨౦౪. ‘‘యో ఏతమభిజానాతి…పే… కణ్హ దుక్ఖం నిగచ్ఛసి.
౧౨౦౫. ‘‘యో వేజయన్తపాసాదే, సక్కం సో పరిపుచ్ఛతి;
అపి ఆవుసో జానాసి, తణ్హక్ఖయవిముత్తియో;
తస్స సక్కో వియాకాసి, పఞ్హం పుట్ఠో యథాతథం.
౧౨౦౬. ‘‘యో ఏతమభిజానాతి…పే… కణ్హ దుక్ఖం నిగచ్ఛసి.
౧౨౦౭. ‘‘యో బ్రహ్మానం పరిపుచ్ఛతి, సుధమ్మాయం ఠితో [సుధమ్మాయా’భితో (స్యా.)] సభం;
అజ్జాపి త్యావుసో సా దిట్ఠి, యా తే దిట్ఠి పురే అహు;
పస్ససి వీతివత్తన్తం, బ్రహ్మలోకే పభస్సరం.
౧౨౦౮. ‘‘తస్స బ్రహ్మా వియాకాసి, పఞ్హం పుట్ఠో యథాతథం;
న మే మారిస సా దిట్ఠి, యా మే దిట్ఠి పురే అహు.
౧౨౦౯. ‘‘పస్సామి వీతివత్తన్తం, బ్రహ్మలోకే పభస్సరం;
సోహం అజ్జ కథం వజ్జం, అహం నిచ్చోమ్హి సస్సతో.
౧౨౧౦. ‘‘యో ఏతమభిజానాతి…పే… కణ్హ దుక్ఖం నిగచ్ఛసి.
౧౨౧౧. ‘‘యో మహానేరునో కూటం, విమోక్ఖేన అఫస్సయి [అపస్సయి (సీ. క.)];
వనం పుబ్బవిదేహానం, యే చ భూమిసయా నరా.
౧౨౧౨. ‘‘యో ఏతమభిజానాతి, భిక్ఖు బుద్ధస్స సావకో;
తాదిసం భిక్ఖుమాసజ్జ, కణ్హ దుక్ఖం నిగచ్ఛసి.
౧౨౧౩. ‘‘న వే అగ్గి చేతయతి, అహం బాలం డహామీతి;
బాలోవ జలితం అగ్గిం, ఆసజ్జ నం పడయ్హతి.
౧౨౧౪. ‘‘ఏవమేవ తువం మార, ఆసజ్జ నం తథాగతం;
సయం డహిస్ససి అత్తానం, బాలో అగ్గింవ సమ్ఫుసం.
౧౨౧౫. ‘‘అపుఞ్ఞం పసవీ మారో, ఆసజ్జ నం తథాగతం;
కిం ను మఞ్ఞసి పాపిమ, న మే పాపం విపచ్చతి.
౧౨౧౬. ‘‘కరతో తే చీయతే [మియ్యతే (సబ్బత్థ) మ. ని. ౧.౫౧౩ పస్సితబ్బం] పాపం, చిరరత్తాయ అన్తక;
మార నిబ్బిన్ద బుద్ధమ్హా, ఆసం మాకాసి భిక్ఖుసు.
౧౨౧౭. ‘‘ఇతి మారం అతజ్జేసి, భిక్ఖు భేసకళావనే;
తతో సో దుమ్మనో యక్ఖో, తత్థేవన్తరధాయథా’’తి.
ఇత్థం సుదం ఆయస్మా మహామోగ్గల్లానో [మహామోగ్గలానో (క.)] థేరో గాథాయో అభాసిత్థాతి.
సట్ఠినిపాతో నిట్ఠితో.