౧. పఠమవగ్గో

౧. ఉత్తరత్థేరగాథా

౧౨౧. ‘‘నత్థి కోచి భవో నిచ్చో, సఙ్ఖారా వాపి సస్సతా;

ఉప్పజ్జన్తి చ తే ఖన్ధా, చవన్తి అపరాపరం.

౧౨౨. ‘‘ఏతమాదీనం ఞత్వా, భవేనమ్హి అనత్థికో;

నిస్సటో సబ్బకామేహి, పత్తో మే ఆసవక్ఖయో’’తి.

ఇత్థం సుదం ఆయస్మా ఉత్తరో థేరో గాథాయో అభాసిత్థాతి.

౨. పిణ్డోలభారద్వాజత్థేరగాథా

౧౨౩. ‘‘నయిదం అనయేన జీవితం, నాహారో హదయస్స సన్తికో;

ఆహారట్ఠితికో సముస్సయో, ఇతి దిస్వాన చరామి ఏసనం.

౧౨౪. ‘‘పఙ్కోతి హి నం పవేదయుం, యాయం వన్దనపూజనా కులేసు;

సుఖుమం సల్లం దురుబ్బహం, సక్కారో కాపురిసేన దుజ్జహో’’తి.

ఇత్థం సుదం ఆయస్మా పిణ్డోలభారద్వాజో థేరో గాథాయో అభాసిత్థాతి.

౩. వల్లియత్థేరగాథా

౧౨౫. ‘‘మక్కటో పఞ్చద్వారాయం, కుటికాయం పసక్కియ;

ద్వారేన అనుపరియేతి, ఘట్టయన్తో ముహుం ముహుం.

౧౨౬. ‘‘తిట్ఠ మక్కట మా ధావి, న హి తే తం యథా పురే;

నిగ్గహీతోసి పఞ్ఞాయ, నేవ దూరం గమిస్సతీ’’తి.

… వల్లియో థేరో….

౪. గఙ్గాతీరియత్థేరగాథా

౧౨౭. ‘‘తిణ్ణం మే తాలపత్తానం, గఙ్గాతీరే కుటీ కతా;

ఛవసిత్తోవ మే పత్తో, పంసుకూలఞ్చ చీవరం.

౧౨౮. ‘‘ద్విన్నం అన్తరవస్సానం, ఏకా వాచా మే భాసితా;

తతియే అన్తరవస్సమ్హి, తమోఖన్ధో [తమోక్ఖన్ధో (సీ. స్యా.)] పదాలితో’’తి.

… గఙ్గాతీరియో థేరో….

౫. అజినత్థేరగాథా

౧౨౯. ‘‘అపి చే హోతి తేవిజ్జో, మచ్చుహాయీ అనాసవో;

అప్పఞ్ఞాతోతి నం బాలా, అవజానన్తి అజానతా.

౧౩౦. ‘‘యో చ ఖో అన్నపానస్స, లాభీ హోతీధ పుగ్గలో;

పాపధమ్మోపి చే హోతి, సో నేసం హోతి సక్కతో’’తి.

… అజినో థేరో….

౬. మేళజినత్థేరగాథా

౧౩౧. ‘‘యదాహం ధమ్మమస్సోసిం, భాసమానస్స సత్థునో;

న కఙ్ఖమభిజానామి, సబ్బఞ్ఞూఅపరాజితే.

౧౩౨. ‘‘సత్థవాహే మహావీరే, సారథీనం వరుత్తమే;

మగ్గే పటిపదాయం వా, కఙ్ఖా మయ్హం న విజ్జతీ’’తి.

… మేళజినో థేరో….

౭. రాధత్థేరగాథా

౧౩౩. [ధ. ప. ౧౩ ధమ్మపదే] ‘‘యథా అగారం దుచ్ఛన్నం, వుట్ఠీ సమతివిజ్ఝతి;

ఏవం అభావితం చిత్తం, రాగో సమతివిజ్ఝతి.

౧౩౪. [ధ. ప. ౧౪ ధమ్మపదే] ‘‘యథా అగారం సుచ్ఛన్నం, వుడ్ఢీ న సమతివిజ్ఝతి;

ఏవం సుభావితం చిత్తం, రాగో న సమతివిజ్ఝతీ’’తి.

… రాధో థేరో….

౮. సురాధత్థేరగాథా

౧౩౫. ‘‘ఖీణా హి మయ్హం జాతి, వుసితం జినసాసనం;

పహీనో జాలసఙ్ఖాతో, భవనేత్తి సమూహతా.

౧౩౬. ‘‘యస్సత్థాయ పబ్బజితో, అగారస్మానగారియం;

సో మే అత్థో అనుప్పత్తో, సబ్బసంయోజనక్ఖయో’’తి.

… సురాధో థేరో….

౯. గోతమత్థేరగాథా

౧౩౭. ‘‘సుఖం సుపన్తి మునయో, యే ఇత్థీసు న బజ్ఝరే;

సదా వే రక్ఖితబ్బాసు, యాసు సచ్చం సుదుల్లభం.

౧౩౮. ‘‘వధం చరిమ్హ తే కామ, అనణా దాని తే మయం;

గచ్ఛామ దాని నిబ్బానం, యత్థ గన్త్వా న సోచతీ’’తి.

… గోతమో థేరో….

౧౦. వసభత్థేరగాథా

౧౩౯. ‘‘పుబ్బే హనతి అత్తానం, పచ్ఛా హనతి సో పరే;

సుహతం హన్తి అత్తానం, వీతంసేనేవ పక్ఖిమా.

౧౪౦. ‘‘న బ్రాహ్మణో బహివణ్ణో, అన్తో వణ్ణో హి బ్రాహ్మణో;

యస్మిం పాపాని కమ్మాని, స వే కణ్హో సుజమ్పతీ’’తి.

… వసభో థేరో….

వగ్గో పఠమో నిట్ఠితో.

తస్సుద్దానం –

ఉత్తరో చేవ పిణ్డోలో, వల్లియో తీరియో ఇసి;

అజినో చ మేళజినో, రాధో సురాధో గోతమో;

వసభేన ఇమే హోన్తి, దస థేరా మహిద్ధికాతి.