౬. సేలత్థేరగాథా

౮౧౮. ‘‘పరిపుణ్ణకాయో సురుచి, సుజాతో చారుదస్సనో;

సువణ్ణవణ్ణోసి భగవా, సుసుక్కదాఠోసి వీరియవా [సుసుక్కదాఠో విరీయవా (సీ.)].

౮౧౯. ‘‘నరస్స హి సుజాతస్స, యే భవన్తి వియఞ్జనా;

సబ్బే తే తవ కాయస్మిం, మహాపురిసలక్ఖణా.

౮౨౦. ‘‘పసన్ననేత్తో సుముఖో, బ్రహా ఉజు పతాపవా;

మజ్ఝే సమణసఙ్ఘస్స, ఆదిచ్చోవ విరోచసి.

౮౨౧. ‘‘కల్యాణదస్సనో భిక్ఖు, కఞ్చనసన్నిభత్తచో;

కిం తే సమణభావేన, ఏవం ఉత్తమవణ్ణినో.

౮౨౨. ‘‘రాజా అరహసి భవితుం, చక్కవత్తీ రథేసభో;

చాతురన్తో విజితావీ, జమ్బుసణ్డస్స [జమ్బుమణ్డస్స (క.)] ఇస్సరో.

౮౨౩. ‘‘ఖత్తియా భోగీ రాజానో [భోగా రాజానో (సీ. క.), భోజరాజానో (స్యా.)], అనుయన్తా భవన్తి తే;

రాజాభిరాజా [రాజాధిరాజా (సీ. క.)] మనుజిన్దో, రజ్జం కారేహి గోతమ’’.

౮౨౪. ‘‘రాజాహమస్మి సేల, (సేలాతి భగవా) ధమ్మరాజా అనుత్తరో;

ధమ్మేన చక్కం వత్తేమి, చక్కం అప్పటివత్తియం’’.

౮౨౫. ‘‘సమ్బుద్ధో పటిజానాసి, (ఇతి సేలో బ్రాహ్మణో) ధమ్మరాజా అనుత్తరో;

‘ధమ్మేన చక్కం వత్తేమి’, ఇతి భాసథ గోతమ.

౮౨౬. ‘‘కో ను సేనాపతి భోతో, సావకో సత్థురన్వయో [అన్వయో (సీ.)];

కో తేతమనువత్తేతి, ధమ్మచక్కం పవత్తితం’’.

౮౨౭. ‘‘మయా పవత్తితం చక్కం, (సేలాతి భగవా) ధమ్మచక్కం అనుత్తరం;

సారిపుత్తో అనువత్తేతి, అనుజాతో తథాగతం.

౮౨౮. ‘‘అభిఞ్ఞేయ్యం అభిఞ్ఞాతం, భావేతబ్బఞ్చ భావితం;

పహాతబ్బం పహీనం మే, తస్మా బుద్ధోస్మి బ్రాహ్మణ.

౮౨౯. ‘‘వినయస్సు మయి కఙ్ఖం, అధిముఞ్చస్సు బ్రాహ్మణ;

దుల్లభం దస్సనం హోతి, సమ్బుద్ధానం అభిణ్హసో.

౮౩౦. ‘‘యేసం వే దుల్లభో లోకే, పాతుభావో అభిణ్హసో;

సోహం బ్రాహ్మణ బుద్ధోస్మి, సల్లకత్తో [సల్లకన్తో (సీ.)] అనుత్తరో.

౮౩౧. ‘‘బ్రహ్మభూతో అతితులో, మారసేనప్పమద్దనో;

సబ్బామిత్తే వసే [వసీ (స్యా. క., మ. ని. ౨.౩౯౯; సు. ని. ౯౬౬)] కత్వా, మోదామి అకుతోభయో’’.

౮౩౨. ‘‘ఇదం భోన్తో నిసామేథ, యథా భాసతి చక్ఖుమా;

సల్లకత్తో మహావీరో, సీహోవ నదతీ వనే.

౮౩౩. ‘‘బ్రహ్మభూతం అతితులం, మారసేనప్పమద్దనం;

కో దిస్వా నప్పసీదేయ్య, అపి కణ్హాభిజాతికో.

౮౩౪. ‘‘యో మం ఇచ్ఛతి అన్వేతు, యో వా నిచ్ఛతి గచ్ఛతు;

ఇధాహం పబ్బజిస్సామి, వరపఞ్ఞస్స సన్తికే’’.

౮౩౫. ‘‘ఏతం చే రుచ్చతి భోతో, సమ్మాసమ్బుద్ధసాసనం;

మయమ్పి పబ్బజిస్సామ, వరపఞ్ఞస్స సన్తికే.

౮౩౬. ‘‘బ్రాహ్మణా తిసతా ఇమే, యాచన్తి పఞ్జలీకతా;

‘బ్రహ్మచరియం చరిస్సామ, భగవా తవ సన్తికే’’’.

౮౩౭. ‘‘స్వాఖాతం బ్రహ్మచరియం, (సేలాతి భగవా) సన్దిట్ఠికమకాలికం;

యత్థ అమోఘా పబ్బజ్జా, అప్పమత్తస్స సిక్ఖతో’’.

౮౩౮. ‘‘యం తం సరణమాగమ్హ [సరణమాగమ్మ (సబ్బత్థ)], ఇతో అట్ఠమే [అట్ఠమి (స్యా. క.)] చక్ఖుమ;

సత్తరత్తేన భగవా, దన్తామ్హ తవ సాసనే.

౮౩౯. ‘‘తువం బుద్ధో తువం సత్థా, తువం మారాభిభూ ముని;

తువం అనుసయే ఛేత్వా, తిణ్ణో తారేసిమం పజం.

౮౪౦. ‘‘ఉపధీ తే సమతిక్కన్తా, ఆసవా తే పదాలితా;

సీహోవ అనుపాదానో, పహీనభయభేరవో.

౮౪౧. ‘‘భిక్ఖవో తిసతా ఇమే, తిట్ఠన్తి పఞ్జలీకతా;

పాదే వీర పసారేహి, నాగా వన్దన్తు సత్థునో’’తి.

… సేలో థేరో….