౧. సోణకోళివిసత్థేరగాథా

౬౩౨. ‘‘యాహు రట్ఠే సముక్కట్ఠో, రఞ్ఞో అఙ్గస్స పద్ధగూ [పత్థగూ (స్యా.), పట్ఠగూ (క.)];

స్వాజ్జ ధమ్మేసు ఉక్కట్ఠో, సోణో దుక్ఖస్స పారగూ.

౬౩౩. ‘‘పఞ్చ ఛిన్దే పఞ్చ జహే, పఞ్చ చుత్తరి భావయే;

పఞ్చసఙ్గాతిగో భిక్ఖు, ఓఘతిణ్ణోతి వుచ్చతి.

౬౩౪. ‘‘ఉన్నళస్స పమత్తస్స, బాహిరాసస్స [బాహిరాసయస్స (క.)] భిక్ఖునో;

సీలం సమాధి పఞ్ఞా చ, పారిపూరిం న గచ్ఛతి.

౬౩౫. ‘‘యఞ్హి కిచ్చం అపవిద్ధం [తదపవిద్ధం (సీ. స్యా.)], అకిచ్చం పన కరీయతి;

ఉన్నళానం పమత్తానం, తేసం వడ్ఢన్తి ఆసవా.

౬౩౬. ‘‘యేసఞ్చ సుసమారద్ధా, నిచ్చం కాయగతా సతి;

అకిచ్చం తే న సేవన్తి, కిచ్చే సాతచ్చకారినో;

సతానం సమ్పజానానం, అత్థం గచ్ఛన్తి ఆసవా.

౬౩౭. ‘‘ఉజుమగ్గమ్హి అక్ఖాతే, గచ్ఛథ మా నివత్తథ;

అత్తనా చోదయత్తానం, నిబ్బానమభిహారయే.

౬౩౮. ‘‘అచ్చారద్ధమ్హి వీరియమ్హి, సత్థా లోకే అనుత్తరో;

వీణోపమం కరిత్వా మే, ధమ్మం దేసేసి చక్ఖుమా;

తస్సాహం వచనం సుత్వా, విహాసిం సాసనే రతో.

౬౩౯. ‘‘సమథం పటిపాదేసిం, ఉత్తమత్థస్స పత్తియా;

తిస్సో విజ్జా అనుప్పత్తా, కతం బుద్ధస్స సాసనం.

౬౪౦. ‘‘నేక్ఖమ్మే [నిక్ఖమే (క.), నేక్ఖమ్మం (మహావ. ౨౪౪; అ. ని. ౬.౫౫)] అధిముత్తస్స, పవివేకఞ్చ చేతసో;

అబ్యాపజ్ఝాధిముత్తస్స [అబ్యాపజ్ఝాధిమ్హత్తస్స (క.)], ఉపాదానక్ఖయస్స చ.

౬౪౧. ‘‘తణ్హక్ఖయాధిముత్తస్స, అసమ్మోహఞ్చ చేతసో;

దిస్వా ఆయతనుప్పాదం, సమ్మా చిత్తం విముచ్చతి.

౬౪౨. ‘‘తస్స సమ్మా విముత్తస్స, సన్తచిత్తస్స భిక్ఖునో;

కతస్స పటిచయో నత్థి, కరణీయం న విజ్జతి.

౬౪౩. ‘‘సేలో యథా ఏకఘనో [ఏకఘనో (క.)], వాతేన న సమీరతి;

ఏవం రూపా రసా సద్దా, గన్ధా ఫస్సా చ కేవలా.

౬౪౪. ‘‘ఇట్ఠా ధమ్మా అనిట్ఠా చ, నప్పవేధేన్తి తాదినో;

ఠితం చిత్తం విసఞ్ఞుత్తం, వయఞ్చస్సానుపస్సతీ’’తి.

… సోణో కోళివిసో థేరో….

తేరసనిపాతో నిట్ఠితో.