౧౪. చుద్దసకనిపాతో

౧. ఖదిరవనియరేవతత్థేరగాథా

౬౪౫. ‘‘యదా అహం పబ్బజితో, అగారస్మానగారియం;

నాభిజానామి సఙ్కప్పం, అనరియం దోససంహితం.

౬౪౬. ‘‘‘ఇమే హఞ్ఞన్తు వజ్ఝన్తు, దుక్ఖం పప్పోన్తు పాణినో’;

సఙ్కప్పం నాభిజానామి, ఇమస్మిం దీఘమన్తరే.

౬౪౭. ‘‘మేత్తఞ్చ అభిజానామి, అప్పమాణం సుభావితం;

అనుపుబ్బం పరిచితం, యథా బుద్ధేన దేసితం.

౬౪౮. ‘‘సబ్బమిత్తో సబ్బసఖో, సబ్బభూతానుకమ్పకో;

మేత్తచిత్తఞ్చ [మేత్తం చిత్తం (సీ. స్యా.)] భావేమి, అబ్యాపజ్జరతో [అబ్యాపజ్ఝరతో (సీ. స్యా.)] సదా.

౬౪౯. ‘‘అసంహీరం అసంకుప్పం, చిత్తం ఆమోదయామహం;

బ్రహ్మవిహారం భావేమి, అకాపురిససేవితం.

౬౫౦. ‘‘అవితక్కం సమాపన్నో, సమ్మాసమ్బుద్ధసావకో;

అరియేన తుణ్హీభావేన, ఉపేతో హోతి తావదే.

౬౫౧. ‘‘యథాపి పబ్బతో సేలో, అచలో సుప్పతిట్ఠితో;

ఏవం మోహక్ఖయా భిక్ఖు, పబ్బతోవ న వేధతి.

౬౫౨. ‘‘అనఙ్గణస్స పోసస్స, నిచ్చం సుచిగవేసినో;

వాలగ్గమత్తం పాపస్స, అబ్భమత్తంవ ఖాయతి.

౬౫౩. ‘‘నగరం యథా పచ్చన్తం, గుత్తం సన్తరబాహిరం;

ఏవం గోపేథ అత్తానం, ఖణో వో మా ఉపచ్చగా.

౬౫౪. ‘‘నాభినన్దామి మరణం, నాభినన్దామి జీవితం;

కాలఞ్చ పటికఙ్ఖామి, నిబ్బిసం భతకో యథా.

౬౫౫. ‘‘నాభినన్దామి మరణం…పే… సమ్పజానో పతిస్సతో.

౬౫౬. ‘‘పరిచిణ్ణో మయా సత్థా, కతం బుద్ధస్స సాసనం;

ఓహితో గరుకో భారో, భవనేత్తి సమూహతా.

౬౫౭. ‘‘యస్స చత్థాయ పబ్బజితో, అగారస్మానగారియం;

సో మే అత్థో అనుప్పత్తో, సబ్బసంయోజనక్ఖయో.

౬౫౮. ‘‘సమ్పాదేథప్పమాదేన, ఏసా మే అనుసాసనీ;

హన్దాహం పరినిబ్బిస్సం, విప్పముత్తోమ్హి సబ్బధీ’’తి.

… ఖదిరవనియరేవతో థేరో….

౨. గోదత్తత్థేరగాథా

౬౫౯. ‘‘యథాపి భద్దో ఆజఞ్ఞో, ధురే యుత్తో ధురస్సహో [ధురాసహో (అట్ఠ.)];

మథితో అతిభారేన, సంయుగం నాతివత్తతి.

౬౬౦. ‘‘ఏవం పఞ్ఞాయ యే తిత్తా, సముద్దో వారినా యథా;

న పరే అతిమఞ్ఞన్తి, అరియధమ్మోవ పాణినం.

౬౬౧. ‘‘కాలే కాలవసం పత్తా, భవాభవవసం గతా;

నరా దుక్ఖం నిగచ్ఛన్తి, తేధ సోచన్తి మాణవా [మానవా (సీ.)].

౬౬౨. ‘‘ఉన్నతా సుఖధమ్మేన, దుక్ఖధమ్మేన చోనతా;

ద్వయేన బాలా హఞ్ఞన్తి, యథాభూతం అదస్సినో.

౬౬౩. ‘‘యే చ దుక్ఖే సుఖస్మిఞ్చ, మజ్ఝే సిబ్బినిమచ్చగూ;

ఠితా తే ఇన్దఖీలోవ, న తే ఉన్నతఓనతా.

౬౬౪. ‘‘న హేవ లాభే నాలాభే, న యసే న చ కిత్తియా;

న నిన్దాయం పసంసాయ, న తే దుక్ఖే సుఖమ్హి.

౬౬౫. ‘‘సబ్బత్థ తే న లిమ్పన్తి, ఉదబిన్దువ పోక్ఖరే;

సబ్బత్థ సుఖితా ధీరా, సబ్బత్థ అపరాజితా.

౬౬౬. ‘‘ధమ్మేన చ అలాభో యో, యో చ లాభో అధమ్మికో;

అలాభో ధమ్మికో సేయ్యో, యం చే లాభో అధమ్మికో.

౬౬౭. ‘‘యసో చ అప్పబుద్ధీనం, విఞ్ఞూనం అయసో చ యో;

అయసోవ సేయ్యో విఞ్ఞూనం, న యసో అప్పబుద్ధినం.

౬౬౮. ‘‘దుమ్మేధేహి పసంసా చ, విఞ్ఞూహి గరహా చ యా;

గరహావ సేయ్యో విఞ్ఞూహి, యం చే బాలప్పసంసనా.

౬౬౯. ‘‘సుఖఞ్చ కామమయికం, దుక్ఖఞ్చ పవివేకియం;

పవివేకదుక్ఖం సేయ్యో, యం చే కామమయం సుఖం.

౬౭౦. ‘‘జీవితఞ్చ అధమ్మేన, ధమ్మేన మరణఞ్చ యం;

మరణం ధమ్మికం సేయ్యో, యం చే జీవే అధమ్మికం.

౬౭౧. ‘‘కామకోపప్పహీనా యే, సన్తచిత్తా భవాభవే;

చరన్తి లోకే అసితా, నత్థి తేసం పియాపియం.

౬౭౨. ‘‘భావయిత్వాన బోజ్ఝఙ్గే, ఇన్ద్రియాని బలాని చ;

పప్పుయ్య పరమం సన్తిం, పరినిబ్బన్తినాసవా’’తి.

… గోదత్తో థేరో….

చుద్దసకనిపాతో నిట్ఠితో.