౩. నన్దకపేతవత్థు

౬౫౮. రాజా పిఙ్గలకో నామ, సురట్ఠానం అధిపతి అహు;

మోరియానం ఉపట్ఠానం గన్త్వా, సురట్ఠం పునరాగమా.

౬౫౯. ఉణ్హే మజ్ఝన్హికే [మజ్ఝన్తికే (సబ్బత్థ)] కాలే, రాజా పఙ్కం [వఙ్కం (క.)] ఉపాగమి;

అద్దస మగ్గం రమణీయం, పేతానం తం వణ్ణుపథం [వణ్ణనాపథం (సీ. స్యా.)].

౬౬౦. సారథిం ఆమన్తయీ రాజా –

‘‘అయం మగ్గో రమణీయో, ఖేమో సోవత్థికో సివో;

ఇమినా సారథి యామ, సురట్ఠానం సన్తికే ఇతో’’.

౬౬౧. తేన పాయాసి సోరట్ఠో, సేనాయ చతురఙ్గినియా;

ఉబ్బిగ్గరూపో పురిసో, సోరట్ఠం ఏతదబ్రవి.

౬౬౨. ‘‘కుమ్మగ్గం పటిపన్నమ్హా, భింసనం లోమహంసనం;

పురతో దిస్సతి మగ్గో, పచ్ఛతో చ న దిస్సతి.

౬౬౩. ‘‘కుమ్మగ్గం పటిపన్నమ్హా, యమపురిసాన సన్తికే;

అమానుసో వాయతి గన్ధో, ఘోసో సుయ్యతి [సూయతి (సీ. స్యా.)] దారుణో’’.

౬౬౪. సంవిగ్గో రాజా సోరట్ఠో, సారథిం ఏతదబ్రవి;

‘‘కుమ్మగ్గం పటిపన్నమ్హా, భింసనం లోమహంసనం;

పురతో దిస్సతి మగ్గో, పచ్ఛతో చ న దిస్సతి.

౬౬౫. ‘‘కుమ్మగ్గం పటిపన్నమ్హా, యమపురిసాన సన్తికే;

అమానుసో వాయతి గన్ధో, ఘోసో సుయ్యతి దారుణో’’.

౬౬౬. హత్థిక్ఖన్ధం సమారుయ్హ, ఓలోకేన్తో చతుద్దిసం [చతుద్దిస్సా (క.)];

అద్దస నిగ్రోధం రమణీయం [రుక్ఖం నిగ్రోధం (స్యా. క.)], పాదపం ఛాయాసమ్పన్నం;

నీలబ్భవణ్ణసదిసం, మేఘవణ్ణసిరీనిభం.

౬౬౭. సారథిం ఆమన్తయీ రాజా, ‘‘కిం ఏసో దిస్సతి బ్రహా;

నీలబ్భవణ్ణసదిసో, మేఘవణ్ణసిరీనిభో’’.

౬౬౮. ‘‘నిగ్రోధో సో మహారాజ, పాదపో ఛాయాసమ్పన్నో;

నీలబ్భవణ్ణసదిసో, మేఘవణ్ణసిరీనిభో’’.

౬౬౯. తేన పాయాసి సోరట్ఠో, యేన సో దిస్సతే బ్రహా;

నీలబ్భవణ్ణసదిసో, మేఘవణ్ణసిరీనిభో.

౬౭౦. హత్థిక్ఖన్ధతో ఓరుయ్హ, రాజా రుక్ఖం ఉపాగమి;

నిసీది రుక్ఖమూలస్మిం, సామచ్చో సపరిజ్జనో;

పూరం పానీయసరకం, పూవే విత్తే చ అద్దస.

౬౭౧. పురిసో చ దేవవణ్ణీ, సబ్బాభరణభూసితో;

ఉపసఙ్కమిత్వా రాజానం, సోరట్ఠం ఏతదబ్రవి.

౬౭౨. ‘‘స్వాగతం తే మహారాజ, అథో తే అదురాగతం;

పివతు దేవో పానీయం, పూవే ఖాద అరిన్దమ’’.

౬౭౩. పివిత్వా రాజా పానీయం, సామచ్చో సపరిజ్జనో;

పూవే ఖాదిత్వా పిత్వా చ, సోరట్ఠో ఏతదబ్రవి.

౬౭౪. ‘‘దేవతా నుసి గన్ధబ్బో, అదు సక్కో పురిన్దదో;

అజానన్తా తం పుచ్ఛామ, కథం జానేము తం మయ’’న్తి.

౬౭౫. ‘‘నామ్హి దేవో న గన్ధబ్బో, నాపి [నమ్హి (క.)] సక్కో పురిన్దదో;

పేతో అహం మహారాజ, సురట్ఠా ఇధ మాగతో’’తి.

౬౭౬. ‘‘కింసీలో కింసమాచారో, సురట్ఠస్మిం పురే తువం;

కేన తే బ్రహ్మచరియేన, ఆనుభావో అయం తవా’’తి.

౬౭౭. ‘‘తం సుణోహి మహారాజ, అరిన్దమ రట్ఠవడ్ఢన;

అమచ్చా పారిసజ్జా చ, బ్రాహ్మణో చ పురోహితో.

౬౭౮. ‘‘సురట్ఠస్మిం అహం దేవ, పురిసో పాపచేతసో;

మిచ్ఛాదిట్ఠి చ దుస్సీలో, కదరియో పరిభాసకో.

౬౭౯. ‘‘‘దదన్తానం కరోన్తానం, వారయిస్సం బహుజ్జనం;

అఞ్ఞేసం దదమానానం, అన్తరాయకరో అహం.

౬౮౦. ‘‘‘విపాకో నత్థి దానస్స, సంయమస్స కుతో ఫలం;

నత్థి ఆచరియో నామ, అదన్తం కో దమేస్సతి.

౬౮౧. ‘‘‘సమతుల్యాని భూతాని, కుతో [కులే (స్యా. క.)] జేట్ఠాపచాయికో;

నత్థి బలం వీరియం వా, కుతో ఉట్ఠానపోరిసం.

౬౮౨. ‘‘‘నత్థి దానఫలం నామ, న విసోధేతి వేరినం;

లద్ధేయ్యం లభతే మచ్చో, నియతిపరిణామజం [పరిణామజా (సీ. క.)].

౬౮౩. ‘‘‘నత్థి మాతా పితా భాతా, లోకో నత్థి ఇతో పరం;

నత్థి దిన్నం నత్థి హుతం, సునిహితం న విజ్జతి.

౬౮౪. ‘‘‘యోపి హనేయ్య పురిసం, పరస్స ఛిన్దతే [పురిసస్స ఛిన్దే (స్యా. క.)] సిరం;

న కోచి కఞ్చి హనతి, సత్తన్నం వివరమన్తరే.

౬౮౫. ‘‘‘అచ్ఛేజ్జాభేజ్జో హి [భేజ్జో (సీ.), అభేజ్జో (స్యా.), భేజ్జాసి (క.)] జీవో, అట్ఠంసో గుళపరిమణ్డలో;

యోజనానం సతం పఞ్చ, కో జీవం ఛేత్తుమరహతి.

౬౮౬. ‘‘‘యథా సుత్తగుళే ఖిత్తే, నిబ్బేఠేన్తం పలాయతి;

ఏవమేవ చ సో జీవో, నిబ్బేఠేన్తో పలాయతి.

౬౮౭. ‘‘‘యథా గామతో నిక్ఖమ్మ, అఞ్ఞం గామం పవిసతి;

ఏవమేవ చ సో జీవో, అఞ్ఞం బోన్దిం పవిసతి.

౬౮౮. ‘‘‘యథా గేహతో నిక్ఖమ్మ, అఞ్ఞం గేహం పవిసతి;

ఏవమేవ చ సో జీవో, అఞ్ఞం బోన్దిం పవిసతి.

౬౮౯. ‘‘‘చుల్లాసీతి [చుళాసీతి (సీ. స్యా. క.)] మహాకప్పినో [మహాకప్పునో (సీ.)], సతసహస్సాని హి;

యే బాలా యే చ పణ్డితా, సంసారం ఖేపయిత్వాన;

దుక్ఖస్సన్తం కరిస్సరే.

౬౯౦. ‘‘‘మితాని సుఖదుక్ఖాని, దోణేహి పిటకేహి చ;

జినో సబ్బం పజానాతి’, సమ్మూళ్హా ఇతరా పజా.

౬౯౧. ‘‘ఏవందిట్ఠి పురే ఆసిం, సమ్మూళ్హో మోహపారుతో;

మిచ్ఛాదిట్ఠి చ దుస్సీలో, కదరియో పరిభాసకో.

౬౯౨. ‘‘ఓరం మే ఛహి మాసేహి, కాలఙ్కిరియా భవిస్సతి;

ఏకన్తకటుకం ఘోరం, నిరయం పపతిస్సహం.

౬౯౩. [పే. వ. ౭౦] ‘‘చతుక్కణ్ణం చతుద్వారం, విభత్తం భాగసో మితం;

అయోపాకారపరియన్తం, అయసా పటికుజ్జితం.

౬౯౪. [పే. వ. ౭౧] ‘‘తస్స అయోమయా భూమి, జలితా తేజసా యుతా;

సమన్తా యోజనసతం, ఫరిత్వా తిట్ఠతి సబ్బదా.

౬౯౫. ‘‘వస్సాని సతసహస్సాని, ఘోసో సుయ్యతి తావదే;

లక్ఖో ఏసో మహారాజ, సతభాగవస్సకోటియో.

౬౯౬. ‘‘కోటిసతసహస్సాని, నిరయే పచ్చరే జనా;

మిచ్ఛాదిట్ఠీ చ దుస్సీలా, యే చ అరియూపవాదినో.

౬౯౭. ‘‘తత్థాహం దీఘమద్ధానం, దుక్ఖం వేదిస్స వేదనం;

ఫలం పాపస్స కమ్మస్స, తస్మా సోచామహం భుసం.

౬౯౮. ‘‘తం సుణోహి మహారాజ, అరిన్దమ రట్ఠవడ్ఢన;

ధీతా మయ్హం మహారాజ, ఉత్తరా భద్దమత్థు తే.

౬౯౯. ‘‘కరోతి భద్దకం కమ్మం, సీలేసుపోసథే రతా;

సఞ్ఞతా సంవిభాగీ చ, వదఞ్ఞూ వీతమచ్ఛరా.

౭౦౦. ‘‘అఖణ్డకారీ సిక్ఖాయ, సుణ్హా పరకులేసు చ;

ఉపాసికా సక్యమునినో, సమ్బుద్ధస్స సిరీమతో.

౭౦౧. ‘‘భిక్ఖు చ సీలసమ్పన్నో, గామం పిణ్డాయ పావిసి;

ఓక్ఖిత్తచక్ఖు సతిమా, గుత్తద్వారో సుసంవుతో.

౭౦౨. ‘‘సపదానం చరమానో, అగమా తం నివేసనం;

‘తమద్దస మహారాజ, ఉత్తరా భద్దమత్థు తే’.

౭౦౩. ‘‘పూరం పానీయసరకం, పూవే విత్తే చ సా అదా;

‘పితా మే కాలఙ్కతో, భన్తే తస్సేతం ఉపకప్పతు’.

౭౦౪. ‘‘సమనన్తరానుద్దిట్ఠే, విపాకో ఉదపజ్జథ;

భుఞ్జామి కామకామీహం, రాజా వేస్సవణో యథా.

౭౦౫. ‘‘తం సుణోహి మహారాజ, అరిన్దమ రట్ఠవడ్ఢన;

సదేవకస్స లోకస్స, బుద్ధో అగ్గో పవుచ్చతి;

తం బుద్ధం సరణం గచ్ఛ, సపుత్తదారో అరిన్దమ.

౭౦౬. ‘‘అట్ఠఙ్గికేన మగ్గేన, ఫుసన్తి అమతం పదం;

తం ధమ్మం సరణం గచ్ఛ, సపుత్తదారో అరిన్దమ.

౭౦౭. ‘‘చత్తారో చ పటిపన్నా [మగ్గపటిపన్నా (సీ. స్యా.)], చత్తారో చ ఫలే ఠితా;

ఏస సఙ్ఘో ఉజుభూతో, పఞ్ఞాసీలసమాహితో;

తం సఙ్ఘం సరణం గచ్ఛ, సపుత్తదారో అరిన్దమ.

౭౦౮. ‘‘పాణాతిపాతా విరమస్సు ఖిప్పం, లోకే అదిన్నం పరివజ్జయస్సు;

అమజ్జపో మా చ ముసా అభాణీ, సకేన దారేన చ హోహి తుట్ఠో’’తి.

౭౦౯. ‘‘అత్థకామోసి మే యక్ఖ, హితకామోసి దేవతే;

కరోమి తుయ్హం వచనం, త్వంసి ఆచరియో మమ.

౭౧౦. ‘‘ఉపేమి సరణం బుద్ధం, ధమ్మఞ్చాపి అనుత్తరం;

సఙ్ఘఞ్చ నరదేవస్స, గచ్ఛామి సరణం అహం.

౭౧౧. ‘‘పాణాతిపాతా విరమామి ఖిప్పం, లోకే అదిన్నం పరివజ్జయామి;

అమజ్జపో నో చ ముసా భణామి, సకేన దారేన చ హోమి తుట్ఠో.

౭౧౨. ‘‘ఓఫుణామి [ఓపుణామి (సీ.), ఓఫునామి (స్యా. క.), ఓపునామి (?)] మహావాతే, నదియా సీఘగామియా;

వమామి పాపికం దిట్ఠిం, బుద్ధానం సాసనే రతో’’.

౭౧౩. ఇదం వత్వాన సోరట్ఠో, విరమిత్వా పాపదస్సనా [పాపదస్సనం (స్యా. క.)];

నమో భగవతో కత్వా, పామోక్ఖో రథమారుహీతి.

నన్దకపేతవత్థు తతియం.