౧౫. సేట్ఠిపుత్తపేతవత్థు

౮౦౨. [జా. ౧.౪.౫౪ జాతకేపి] ‘‘సట్ఠివస్ససహస్సాని, పరిపుణ్ణాని సబ్బసో;

నిరయే పచ్చమానానం, కదా అన్తో భవిస్సతి’’.

౮౦౩. [జా. ౧.౪.౫౫ జాతకేపి] ‘‘నత్థి అన్తో కుతో అన్తో, న అన్తో పటిదిస్సతి;

తథా హి పకతం పాపం, తుయ్హం మయ్హఞ్చ మారిసా [మమ తుయ్హఞ్చ మారిస (సీ. స్యా. పీ.)].

౮౦౪. [జా. ౧.౪.౫౩ జాతకేపి] ‘‘దుజ్జీవితమజీవమ్హ, యే సన్తే న దదమ్హసే;

సన్తేసు దేయ్యధమ్మేసు, దీపం నాకమ్హ అత్తనో.

౮౦౫. [జా. ౧.౪.౫౬ జాతకేపి] ‘‘సోహం నూన ఇతో గన్త్వా, యోనిం లద్ధాన మానుసిం;

వదఞ్ఞూ సీలసమ్పన్నో, కాహామి కుసలం బహు’’న్తి.

సేట్ఠిపుత్తపేతవత్థు పన్నరసమం.