౧౦. గణపేతవత్థు

౭౮౨. ‘‘నగ్గా దుబ్బణ్ణరూపాత్థ, కిసా ధమనిసన్థతా;

ఉప్ఫాసులికా [ఉప్పాసుళికా (క.)] కిసికా, కే ను తుమ్హేత్థ మారిసా’’తి.

౭౮౩. ‘‘మయం భదన్తే పేతామ్హా, దుగ్గతా యమలోకికా;

పాపకమ్మం కరిత్వాన, పేతలోకం ఇతో గతా’’తి.

౭౮౪. ‘‘కిం ను కాయేన వాచాయ, మనసా దుక్కటం కతం;

కిస్స కమ్మవిపాకేన, పేతలోకం ఇతో గతా’’తి.

౭౮౫. ‘‘అనావటేసు తిత్థేసు, విచినిమ్హద్ధమాసకం;

సన్తేసు దేయ్యధమ్మేసు, దీపం నాకమ్హ అత్తనో.

౭౮౬. ‘‘నదిం ఉపేమ తసితా, రిత్తకా పరివత్తతి;

ఛాయం ఉపేమ ఉణ్హేసు, ఆతపో పరివత్తతి.

౭౮౭. ‘‘అగ్గివణ్ణో చ నో వాతో, డహన్తో ఉపవాయతి;

ఏతఞ్చ భన్తే అరహామ, అఞ్ఞఞ్చ పాపకం తతో.

౭౮౮. ‘‘అపి యోజనాని [అధియోజనాని (సీ. క.)] గచ్ఛామ, ఛాతా ఆహారగేధినో;

అలద్ధావ నివత్తామ, అహో నో అప్పపుఞ్ఞతా.

౭౮౯. ‘‘ఛాతా పముచ్ఛితా భన్తా, భూమియం పటిసుమ్భితా;

ఉత్తానా పటికిరామ, అవకుజ్జా పతామసే.

౭౯౦. ‘‘తే చ తత్థేవ పతితా [తత్థ పపహితా (క.)], భూమియం పటిసుమ్భితా;

ఉరం సీసఞ్చ ఘట్టేమ, అహో నో అప్పపుఞ్ఞతా.

౭౯౧. ‘‘ఏతఞ్చ భన్తే అరహామ, అఞ్ఞఞ్చ పాపకం తతో;

సన్తేసు దేయ్యధమ్మేసు, దీపం నాకమ్హ అత్తనో.

౭౯౨. ‘‘తే హి నూన ఇతో గన్త్వా, యోనిం లద్ధాన మానుసిం;

వదఞ్ఞూ సీలసమ్పన్నా, కాహామ కుసలం బహు’’న్తి.

గణపేతవత్థు దసమం.