౧౧. పఞ్ఞత్తిహారసమ్పాతో

౭౩. తత్థ కతమో పఞ్ఞత్తిహారసమ్పాతో?

‘‘తస్మా రక్ఖితచిత్తస్స, సమ్మాసఙ్కప్పగోచరో’’తి గాథా. ‘‘తస్మా రక్ఖితచిత్తస్సా’’తి పదట్ఠానపఞ్ఞత్తి సతియా. ‘‘సమ్మాసఙ్కప్పగోచరో’’తి భావనాపఞ్ఞత్తి సమథస్స. ‘‘సమ్మాదిట్ఠిపురేక్ఖారో, ఞత్వాన ఉదయబ్బయ’’న్తి దస్సనభూమియా నిక్ఖేపపఞ్ఞత్తి. ‘‘థినమిద్ధాభిభూ భిక్ఖూ’’తి సముదయస్స అనవసేసప్పహానపఞ్ఞత్తి, ‘‘సబ్బా దుగ్గతియో జహే’’తి భావనాపఞ్ఞత్తి మగ్గస్స.

నియుత్తో పఞ్ఞత్తిహారసమ్పాతో.