౪. మేత్తగూమాణవపుచ్ఛా

౭౪. ‘‘పుచ్ఛామి తం భగవా బ్రూహి మేతం, [ఇచ్చాయస్మా మేత్తగూ]

మఞ్ఞామి తం వేదగుం భావితత్తం;

కుతో ను దుక్ఖా సముదాగతా ఇమే, యే కేచి లోకస్మిమనేకరూపా’’.

౭౫. ‘‘దుక్ఖస్స వే మం పభవం అపుచ్ఛసి, [మేత్తగూతి భగవా]

తం తే పవక్ఖామి యథా పజానం;

ఉపధినిదానా పభవన్తి దుక్ఖా, యే కేచి లోకస్మిమనేకరూపా.

౭౬. ‘‘యో వే అవిద్వా ఉపధిం కరోతి, పునప్పునం దుక్ఖముపేతి మన్దో;

తస్మా పజానం ఉపధిం న కయిరా, దుక్ఖస్స జాతిప్పభవానుపస్సీ’’.

౭౭. ‘‘యం తం అపుచ్ఛిమ్హ అకిత్తయీ నో, అఞ్ఞం తం పుచ్ఛామ తదిఙ్ఘ బ్రూహి;

‘కథం ను ధీరా వితరన్తి ఓఘం, జాతిం జరం సోకపరిద్దవఞ్చ’;

తం మే ముని సాధు వియాకరోహి, తథా హి తే విదితో ఏస ధమ్మో’’.

౭౮. ‘‘కిత్తయిస్సామి తే ధమ్మం, [మేత్తగూతి భగవా]

దిట్ఠే ధమ్మే అనీతిహం;

యం విదిత్వా సతో చరం, తరే లోకే విసత్తికం’’.

౭౯. ‘‘తఞ్చాహం అభినన్దామి, మహేసి ధమ్మముత్తమం;

యం విదిత్వా సతో చరం, తరే లోకే విసత్తికం’’.

౮౦. ‘‘యం కిఞ్చి సమ్పజానాసి, [మేత్తగూతి భగవా]

ఉద్ధం అధో తిరియఞ్చాపి మజ్ఝే;

ఏతేసు నన్దిఞ్చ నివేసనఞ్చ, పనుజ్జ విఞ్ఞాణం భవే న తిట్ఠే.

౮౧. ‘‘ఏవంవిహారీ సతో అప్పమత్తో, భిక్ఖు చరం హిత్వా మమాయితాని;

జాతిం జరం సోకపరిద్దవఞ్చ, ఇధేవ విద్వా పజహేయ్య దుక్ఖం’’.

౮౨. ‘‘ఏతాభినన్దామి వచో మహేసినో, సుకిత్తితం గోతమనూపధీకం;

అద్ధా హి భగవా పహాసి దుక్ఖం, తథా హి తే విదితో ఏస ధమ్మో.

౮౩. ‘‘తే చాపి నూనప్పజహేయ్యు దుక్ఖం, యే త్వం ముని అట్ఠితం ఓవదేయ్య;

తం తం నమస్సామి సమేచ్చ నాగ, అప్పేవ మం భగవా అట్ఠితం ఓవదేయ్య’’.

౮౪. ‘‘యం బ్రాహ్మణం వేదగుమాభిజఞ్ఞా, అకిఞ్చనం కామభవే అసత్తం;

అద్ధా హి సో ఓఘమిమం అతారి, తిణ్ణో చ పారం అఖిలో అకఙ్ఖో.

౮౫. ‘‘విద్వా చ యో వేదగూ నరో ఇధ, భవాభవే సఙ్గమిమం విసజ్జ;

సో వీతతణ్హో అనీఘో నిరాసో, అతారి సో జాతిజరన్తి బ్రూమీ’’తి.

మేత్తగూమాణవపుచ్ఛా చతుత్థీ.