౨. తిస్సమేత్తేయ్యమాణవపుచ్ఛా

౬౫. ‘‘కోధ సన్తుసితో లోకే, [ఇచ్చాయస్మా తిస్సమేత్తేయ్యో]

కస్స నో సన్తి ఇఞ్జితా;

కో ఉభన్తమభిఞ్ఞాయ, మజ్ఝే మన్తా న లిప్పతి [న పిమ్పతి (బహూసు)];

కం బ్రూసి మహాపురిసోతి, కో ఇధ సిబ్బినిమచ్చగా’’తి [సిబ్బనిమచ్చగా (సీ. స్యా.)].

౬౬. ‘‘కామేసు బ్రహ్మచరియవా, [మేత్తేయ్యాతి భగవా]

వీతతణ్హో సదా సతో;

సఙ్ఖాయ నిబ్బుతో భిక్ఖు, తస్స నో సన్తి ఇఞ్జితా.

౬౭. ‘‘సో ఉభన్తమభిఞ్ఞాయ, మజ్ఝే మన్తా న లిప్పతి;

తం బ్రూమి మహాపురిసోతి, సో ఇధ సిబ్బినిమచ్చగా’’తి.

తిస్సమేత్తేయ్యమాణవపుచ్ఛా దుతియా.