౧౮. పారాయనానుగీతిగాథా

౧౫౬. ‘‘పారాయనమనుగాయిస్సం, [ఇచ్చాయస్మా పిఙ్గియో]

యథాద్దక్ఖి తథాక్ఖాసి, విమలో భూరిమేధసో;

నిక్కామో నిబ్బనో [నిబ్బుతో (స్యా.)] నాగో, కిస్స హేతు ముసా భణే.

౧౫౭. ‘‘పహీనమలమోహస్స, మానమక్ఖప్పహాయినో;

హన్దాహం కిత్తయిస్సామి, గిరం వణ్ణూపసఞ్హితం.

౧౫౮. ‘‘తమోనుదో బుద్ధో సమన్తచక్ఖు, లోకన్తగూ సబ్బభవాతివత్తో;

అనాసవో సబ్బదుక్ఖప్పహీనో, సచ్చవ్హయో బ్రహ్మే ఉపాసితో మే.

౧౫౯. ‘‘దిజో యథా కుబ్బనకం పహాయ, బహుప్ఫలం కాననమావసేయ్య;

ఏవమ్పహం అప్పదస్సే పహాయ, మహోదధిం హంసోరివ అజ్ఝపత్తో.

౧౬౦. ‘‘యేమే పుబ్బే వియాకంసు, హురం గోతమసాసనా;

ఇచ్చాసి ఇతి భవిస్సతి;

సబ్బం తం ఇతిహీతిహం, సబ్బం తం తక్కవడ్ఢనం.

౧౬౧. ‘‘ఏకో తమనుదాసినో, జుతిమా సో పభఙ్కరో;

గోతమో భూరిపఞ్ఞాణో, గోతమో భూరిమేధసో.

౧౬౨. ‘‘యో మే ధమ్మమదేసేసి, సన్దిట్ఠికమకాలికం;

తణ్హక్ఖయమనీతికం, యస్స నత్థి ఉపమా క్వచి’’.

౧౬౩. ‘‘కిం ను తమ్హా విప్పవససి, ముహుత్తమపి పిఙ్గియ;

గోతమా భూరిపఞ్ఞాణా, గోతమా భూరిమేధసా.

౧౬౪. ‘‘యో తే ధమ్మమదేసేసి, సన్దిట్ఠికమకాలికం;

తణ్హక్ఖయమనీతికం, యస్స నత్థి ఉపమా క్వచి’’.

౧౬౫. ‘‘నాహం తమ్హా విప్పవసామి, ముహుత్తమపి బ్రాహ్మణ;

గోతమా భూరిపఞ్ఞాణా, గోతమా భూరిమేధసా.

౧౬౬. ‘‘యో మే ధమ్మమదేసేసి, సన్దిట్ఠికమకాలికం;

తణ్హక్ఖయమనీతికం, యస్స నత్థి ఉపమా క్వచి.

౧౬౭. ‘‘పస్సామి నం మనసా చక్ఖునావ, రత్తిన్దివం బ్రాహ్మణ అప్పమత్తో.

నమస్సమానో వివసేమి రత్తిం, తేనేవ మఞ్ఞామి అవిప్పవాసం.

౧౬౮. ‘‘సద్ధా చ పీతి చ మనో సతి చ,

నాపేన్తిమే గోతమసాసనమ్హా;

యం యం దిసం వజతి భూరిపఞ్ఞో, స తేన తేనేవ నతోహమస్మి.

౧౬౯. ‘‘జిణ్ణస్స మే దుబ్బలథామకస్స, తేనేవ కాయో న పలేతి తత్థ;

సఙ్కప్పయన్తాయ [సంకప్పయత్తాయ (సీ.)] వజామి నిచ్చం, మనో హి మే బ్రాహ్మణ తేన యుత్తో.

౧౭౦. ‘‘పఙ్కే సయానో పరిఫన్దమానో, దీపా దీపం ఉపల్లవిం;

అథద్దసాసిం సమ్బుద్ధం, ఓఘతిణ్ణమనాసవం.

౧౭౧. ‘‘యథా అహూ వక్కలి ముత్తసద్ధో, భద్రావుధో ఆళవిగోతమో చ;

ఏవమేవ త్వమ్పి పముఞ్చస్సు సద్ధం, గమిస్ససి త్వం పిఙ్గియ మచ్చుధేయ్యస్స పారం’’ [మచ్చుధేయ్యపారం (సీ.)].

౧౭౨. ‘‘ఏస భియ్యో పసీదామి, సుత్వాన మునినో వచో;

వివట్టచ్ఛదో సమ్బుద్ధో, అఖిలో పటిభానవా.

౧౭౩. ‘‘అధిదేవే అభిఞ్ఞాయ, సబ్బం వేది పరోపరం;

పఞ్హానన్తకరో సత్థా, కఙ్ఖీనం పటిజానతం.

౧౭౪. ‘‘అసంహీరం అసంకుప్పం, యస్స నత్థి ఉపమా క్వచి;

అద్ధా గమిస్సామి న మేత్థ కఙ్ఖా, ఏవం మం ధారేహి అధిముత్తచిత్త’’న్తి [అజితమాణవపుచ్ఛాయ పట్ఠాయ యావపారాయనానుగీతిగాతాపరియోసానా స్యా. … పోత్థకే నత్థి].

పారాయనానుగీతిగాథా నిట్ఠితా.