౧౫. మోఘరాజమాణవపుచ్ఛా

౧౪౧. ‘‘ద్వాహం సక్కం అపుచ్ఛిస్సం, [ఇచ్చాయస్మా మోఘరాజా]

న మే బ్యాకాసి చక్ఖుమా;

యావతతియఞ్చ దేవీసి, బ్యాకరోతీతి మే సుతం.

౧౪౨. ‘‘అయం లోకో పరో లోకో, బ్రహ్మలోకో సదేవకో;

దిట్ఠిం తే నాభిజానాతి, గోతమస్స యసస్సినో.

౧౪౩. ‘‘ఏవం అభిక్కన్తదస్సావిం, అత్థి పఞ్హేన ఆగమం;

కథం లోకం అవేక్ఖన్తం, మచ్చురాజా న పస్సతి’’.

౧౪౪. ‘‘సుఞ్ఞతో లోకం అవేక్ఖస్సు, మోఘరాజ సదా సతో;

అత్తానుదిట్ఠిం ఊహచ్చ, ఏవం మచ్చుతరో సియా;

ఏవం లోకం అవేక్ఖన్తం, మచ్చురాజా న పస్సతీ’’తి.

మోఘరాజమాణవపుచ్ఛా పన్నరసమా.