౪౩౩. లోమసకస్సపజాతకం (౭)

౬౦. అస్స ఇన్దసమో రాజ, అచ్చన్తం అజరామరో;

సచే త్వం యఞ్ఞం యాజేయ్య, ఇసిం లోమసకస్సపం.

౬౧. ససముద్దపరియాయం, మహిం సాగరకుణ్డలం;

న ఇచ్ఛే సహ నిన్దాయ, ఏవం సేయ్య [సయ్హ (సీ. స్యా. పీ.)] విజానహి.

౬౨. ధిరత్థు తం యసలాభం, ధనలాభఞ్చ బ్రాహ్మణ;

యా వుత్తి వినిపాతేన, అధమ్మచరణేన వా.

౬౩. అపి చే పత్తమాదాయ, అనగారో పరిబ్బజే;

సాయేవ జీవికా సేయ్యో, యా చాధమ్మేన ఏసనా.

౬౪. అపి చే పత్తమాదాయ, అనగారో పరిబ్బజే;

అఞ్ఞం అహింసయం లోకే, అపి రజ్జేన తం వరం.

౬౫. బలం చన్దో బలం సురియో, బలం సమణబ్రాహ్మణా;

బలం వేలా సముద్దస్స, బలాతిబలమిత్థియో.

౬౬. యథా ఉగ్గతపం సన్తం, ఇసిం లోమసకస్సపం;

పితు అత్థా చన్దవతీ, వాజపేయ్యం [వాచపేయ్యం (పీ. క.)] అయాజయి.

౬౭. తం లోభపకతం కమ్మం, కటుకం కామహేతుకం;

తస్స మూలం గవేసిస్సం, ఛేచ్ఛం రాగం సబన్ధనం.

౬౮. ధిరత్థు కామే సుబహూపి లోకే, తపోవ సేయ్యో కామగుణేహి రాజ;

తపో కరిస్సామి పహాయ కామే, తవేవ రట్ఠం చన్దవతీ చ హోతూతి.

లోమసకస్సపజాతకం సత్తమం.