౪౩౦. చూళసువజాతకం (౪)

౩౦. సన్తి రుక్ఖా హరిపత్తా [హరితపత్తా (సీ. స్యా. పీ.)], దుమా నేకఫలా బహూ;

కస్మా ను సుక్ఖే [సుక్ఖ (క.)] కోళాపే, సువస్స నిరతో మనో.

౩౧. ఫలస్స ఉపభుఞ్జిమ్హా, నేకవస్సగణే బహూ;

అఫలమ్పి విదిత్వాన, సావ మేత్తి యథా పురే.

౩౨. సుఖఞ్చ రుక్ఖం కోళాపం, ఓపత్తమఫలం దుమం;

ఓహాయ సకుణా యన్తి, కిం దోసం పస్ససే దిజ.

౩౩. యే ఫలత్థా సమ్భజన్తి, అఫలోతి జహన్తి నం;

అత్తత్థపఞ్ఞా దుమ్మేధా, తే హోన్తి పక్ఖపాతినో.

౩౪. సాధు సక్ఖి కతం హోతి, మేత్తి సంసతి సన్థవో;

సచేతం ధమ్మం రోచేసి, పాసంసోసి విజానతం.

౩౫. సో తే సువ వరం దమ్మి, పత్తయాన విహఙ్గమ;

వరం వరస్సు వక్కఙ్గ, యం కిఞ్చి మనసిచ్ఛసి.

౩౬. అపి నామ నం పస్సేయ్యం [అపి నామ నం పున పస్సే (సీ. స్యా.)], సపత్తం సఫలం దుమం;

దలిద్దోవ నిధి లద్ధా, నన్దేయ్యాహం పునప్పునం.

౩౭. తతో అమతమాదాయ, అభిసిఞ్చి మహీరుహం;

తస్స సాఖా విరూహింసు [విరూళ్హస్స (క.)], సీతచ్ఛాయా మనోరమా.

౩౮. ఏవం సక్క సుఖీ హోహి, సహ సబ్బేహి ఞాతిభి;

యథాహమజ్జ సుఖితో, దిస్వాన సఫలం దుమం.

౩౯. సువస్స చ వరం దత్వా, కత్వాన సఫలం దుమం;

పక్కామి సహ భరియాయ, దేవానం నన్దనం వనన్తి.

చూళసువజాతకం చతుత్థం.