౪౨౫. అట్ఠానజాతకం (౯)

౭౭. గఙ్గా కుముదినీ సన్తా, సఙ్ఖవణ్ణా చ కోకిలా;

జమ్బు తాలఫలం దజ్జా, అథ నూన తదా సియా.

౭౮. యదా కచ్ఛపలోమానం, పావారో తివిధో సియా;

హేమన్తికం పావురణం [పాపురణం (సీ. స్యా. పీ.)], అథ నూన తదా సియా.

౭౯. యదా మకసపాదానం [దాఠానం (సీ. పీ.)], అట్టాలో సుకతో సియా;

దళ్హో చ అవికమ్పీ చ [అప్పకమ్పీ చ (సీ. పీ.)], అథ నూన తదా సియా.

౮౦. యదా ససవిసాణానం, నిస్సేణీ సుకతా సియా;

సగ్గస్సారోహణత్థాయ, అథ నూన తదా సియా.

౮౧. యదా నిస్సేణిమారుయ్హ, చన్దం ఖాదేయ్యు మూసికా;

రాహుఞ్చ పరిపాతేయ్యుం [పరిబాహేయ్యుం (స్యా.)], అథ నూన తదా సియా.

౮౨. యదా సురాఘటం పిత్వా, మక్ఖికా గణచారిణీ;

అఙ్గారే వాసం కప్పేయ్యుం, అథ నూన తదా సియా.

౮౩. యదా బిమ్బోట్ఠసమ్పన్నో, గద్రభో సుముఖో సియా;

కుసలో నచ్చగీతస్స, అథ నూన తదా సియా.

౮౪. యదా కాకా ఉలూకా చ, మన్తయేయ్యుం రహోగతా;

అఞ్ఞమఞ్ఞం పిహయేయ్యుం, అథ నూన తదా సియా.

౮౫. యదా ముళాల [పులస (సీ. పీ.), పులాస (స్యా.)] పత్తానం, ఛత్తం థిరతరం సియా;

వస్సస్స పటిఘాతాయ, అథ నూన తదా సియా.

౮౬. యదా కులకో [కులుఙ్కో (సీ. పీ.), కులుకో (స్యా.)] సకుణో, పబ్బతం గన్ధమాదనం;

తుణ్డేనాదాయ గచ్ఛేయ్య, అథ నూన తదా సియా.

౮౭. యదా సాముద్దికం నావం, స-యన్తం స-వటాకరం [సపటాకారం (క.)];

చేటో ఆదాయ గచ్ఛేయ్య, అథ నూన తదా సియాతి.

అట్ఠానజాతకం నవమం.