౪౧౮. అట్ఠసద్దజాతకం (౨)

౧౦. ఇదం పురే నిన్నమాహు, బహుమచ్ఛం మహోదకం;

ఆవాసో బకరాజస్స, పేత్తికం భవనం మమ;

త్యజ్జ భేకేన [భిఙ్గేన (క.)] యాపేమ, ఓకం న వజహామసే [ఓకన్తం న జహామసే (క.)].

౧౧. కో దుతియం అసీలిస్స, బన్ధరస్సక్ఖి భేచ్ఛతి [భేజ్జతి (సీ. స్యా. పీ.), భిన్దతి (క.)];

కో మే పుత్తే కులావకం, మఞ్చ సోత్థిం కరిస్సతి.

౧౨. సబ్బా పరిక్ఖయా ఫేగ్గు, యావ తస్సా గతీ అహు;

ఖీణభక్ఖో మహారాజ, సారే న రమతీ ఘుణో.

౧౩. సా నూనాహం ఇతో గన్త్వా, రఞ్ఞో ముత్తా నివేసనా;

అత్తానం రమయిస్సామి, దుమసాఖనికేతినీ.

౧౪. సో నూనాహం ఇతో గన్త్వా, రఞ్ఞో ముత్తో నివేసనా;

అగ్గోదకాని పిస్సామి, యూథస్స పురతో వజం.

౧౫. తం మం కామేహి సమ్మత్తం, రత్తం కామేసు ముచ్ఛితం;

ఆనయీ భరతో [వనతో (క.)] లుద్దో, బాహికో భద్దమత్థు తే.

౧౬. అన్ధకారతిమిసాయం, తుఙ్గే ఉపరిపబ్బతే;

సా మం సణ్హేన ముదునా, మా పాదం ఖలి [ఖణి (సీ. స్యా. పీ.)] యస్మని.

౧౭. అసంసయం జాతిఖయన్తదస్సీ, న గబ్భసేయ్యం పునరావజిస్సం;

అయమన్తిమా పచ్ఛిమా గబ్భసేయ్యా [అయం హి మే అన్తిమా గబ్భసేయ్యా (సీ. పీ.)], ఖీణో మే సంసారో పునబ్భవాయాతి.

అట్ఠసద్దజాతకం దుతియం.