౪౧౫. కుమ్మాసపిణ్డిజాతకం (౭-౨-౧౦)

౧౪౨. న కిరత్థి అనోమదస్సిసు, పారిచరియా బుద్ధేసు అప్పికా [అప్పకా (క.)];

సుక్ఖాయ అలోణికాయ చ, పస్సఫలం కుమ్మాసపిణ్డియా.

౧౪౩. హత్థిగవస్సా చిమే బహూ [హత్థిగవాస్సా చ మే బహూ (సీ.), హత్థీ గవాస్సా చిమే బహూ (స్యా.), హత్థీ గవాస్సా చ మే బహూ (పీ.)], ధనధఞ్ఞం పథవీ చ కేవలా;

నారియో చిమా అచ్ఛరూపమా, పస్సఫలం కుమ్మాసపిణ్డియా.

౧౪౪. అభిక్ఖణం రాజకుఞ్జర, గాథా భాససి కోసలాధిప;

పుచ్ఛామి తం రట్ఠవడ్ఢన, బాళ్హం పీతిమనో పభాససి.

౧౪౫. ఇమస్మిఞ్ఞేవ నగరే, కులే అఞ్ఞతరే అహుం;

పరకమ్మకరో ఆసిం, భతకో సీలసంవుతో.

౧౪౬. కమ్మాయ నిక్ఖమన్తోహం, చతురో సమణేద్దసం;

ఆచారసీలసమ్పన్నే, సీతిభూతే అనాసవే.

౧౪౭. తేసు చిత్తం పసాదేత్వా, నిసీదేత్వా [నిసాదేత్వా (?)] పణ్ణసన్థతే;

అదం బుద్ధాన కుమ్మాసం, పసన్నో సేహి పాణిభి.

౧౪౮. తస్స కమ్మస్స కుసలస్స, ఇదం మే ఏదిసం ఫలం;

అనుభోమి ఇదం రజ్జం, ఫీతం ధరణిముత్తమం.

౧౪౯. దదం భుఞ్జ మా చ పమాదో [దద భుఞ్జ చ మా చ పమాదో (సీ. పీ.)], చక్కం వత్తయ కోసలాధిప;

మా రాజ అధమ్మికో అహు, ధమ్మం పాలయ కోసలాధిప.

౧౫౦. సోహం తదేవ పునప్పునం, వటుమం ఆచరిస్సామి సోభనే;

అరియాచరితం సుకోసలే, అరహన్తో మే మనాపావ పస్సితుం.

౧౫౧. దేవీ వియ అచ్ఛరూపమా, మజ్ఝే నారిగణస్స సోభసి;

కిం కమ్మమకాసి భద్దకం, కేనాసి వణ్ణవతీ సుకోసలే.

౧౫౨. అమ్బట్ఠకులస్స ఖత్తియ, దాస్యాహం పరపేసియా అహుం;

సఞ్ఞతా చ [సఞ్ఞతా (సీ. పీ.)] ధమ్మజీవినీ, సీలవతీ చ అపాపదస్సనా.

౧౫౩. ఉద్ధటభత్తం అహం తదా, చరమానస్స అదాసి భిక్ఖునో;

విత్తా సుమనా సయం అహం, తస్స కమ్మస్స ఫలం మమేదిసన్తి.

కుమ్మాసపిణ్డిజాతకం దసమం.