౪౧౧. సుసీమజాతకం (౭-౨-౬)

౧౧౪. కాళాని కేసాని పురే అహేసుం, జాతాని సీసమ్హి యథాపదేసే;

తానజ్జ సేతాని సుసీమ [సుసిమ (క.)] దిస్వా, ధమ్మం చర బ్రహ్మచరియస్స కాలో.

౧౧౫. మమేవ దేవ పలితం న తుయ్హం, మమేవ సీసం మమ ఉత్తమఙ్గం;

‘‘అత్థం కరిస్స’’న్తి ముసా అభాణిం [అభాసిం (క.)], ఏకాపరాధం ఖమ రాజసేట్ఠ.

౧౧౬. దహరో తువం దస్సనియోసి రాజ, పఠముగ్గతో హోసి [హోహి (సీ.), హోతి (క.)] యథా కళీరో;

రజ్జఞ్చ కారేహి మమఞ్చ పస్స, మా కాలికం అనుధావీ జనిన్ద.

౧౧౭. పస్సామి వోహం దహరిం కుమారిం, సామట్ఠపస్సం సుతనుం సుమజ్ఝం;

కాళప్పవాళావ పవేల్లమానా, పలోభయన్తీవ [సా లోభయన్తీవ (పీ.)] నరేసు గచ్ఛతి.

౧౧౮. తమేన పస్సామిపరేన నారిం, ఆసీతికం నావుతికం వ జచ్చా;

దణ్డం గహేత్వాన పవేధమానం, గోపానసీభోగ్గసమం చరన్తిం.

౧౧౯. సోహం తమేవానువిచిన్తయన్తో, ఏకో సయామి [పస్సామి (క.)] సయనస్స మజ్ఝే;

‘‘అహమ్పి ఏవం’’ ఇతి పేక్ఖమానో, న గహే రమే [న గేహే రమే (సీ.), గేహే న రమే (స్యా. క.)] బ్రహ్మచరియస్స కాలో.

౧౨౦. రజ్జువాలమ్బనీ చేసా, యా గేహే వసతో రతి;

ఏవమ్పి ఛేత్వాన వజన్తి ధీరా, అనపేక్ఖినో కామసుఖం పహాయాతి.

సుసీమజాతకం ఛట్ఠం.