౪౦౧. పణ్ణకజాతకం (౭-౧-౬)

౩౯. పణ్ణకం [దసణ్ణకం (సీ. స్యా. పీ.)] తిఖిణధారం, అసిం సమ్పన్నపాయినం;

పరిసాయం పురిసో గిలతి, కిం దుక్కరతరం తతో;

యదఞ్ఞం దుక్కరం ఠానం, తం మే అక్ఖాహి పుచ్ఛితో.

౪౦. గిలేయ్య పురిసో లోభా, అసిం సమ్పన్నపాయినం;

యో చ వజ్జా దదామీతి, తం దుక్కరతరం తతో;

సబ్బఞ్ఞం సుకరం ఠానం, ఏవం జానాహి మద్దవ [మాగధ (సీ. స్యా. పీ.)].

౪౧. బ్యాకాసి ఆయురో పఞ్హం, అత్థం [అత్థ (పీ. సీ. నియ్య)] ధమ్మస్స కోవిదో;

పుక్కుసం దాని పుచ్ఛామి, కిం దుక్కరతరం తతో;

యదఞ్ఞం దుక్కరం ఠానం, తం మే అక్ఖాహి పుచ్ఛితో.

౪౨. న వాచముపజీవన్తి, అఫలం గిరముదీరితం;

యో చ దత్వా అవాకయిరా, తం దుక్కరతరం తతో;

సబ్బఞ్ఞం సుకరం ఠానం, ఏవం జానాహి మద్దవ.

౪౩. బ్యాకాసి పుక్కుసో పఞ్హం, అత్థం ధమ్మస్స కోవిదో;

సేనకం దాని పుచ్ఛామి, కిం దుక్కరతరం తతో;

యదఞ్ఞం దుక్కరం ఠానం, తం మే అక్ఖాహి పుచ్ఛితో.

౪౪. దదేయ్య పురిసో దానం, అప్పం వా యది వా బహుం;

యో చ దత్వా నానుతప్పే [తపే (సీ. పీ.)], తం దుక్కరతరం తతో;

సబ్బఞ్ఞం సుకరం ఠానం, ఏవం జానాహి మద్దవ.

౪౫. బ్యాకాసి ఆయురో పఞ్హం, అథో పుక్కుసపోరిసో;

సబ్బే పఞ్హే అతిభోతి, యథా భాసతి సేనకోతి.

పణ్ణక [దసణ్ణక (సీ. స్యా. పీ.)] జాతకం ఛట్ఠం.