౩౮౪. ధమ్మధజజాతకం (౬-౧-౯)

౬౪. ధమ్మం చరథ ఞాతయో, ధమ్మం చరథ భద్దం వో [భద్ద వో (క.)];

ధమ్మచారీ సుఖం సేతి, అస్మిం లోకే పరమ్హి చ.

౬౫. భద్దకో వతయం పక్ఖీ, దిజో పరమధమ్మికో;

ఏకపాదేన తిట్ఠన్తో, ధమ్మమేవానుసాసతి.

౬౬. నాస్స సీలం విజానాథ, అనఞ్ఞాయ పసంసథ;

భుత్వా అణ్డఞ్చ పోతఞ్చ [ఛాపే చ (సీ. పీ.)], ధమ్మో ధమ్మోతి భాసతి.

౬౭. అఞ్ఞం భణతి వాచాయ, అఞ్ఞం కాయేన కుబ్బతి;

వాచాయ నో చ కాయేన, న తం ధమ్మం అధిట్ఠితో.

౬౮. వాచాయ సఖిలో మనోవిదుగ్గో, ఛన్నో కూపసయోవ కణ్హసప్పో;

ధమ్మధజో గామనిగమాసుసాధు [గామనిగమాసు సాధుసమ్మతో (సీ.), గామనిగమసాధు (పీ.)], దుజ్జానో పురిసేన బాలిసేన.

౬౯. ఇమం తుణ్డేహి పక్ఖేహి, పాదా చిమం విహేఠథ [విపోథథ (పీ.)];

ఛవఞ్హిమం వినాసేథ, నాయం సంవాసనారహోతి.

ధమ్మధజజాతకం నవమం.