౩. అడ్ఢవగ్గో
౩౭౧. దీఘీతికోసలజాతకం (౫-౩-౧)
౧౧౦. ఏవంభూతస్స తే రాజ, ఆగతస్స వసే [వసో (పీ. క.)] మమ;
అత్థి ను కోచి పరియాయో, యో తం దుక్ఖా పమోచయే.
౧౧౧. ఏవంభూతస్స మే తాత, ఆగతస్స వసే తవ;
నత్థి నో కోచి పరియాయో, యో మం దుక్ఖా పమోచయే.
౧౧౨. నాఞ్ఞం సుచరితం రాజ, నాఞ్ఞం రాజ సుభాసితం;
తాయతే మరణకాలే, ఏవమేవితరం ధనం.
౧౧౩. అక్కోచ్ఛి మం అవధి మం, అజిని మం అహాసి మే;
యే చ తం ఉపనయ్హన్తి, వేరం తేసం న సమ్మతి.
౧౧౪. అక్కోచ్ఛి మం అవధి మం, అజిని మం అహాసి మే;
యే చ తం నుపనయ్హన్తి, వేరం తేసూపసమ్మతి.
౧౧౫. న హి వేరేన వేరాని, సమ్మన్తీధ కుదాచనం;
అవేరేన చ సమ్మన్తి, ఏస ధమ్మో సనన్తనోతి.
దీఘీతికోసలజాతకం పఠమం.
౩౭౨. మిగపోతకజాతకం (౫-౩-౨)
౧౧౬. అగారా పచ్చుపేతస్స, అనగారస్స తే సతో;
సమణస్స న తం సాధు, యం పేతమనుసోచసి.
౧౧౭. సంవాసేన హవే సక్క, మనుస్సస్స మిగస్స వా;
హదయే జాయతే పేమం, న తం సక్కా అసోచితుం.
౧౧౮. మతం మరిస్సం రోదన్తి, యే రుదన్తి లపన్తి చ;
తస్మా త్వం ఇసి మా రోది, రోదితం మోఘమాహు సన్తో.
౧౧౯. రోదితేన హవే బ్రహ్మే, మతో పేతో సముట్ఠహే;
సబ్బే సఙ్గమ్మ రోదామ, అఞ్ఞమఞ్ఞస్స ఞాతకే.
౧౨౦. ఆదిత్తం వత మం సన్తం, ఘతసిత్తంవ పావకం;
వారినా వియ ఓసిఞ్చం, సబ్బం నిబ్బాపయే దరం.
౧౨౧. అబ్బహి వత మే సల్లం, యమాసి హదయస్సితం;
యో మే సోకపరేతస్స, పుత్తసోకం అపానుది.
౧౨౨. సోహం అబ్బూళ్హసల్లోస్మి, వీతసోకో అనావిలో;
న సోచామి న రోదామి, తవ సుత్వాన వాసవాతి.
మిగపోతకజాతకం దుతియం.
౩౭౩. మూసికజాతకం (౫-౩-౩)
౧౨౩. కుహిం గతా కత్థ గతా, ఇతి లాలప్పతీ జనో;
అహమేవేకో జానామి, ఉదపానే మూసికా హతా.
౧౨౪. యఞ్చేతం [యథేతం (పీ.), యవేతం (క.), యమేతం (కత్థచి)] ఇతి చీతి చ, గద్రభోవ నివత్తసి;
ఉదపానే మూసికం హన్త్వా, యవం భక్ఖేతుమిచ్ఛసి.
౧౨౫. దహరో చాసి దుమ్మేధ, పఠముప్పత్తికో [పఠముప్పత్తితో (సీ. పీ.)] సుసు;
దీఘఞ్చేతం [దీఘమేతం (పీ.)] సమాసజ్జ [సమాపజ్జ (స్యా. క.)], న తే దస్సామి జీవితం.
౧౨౬. నాన్తలిక్ఖభవనేన, నాఙ్గపుత్తపినేన [నాఙ్గపుత్తసిరేన (సీ. స్యా. పీ.)] వా;
పుత్తేన హి పత్థయితో, సిలోకేహి పమోచితో.
౧౨౭. సబ్బం సుతమధీయేథ, హీనముక్కట్ఠమజ్ఝిమం;
సబ్బస్స అత్థం జానేయ్య, న చ సబ్బం పయోజయే;
హోతి తాదిసకో కాలో, యత్థ అత్థావహం సుతన్తి.
మూసికజాతకం తతియం.
౩౭౪. చూళధనుగ్గహజాతకం (౫-౩-౪)
౧౨౮. సబ్బం భణ్డం సమాదాయ, పారం తిణ్ణోసి బ్రాహ్మణ;
పచ్చాగచ్ఛ లహుం ఖిప్పం, మమ్పి తారేహి దానితో [దానిభో (స్యా.)].
౧౨౯. అసన్థుతం మం చిరసన్థుతేన, నిమీని భోతీ అద్ధువం ధువేన;
మయాపి భోతీ నిమినేయ్య అఞ్ఞం, ఇతో అహం దూరతరం గమిస్సం.
౧౩౦. కాయం ఏళగలాగుమ్బే [ఏళగణగుమ్బే (క.)], కరోతి అహుహాసియం;
నయీధ నచ్చగీతం వా [నయిధ నచ్చం వా గీతం వా (సీ. స్యా. పీ.)], తాళం వా సుసమాహితం;
అనమ్హికాలే [అనమ్హకాలే (పీ.)] సుసోణి [సుస్సోణి (సీ. స్యా. పీ.)], కిం ను జగ్ఘసి సోభనే [సోభణే (పీ. క.)].
౧౩౧. సిఙ్గాల బాల దుమ్మేధ, అప్పపఞ్ఞోసి జమ్బుక;
జీనో మచ్ఛఞ్చ పేసిఞ్చ, కపణో వియ ఝాయసి.
౧౩౨. సుదస్సం వజ్జమఞ్ఞేసం, అత్తనో పన దుద్దసం;
జీనా పతిఞ్చ జారఞ్చ, మఞ్ఞే త్వఞ్ఞేవ [మమ్పి త్వఞ్ఞేవ (సీ. స్యా.), త్వమ్పి మఞ్ఞేవ (పీ.)] ఝాయసి.
౧౩౩. ఏవమేతం మిగరాజ, యథా భాససి జమ్బుక;
సా నూనాహం ఇతో గన్త్వా, భత్తు హేస్సం వసానుగా.
౧౩౪. యో హరే మత్తికం థాలం, కంసథాలమ్పి సో హరే;
కతఞ్చేవ [కతంయేవ (సీ. స్యా. పీ.)] తయా పాపం, పునపేవం కరిస్ససీతి.
చూళధనుగ్గహజాతకం చతుత్థం.
౩౭౫. కపోతజాతకం (౫-౩-౫)
౧౩౫. ఇదాని ఖోమ్హి సుఖితో అరోగో, నిక్కణ్టకో నిప్పతితో కపోతో;
కాహామి దానీ హదయస్స తుట్ఠిం, తథాహిమం మంససాకం బలేతి.
౧౩౬. కాయం బలాకా సిఖినో, చోరీ లఙ్ఘిపితామహా;
ఓరం బలాకే ఆగచ్ఛ, చణ్డో మే వాయసో సఖా.
౧౩౭. అలఞ్హి తే జగ్ఘితాయే, మమం దిస్వాన ఏదిసం;
విలూనం సూదపుత్తేన, పిట్ఠమణ్డేన [పిట్ఠమద్దేన (సీ. స్యా. పీ.)] మక్ఖితం.
౧౩౮. సున్హాతో సువిలిత్తోసి, అన్నపానేన తప్పితో;
కణ్ఠే చ తే వేళురియో, అగమా ను కజఙ్గలం.
౧౩౯. మా తే మిత్తో అమిత్తో వా, అగమాసి కజఙ్గలం;
పిఞ్ఛాని తత్థ లాయిత్వా, కణ్ఠే బన్ధన్తి వట్టనం.
౧౪౦. పునపాపజ్జసీ సమ్మ, సీలఞ్హి తవ తాదిసం;
న హి మానుసకా భోగా, సుభుఞ్జా హోన్తి పక్ఖినాతి.
కపోతజాతకం పఞ్చమం.
అడ్ఢవగ్గో తతియో.
తస్సుద్దానం –
అథ వణ్ణ ససీల హిరి లభతే, సుముఖా విస సాళియమిత్తవరో;
అథ చక్క పలాస సరాజ సతో, యవ బాల కపోతక పన్నరసాతి.
అథ వగ్గుద్దానం –
జీనఞ్చ వణ్ణం అసమంవగుప్పరి, సుదేసితా జాతకన్తి సన్తి వీసతి [జాతక పఞ్చవీసతి (?)];
మహేసినో బ్రహ్మచరిత్తముత్త-మవోచ గాథా అత్థవతీ సుబ్యఞ్జనాతి.
పఞ్చకనిపాతం నిట్ఠితం.