౩౫౪. ఉరగజాతకం (౫-౧-౪)

౧౯. ఉరగోవ తచం జిణ్ణం, హిత్వా గచ్ఛతి సం తనుం;

ఏవం సరీరే నిబ్భోగే, పేతే కాలఙ్కతే సతి.

౨౦. డయ్హమానో న జానాతి, ఞాతీనం పరిదేవితం;

తస్మా ఏతం న సోచామి, గతో సో తస్స యా గతి.

౨౧. అనవ్హితో తతో ఆగా, అననుఞ్ఞాతో [నానుఞ్ఞాతో (క.)] ఇతో గతో;

యథాగతో తథా గతో, తత్థ కా పరిదేవనా.

౨౨. డయ్హమానో న జానాతి, ఞాతీనం పరిదేవితం;

తస్మా ఏతం న సోచామి, గతో సో తస్స యా గతి.

౨౩. సచే రోదే కిసా [కిసీ (పీ.)] అస్సం, తస్సా మే కిం ఫలం సియా;

ఞాతిమిత్తసుహజ్జానం, భియ్యో నో అరతీ సియా.

౨౪. డయ్హమానో న జానాతి, ఞాతీనం పరిదేవితం;

తస్మా ఏతం న సోచామి, గతో సో తస్స యా గతి.

౨౫. యథాపి దారకో చన్దం, గచ్ఛన్తమనురోదతి;

ఏవం సమ్పదమేవేతం, యో పేతమనుసోచతి.

౨౬. డయ్హమానో న జానాతి, ఞాతీనం పరిదేవితం;

తస్మా ఏతం న సోచామి, గతో సో తస్స యా గతి.

౨౭. యథాపి ఉదకకుమ్భో, భిన్నో అప్పటిసన్ధియో;

ఏవం సమ్పదమేవేతం, యో పేతమనుసోచతి.

౨౮. డయ్హమానో న జానాతి, ఞాతీనం పరిదేవితం;

తస్మా ఏతం న సోచామి, గతో సో తస్స యా గతీతి.

ఉరగజాతకం చతుత్థం.