౪. కోకిలవగ్గో
౩౩౧. కోకిలజాతకం (౪-౪-౧)
౧౨౧. యో వే కాలే అసమ్పత్తే, అతివేలం పభాసతి;
ఏవం సో నిహతో సేతి, కోకిలాయివ అత్రజో.
౧౨౨. న హి సత్థం సునిసితం, విసం హలాహలామివ [హలాహలం ఇవ (పీ.)];
ఏవం నికట్ఠే [నిక్కడ్ఢే (స్యా.), నికడ్ఢే (క.)] పాతేతి, వాచా దుబ్భాసితా యథా.
౧౨౩. తస్మా కాలే అకాలే వా [అకాలే చ (సీ. స్యా.)], వాచం రక్ఖేయ్య పణ్డితో;
నాతివేలం పభాసేయ్య, అపి అత్తసమమ్హి వా.
౧౨౪. యో చ కాలే మితం భాసే, మతిపుబ్బో విచక్ఖణో;
సబ్బే అమిత్తే ఆదేతి, సుపణ్ణో ఉరగామివాతి.
కోకిలజాతకం [కోకాలికజాతకం (సబ్బత్థ)] పఠమం.
౩౩౨. రథలట్ఠిజాతకం (౪-౪-౨)
౧౨౫. అపి హన్త్వా హతో బ్రూతి, జేత్వా జితోతి భాసతి;
పుబ్బవక్ఖాయినో [పుబ్బమక్ఖాయినో (సీ. స్యా.)] రాజ, అఞ్ఞదత్థు [ఏకదత్థు (సీ. పీ.)] న సద్దహే.
౧౨౬. తస్మా పణ్డితజాతియో, సుణేయ్య ఇతరస్సపి;
ఉభిన్నం వచనం సుత్వా, యథా ధమ్మో తథా కరే.
౧౨౭. అలసో గిహీ కామభోగీ న సాధు, అసఞ్ఞతో పబ్బజితో న సాధు;
రాజా న సాధు అనిసమ్మకారీ, యో పణ్డితో కోధనో తం న సాధు.
౧౨౮. నిసమ్మ ఖత్తియో కయిరా, నానిసమ్మ దిసమ్పతి;
నిసమ్మకారినో రాజ [రఞ్ఞో (సీ. స్యా.)], యసో కిత్తి చ వడ్ఢతీతి.
రథలట్ఠిజాతకం దుతియం.
౩౩౩. పక్కగోధజాతకం (౪-౪-౩)
౧౨౯. తదేవ మే త్వం విదితో, వనమజ్ఝే రథేసభ;
యస్స తే ఖగ్గబద్ధస్స, సన్నద్ధస్స తిరీటినో;
అస్సత్థదుమసాఖాయ, పక్కా గోధా పలాయథ.
౧౩౦. నమే నమన్తస్స భజే భజన్తం, కిచ్చానుకుబ్బస్స కరేయ్య కిచ్చం;
నానత్థకామస్స కరేయ్య అత్థం, అసమ్భజన్తమ్పి న సమ్భజేయ్య.
౧౩౧. చజే చజన్తం వనథం న కయిరా, అపేతచిత్తేన న సమ్భజేయ్య;
దిజో దుమం ఖీణఫలన్తి [ఫలంవ (క. సీ. స్యా. క.), దుకనిపాతే పుటభత్తజాతకేన సంసన్దేతబ్బం] ఞత్వా, అఞ్ఞం సమేక్ఖేయ్య మహా హి లోకో.
౧౩౨. సో తే కరిస్సామి యథానుభావం, కతఞ్ఞుతం ఖత్తియే [ఖత్తియో (స్యా. క.)] పేక్ఖమానో;
సబ్బఞ్చ తే ఇస్సరియం దదామి, యస్సిచ్ఛసీ తస్స తువం దదామీతి.
పక్కగోధజాతకం [గోధజాతకం (సీ. స్యా. పీ.)] తతియం.
౩౩౪. రాజోవాదజాతకం (౪-౪-౪)
౧౩౩. గవం చే తరమానానం, జిమ్హం గచ్ఛతి పుఙ్గవో;
సబ్బా తా జిమ్హం గచ్ఛన్తి [సబ్బా గావీ జిమ్హం యన్తి (సీ. స్యా.)], నేత్తే జిమ్హం గతే సతి.
౧౩౪. ఏవమేవ మనుస్సేసు, యో హోతి సేట్ఠసమ్మతో;
సో చే అధమ్మం చరతి, పగేవ ఇతరా పజా;
సబ్బం రట్ఠం దుఖం సేతి, రాజా చే హోతి అధమ్మికో.
౧౩౫. గవం చే తరమానానం, ఉజుం గచ్ఛతి పుఙ్గవో;
సబ్బా గావీ ఉజుం యన్తి [సబ్బా తా ఉజుం గచ్ఛన్తి (పీ. అ. ని. ౪.౭౦)], నేత్తే ఉజుం గతే సతి.
౧౩౬. ఏవమేవ మనుస్సేసు, యో హోతి సేట్ఠసమ్మతో;
సో సచే ధమ్మం చరతి, పగేవ ఇతరా పజా;
సబ్బం రట్ఠం సుఖం సేతి, రాజా చే హోతి ధమ్మికోతి.
రాజోవాదజాతకం చతుత్థం.
౩౩౫. జమ్బుకజాతకం (౪-౪-౫)
౧౩౭. బ్రహా పవడ్ఢకాయో సో, దీఘదాఠో చ జమ్బుక;
న త్వం తత్థ కులే జాతో, యత్థ గణ్హన్తి కుఞ్జరం.
౧౩౮. అసీహో సీహమానేన, యో అత్తానం వికుబ్బతి;
కోత్థూవ [కుట్ఠూవ (సీ.), కుత్థువ (స్యా. పీ)] గజమాసజ్జ, సేతి భూమ్యా అనుత్థునం.
౧౩౯. యసస్సినో ఉత్తమపుగ్గలస్స, సఞ్జాతఖన్ధస్స మహబ్బలస్స;
అసమేక్ఖియ థామబలూపపత్తిం, స సేతి నాగేన హతోయం జమ్బుకో.
౧౪౦. యో చీధ కమ్మం కురుతే పమాయ, థామబ్బలం అత్తని సంవిదిత్వా;
జప్పేన మన్తేన సుభాసితేన, పరిక్ఖవా సో విపులం జినాతీతి.
జమ్బుకజాతకం పఞ్చమం.
౩౩౬. బ్రహాఛత్తజాతకం (౪-౪-౬)
౧౪౧. తిణం తిణన్తి లపసి, కో ను తే తిణమాహరి;
కిం ను తే తిణకిచ్చత్థి, తిణమేవ పభాససి.
౧౪౨. ఇధాగమా బ్రహ్మచారీ, బ్రహా ఛత్తో బహుస్సుతో;
సో మే [సో వే (క.)] సబ్బం సమాదాయ, తిణం నిక్ఖిప్ప గచ్ఛతి.
౧౪౩. ఏవేతం హోతి కత్తబ్బం, అప్పేన బహుమిచ్ఛతా;
సబ్బం సకస్స ఆదానం, అనాదానం తిణస్స చ. ( ) [(తిణస్స చాటీసు గతో, తత్థ కా పరిదేవనా) (సీ. స్యా.) (చాటీసు పక్ఖిపిత్వాన, తత్థ కా పరిదేవనా) (క.)]
౧౪౪. సీలవన్తో న కుబ్బన్తి, బాలో సీలాని కుబ్బతి;
అనిచ్చసీలం దుస్సీల్యం [దుస్సీలం (పీ.)], కిం పణ్డిచ్చం కరిస్సతీతి.
బ్రహాఛత్తజాతకం ఛట్ఠం.
౩౩౭. పీఠజాతకం (౪-౪-౭)
౧౪౫. న తే పీఠమదాయిమ్హా [మదాసిమ్హ (పీ. క.)], న పానం నపి భోజనం;
బ్రహ్మచారి ఖమస్సు మే, ఏతం పస్సామి అచ్చయం.
౧౪౬. నేవాభిసజ్జామి న చాపి కుప్పే, న చాపి మే అప్పియమాసి కిఞ్చి;
అథోపి మే ఆసి మనోవితక్కో, ఏతాదిసో నూన కులస్స ధమ్మో.
౧౪౭. ఏసస్మాకం కులే ధమ్మో, పితుపితామహో సదా;
ఆసనం ఉదకం పజ్జం, సబ్బేతం నిపదామసే.
౧౪౮. ఏసస్మాకం కులే ధమ్మో, పితుపితామహో సదా;
సక్కచ్చం ఉపతిట్ఠామ, ఉత్తమం వియ ఞాతకన్తి.
పీఠజాతకం సత్తమం.
౩౩౮. థుసజాతకం (౪-౪-౮)
౧౪౯. విదితం థుసం ఉన్దురానం [ఉన్దూరానం (క.)], విదితం పన తణ్డులం;
థుసం థుసం [థుసం థూలం (సీ.)] వివజ్జేత్వా, తణ్డులం పన ఖాదరే.
౧౫౦. యా మన్తనా అరఞ్ఞస్మిం, యా చ గామే నికణ్ణికా;
యఞ్చేతం ఇతి చీతి చ, ఏతమ్పి విదితం మయా.
౧౫౧. ధమ్మేన కిర జాతస్స, పితా పుత్తస్స మక్కటో;
దహరస్సేవ సన్తస్స, దన్తేహి ఫలమచ్ఛిదా.
౧౫౨. యమేతం పరిసప్పసి [పరిసబ్బేసి (క.)], అజకాణోవ సాసపే;
యోపాయం హేట్ఠతో సేతి [సేసి (సీ.)], ఏతమ్పి విదితం మయాతి.
థుసజాతకం అట్ఠమం.
౩౩౯. బావేరుజాతకం (౪-౪-౯)
౧౫౩. అదస్సనేన మోరస్స, సిఖినో మఞ్జుభాణినో;
కాకం తత్థ అపూజేసుం, మంసేన చ ఫలేన చ.
౧౫౪. యదా చ సరసమ్పన్నో, మోరో బావేరుమాగమా;
అథ లాభో చ సక్కారో, వాయసస్స అహాయథ.
౧౫౫. యావ నుప్పజ్జతీ బుద్ధో, ధమ్మరాజా పభఙ్కరో;
తావ అఞ్ఞే అపూజేసుం, పుథూ సమణబ్రాహ్మణే.
౧౫౬. యదా చ సరసమ్పన్నో, బుద్ధో ధమ్మం అదేసయి;
అథ లాభో చ సక్కారో, తిత్థియానం అహాయథాతి.
బావేరుజాతకం నవమం.
౩౪౦. విసయ్హజాతకం (౪-౪-౧౦)
౧౫౭. అదాసి దానాని పురే విసయ్హ, దదతో చ తే ఖయధమ్మో అహోసి;
ఇతో పరం చే న దదేయ్య దానం, తిట్ఠేయ్యుం తే సంయమన్తస్స భోగా.
౧౫౮. అనరియమరియేన సహస్సనేత్త, సుదుగ్గతేనాపి అకిచ్చమాహు;
మా వో ధనం తం అహు దేవరాజ [అహువా జనిన్ద (క. సీ. స్యా. పీ.)], యం భోగహేతు విజహేము సద్ధం.
౧౫౯. యేన ఏకో రథో యాతి, యాతి తేనాపరో రథో;
పోరాణం నిహితం వత్తం, వత్తతఞ్ఞేవ [వద్ధం, వద్ధతఞ్ఞేవ (క. సీ. పీ.)] వాసవ.
౧౬౦. యది హేస్సతి దస్సామ, అసన్తే కిం దదామసే;
ఏవంభూతాపి దస్సామ, మా దానం పమదమ్హసేతి.
విసయ్హజాతకం దసమం.
కోకిలవగ్గో [కోకాలికవగ్గో (క.)] చతుత్థో.
తస్సుద్దానం –
అతివేలపభాసతి జీతవరో, వనమజ్ఝ రథేసభ జిమ్హగమో;
అథ జమ్బు తిణాసనపీఠవరం, అథ తణ్డుల మోర విసయ్హ దసాతి.