౫. కుమ్భవగ్గో
౨౯౧. సురాఘటజాతకం (౨-౫-౧)
౧౨౧. సబ్బకామదదం కుమ్భం, కుటం లద్ధాన ధుత్తకో;
యావ నం అనుపాలేతి, తావ సో సుఖమేధతి.
౧౨౨. యదా మత్తో చ దిత్తో చ, పమాదా కుమ్భమబ్భిదా;
తదా నగ్గో చ పోత్థో చ, పచ్ఛా బాలో విహఞ్ఞతి.
౧౨౩. ఏవమేవ యో ధనం లద్ధా, పమత్తో [అమత్తా (సీ.), అమత్తో (పీ.)] పరిభుఞ్జతి;
పచ్ఛా తప్పతి దుమ్మేధో, కుటం భిత్వావ [కుటం భిన్నోవ (సీ. పీ.), కుటభిన్నోవ (?)] ధుత్తకోతి.
సురాఘట [భద్రఘట (సీ. పీ.), భద్రఘటభేదక (స్యా.)] జాతకం పఠమం.
౨౯౨. సుపత్తజాతకం (౩-౫-౨)
౧౨౪. బారాణస్యం [బారాణస్సం (సీ. పీ.)] మహారాజ, కాకరాజా నివాసకో [నివాసికో (సీ. పీ.)];
అసీతియా సహస్సేహి, సుపత్తో పరివారితో.
౧౨౫. తస్స దోహళినీ భరియా, సుఫస్సా భక్ఖితుమిచ్ఛతి [మచ్ఛమిచ్ఛతి (సీ. పీ.)];
రఞ్ఞో మహానసే పక్కం, పచ్చగ్ఘం రాజభోజనం.
౧౨౬. తేసాహం పహితో దూతో, రఞ్ఞో చమ్హి ఇధాగతో;
భత్తు అపచితిం కుమ్మి, నాసాయమకరం [మకరిం (సీ. నిస్సయ)] వణన్తి.
సుపత్తజాతకం దుతియం.
౨౯౩. కాయనిబ్బిన్దజాతకం (౩-౫-౩)
౧౨౭. ఫుట్ఠస్స మే అఞ్ఞతరేన బ్యాధినా, రోగేన బాళ్హం దుఖితస్స రుప్పతో;
పరిసుస్సతి ఖిప్పమిదం కళేవరం, పుప్ఫం యథా పంసుని ఆతపే కతం.
౧౨౮. అజఞ్ఞం జఞ్ఞసఙ్ఖాతం, అసుచిం సుచిసమ్మతం;
నానాకుణపపరిపూరం, జఞ్ఞరూపం అపస్సతో.
౧౨౯. ధిరత్థుమం ఆతురం పూతికాయం, జేగుచ్ఛియం అస్సుచిం బ్యాధిధమ్మం;
యత్థప్పమత్తా అధిముచ్ఛితా పజా, హాపేన్తి మగ్గం సుగతూపపత్తియాతి.
కాయనిబ్బిన్ద [కాయవిచ్ఛన్ద (సీ.), కాయవిచ్ఛిన్ద (పీ.)] జాతకం తతియం.
౨౯౪. జమ్బుఖాదకజాతకం (౩-౫-౪)
౧౩౦. కోయం బిన్దుస్సరో వగ్గు, సరవన్తాన [పవదన్తాన (సీ. పీ.)] ముత్తమో;
అచ్చుతో జమ్బుసాఖాయ, మోరచ్ఛాపోవ కూజతి.
౧౩౧. కులపుత్తోవ జానాతి [కులపుత్తో పజానాతి (స్యా. క.)], కులపుత్తం [కులపుత్తే (సీ. పీ.)] పసంసితుం;
బ్యగ్ఘచ్ఛాపసరీవణ్ణ, భుఞ్జ సమ్మ దదామి తే.
౧౩౨. చిరస్సం వత పస్సామి, ముసావాదీ సమాగతే;
వన్తాదం కుణపాదఞ్చ, అఞ్ఞమఞ్ఞం పసంసకేతి.
జమ్బుఖాదకజాతకం చతుత్థం.
౨౯౫. అన్తజాతకం (౩-౫-౫)
౧౩౩. ఉసభస్సేవ తే ఖన్ధో, సీహస్సేవ విజమ్భితం;
మిగరాజ నమో త్యత్థు, అపి కిఞ్చి లభామసే.
౧౩౪. కులపుత్తోవ జానాతి, కులపుత్తం పసంసితుం;
మయూరగీవసఙ్కాస, ఇతో పరియాహి వాయస.
౧౩౫. మిగానం సిఙ్గాలో [కోత్థుకో (సీ. పీ.), కోట్ఠుకో (స్యా.)] అన్తో, పక్ఖీనం పన వాయసో;
ఏరణ్డో అన్తో రుక్ఖానం, తయో అన్తా సమాగతాతి.
అన్తజాతకం పఞ్చమం.
౨౯౬. సముద్దజాతకం (౩-౫-౬)
౧౩౬. కో నాయం [కో న్వాయం (స్యా.)] లోణతోయస్మిం, సమన్తా పరిధావతి;
మచ్ఛే మకరే చ వారేతి, ఊమీసు చ విహఞ్ఞతి.
౧౩౭. అనన్తపాయీ సకుణో, అతిత్తోతి దిసాసుతో;
సముద్దం పాతుమిచ్ఛామి, సాగరం సరితం పతిం.
౧౩౮. సో అయం హాయతి చేవ, పూరతే చ మహోదధి;
నాస్స నాయతి పీతన్తో, అపేయ్యో కిర సాగరోతి.
సముద్దజాతకం ఛట్ఠం.
౨౯౭. కామవిలాపజాతకం (౩-౫-౭)
౧౩౯. ఉచ్చే సకుణ డేమాన, పత్తయాన విహఙ్గమ;
వజ్జాసి ఖో త్వం వామూరుం, చిరం ఖో సా కరిస్సతి [సరిస్సతి (క.)].
౧౪౦. ఇదం ఖో సా న జానాతి, అసిం సత్తిఞ్చ ఓడ్డితం;
సా చణ్డీ కాహతి కోధం, తం మే తపతి నో ఇదం [నో ఇధ (సీ. స్యా. పీ.)].
౧౪౧. ఏస ఉప్పలసన్నాహో, నిక్ఖఞ్చుస్సీసకోహితం [నిక్ఖముస్సీసకే కతం (సీ. పీ.), నిక్ఖఞ్చుస్సీసకే కతం (స్యా.)];
కాసికఞ్చ ముదుం వత్థం, తప్పేతు ధనికా పియాతి [ధనకామియాతి (స్యా. పీ.), ధనకామికాతి (సీ.)].
కామవిలాపజాతకం సత్తమం.
౨౯౮. ఉదుమ్బరజాతకం (౩-౫-౮)
౧౪౨. ఉదుమ్బరా చిమే పక్కా, నిగ్రోధా చ కపిత్థనా;
ఏహి నిక్ఖమ భుఞ్జస్సు, కిం జిఘచ్ఛాయ మియ్యసి.
౧౪౩. ఏవం సో సుహితో హోతి, యో వుడ్ఢమపచాయతి;
యథాహమజ్జ సుహితో, దుమపక్కాని మాసితో.
౧౪౪. యం వనేజో వనేజస్స, వఞ్చేయ్య కపినో కపి;
దహరో కపి [దహరోపి తం న (సీ. పీ.), దహరోపి న (స్యా.)] సద్ధేయ్య, న హి జిణ్ణో జరాకపీతి.
ఉదుమ్బరజాతకం అట్ఠమం.
౨౯౯. కోమారపుత్తజాతకం (౩-౫-౯)
౧౪౫. పురే తువం సీలవతం సకాసే, ఓక్కన్తికం [ఓక్కన్దికం (సీ. స్యా. పీ.)] కీళసి అస్సమమ్హి;
కరోహరే [కరోహి రే (క.)] మక్కటియాని మక్కట, న తం మయం సీలవతం రమామ.
౧౪౬. సుతా హి మయ్హం పరమా విసుద్ధి, కోమారపుత్తస్స బహుస్సుతస్స;
మా దాని మం మఞ్ఞి తువం యథా పురే, ఝానానుయుత్తో విహరామి [ఝానానుయుత్తా విహరామ (సీ. పీ.)] ఆవుసో.
౧౪౭. సచేపి సేలస్మి వపేయ్య బీజం, దేవో చ వస్సే న హి తం విరూళ్హే [నేవ హి తం రుహేయ్య (సీ. పీ.), న హి తం విరూహే (?)];
సుతా హి తే సా పరమా విసుద్ధి, ఆరా తువం మక్కట ఝానభూమియాతి.
కోమారపుత్తజాతకం నవమం.
౩౦౦. వకజాతకం (౩-౫-౧౦)
౧౪౮. పరపాణరోధా [పరపాణఘాతే (స్యా.), పరపాణరోచం (క.)] జీవన్తో, మంసలోహితభోజనో;
వకో వతం సమాదాయ, ఉపపజ్జి ఉపోసథం.
౧౪౯. తస్స సక్కో వతఞ్ఞాయ, అజరూపేనుపాగమి;
వీతతపో అజ్ఝప్పత్తో, భఞ్జి లోహితపో తపం.
౧౫౦. ఏవమేవ ఇధేకచ్చే, సమాదానమ్హి దుబ్బలా;
లహుం కరోన్తి అత్తానం, వకోవ అజకారణాతి.
వకజాతకం దసమం.
కుమ్భవగ్గో పఞ్చమో.
తస్సుద్దానం –
వరకుమ్భ సుపత్తసిరివ్హయనో, సుచిసమ్మత బిన్దుసరో చుసభో;
సరితంపతి చణ్డి జరాకపినా, అథ మక్కటియా వకకేన దసాతి.
అథ వగ్గుద్దానం –
సఙ్కప్పో పదుమో చేవ, ఉదపానేన తతియం;
అబ్భన్తరం ఘటభేదం, తికనిపాతమ్హిలఙ్కతన్తి.
తికనిపాతం నిట్ఠితం.