౫౩౯. మహాజనకజాతకం (౨)

౧౨౩. ‘‘కోయం మజ్ఝే సముద్దస్మిం, అపస్సం తీరమాయుహే;

కం [కిం (స్యా. క.)] త్వం అత్థవసం ఞత్వా, ఏవం వాయమసే భుసం’’.

౧౨౪. ‘‘నిసమ్మ వత్తం లోకస్స, వాయామస్స చ దేవతే;

తస్మా మజ్ఝే సముద్దస్మిం, అపస్సం తీరమాయుహే’’.

౧౨౫. ‘‘గమ్భీరే అప్పమేయ్యస్మిం, తీరం యస్స న దిస్సతి;

మోఘో తే పురిసవాయామో, అప్పత్వావ మరిస్ససి’’.

౧౨౬. ‘‘అనణో ఞాతినం హోతి, దేవానం పితునఞ్చ [పితునో చ (సీ. పీ.)] సో;

కరం పురిసకిచ్చాని, న చ పచ్ఛానుతప్పతి’’.

౧౨౭. ‘‘అపారణేయ్యం యం కమ్మం, అఫలం కిలమథుద్దయం;

తత్థ కో వాయమేనత్థో, మచ్చు యస్సాభినిప్పతం’’ [యస్సాభినిప్ఫతం (స్యా.)].

౧౨౮. ‘‘అపారణేయ్యమచ్చన్తం, యో విదిత్వాన దేవతే;

న రక్ఖే అత్తనో పాణం, జఞ్ఞా సో యది హాపయే.

౧౨౯. ‘‘అధిప్పాయఫలం ఏకే, అస్మిం లోకస్మి దేవతే;

పయోజయన్తి కమ్మాని, తాని ఇజ్ఝన్తి వా న వా.

౧౩౦. ‘‘సన్దిట్ఠికం కమ్మఫలం, నను పస్ససి దేవతే;

సన్నా అఞ్ఞే తరామహం, తఞ్చ పస్సామి సన్తికే.

౧౩౧. ‘‘సో అహం వాయమిస్సామి, యథాసత్తి యథాబలం;

గచ్ఛం పారం సముద్దస్స, కస్సం [కాసం (సీ. పీ.)] పురిసకారియం’’.

౧౩౨. ‘‘యో త్వం ఏవం గతే ఓఘే, అప్పమేయ్యే మహణ్ణవే;

ధమ్మవాయామసమ్పన్నో, కమ్మునా నావసీదసి;

సో త్వం తత్థేవ గచ్ఛాహి, యత్థ తే నిరతో మనో’’.

౧౩౩. ‘‘ఆసీసేథేవ [ఆసింసేథేవ (సీ. స్యా. పీ.)] పురిసో, న నిబ్బిన్దేయ్య పణ్డితో;

పస్సామి వోహం అత్తానం, యథా ఇచ్ఛిం తథా అహు.

౧౩౪. ‘‘ఆసీసేథేవ పురిసో, న నిబ్బిన్దేయ్య పణ్డితో;

పస్సామి వోహం అత్తానం, ఉదకా థలముబ్భతం.

౧౩౫. ‘‘వాయమేథేవ పురిసో, న నిబ్బిన్దేయ్య పణ్డితో;

పస్సామి వోహం అత్తానం, యథా ఇచ్ఛిం తథా అహు.

౧౩౬. ‘‘వాయమేథేవ పురిసో, న నిబ్బిన్దేయ్య పణ్డితో;

పస్సామి వోహం అత్తానం, ఉదకా థలముబ్భతం.

౧౩౭. ‘‘దుక్ఖూపనీతోపి నరో సపఞ్ఞో, ఆసం న ఛిన్దేయ్య సుఖాగమాయ;

బహూ హి ఫస్సా అహితా హితా చ, అవితక్కితా మచ్చుముపబ్బజన్తి [మచ్చుముప్పజ్జన్తి (స్యా.)].

౧౩౮. ‘‘అచిన్తితమ్పి భవతి, చిన్తితమ్పి వినస్సతి;

న హి చిన్తామయా భోగా, ఇత్థియా పురిసస్స వా’’.

౧౩౯. ‘‘అపోరాణం [అపురాణం (సీ. పీ.)] వత భో రాజా, సబ్బభుమ్మో దిసమ్పతి;

నాజ్జ నచ్చే [న చ నచ్చే (క.)] నిసామేతి, న గీతే కురుతే మనో.

౧౪౦. ‘‘న మిగే [మగే (క.)] నపి ఉయ్యానే, నపి హంసే ఉదిక్ఖతి;

మూగోవ తుణ్హిమాసీనో, న అత్థమనుసాసతి’’.

౧౪౧. ‘‘సుఖకామా రహోసీలా, వధబన్ధా ఉపారతా [ఉపారుతా (స్యా. క.)];

కస్స [కేసం (సీ. పీ.)] ను అజ్జ ఆరామే, దహరా వుద్ధా చ అచ్ఛరే.

౧౪౨. ‘‘అతిక్కన్తవనథా ధీరా, నమో తేసం మహేసినం;

యే ఉస్సుకమ్హి లోకమ్హి, విహరన్తి మనుస్సుకా.

౧౪౩. ‘‘తే ఛేత్వా మచ్చునో జాలం, తతం [తన్తం (సీ. స్యా. పీ.), తం తం (క.)] మాయావినో దళం;

ఛిన్నాలయత్తా [సన్తాలయన్తా (స్యా. క.)] గచ్ఛన్తి, కో తేసం గతిమాపయే’’ [నేసం గతి పాపయే (క.)].

౧౪౪. ‘‘కదాహం మిథిలం [మిధిలం (క.)] ఫీతం, విభత్తం భాగసో మితం;

పహాయ పబ్బజిస్సామి, తం కుదాస్సు [కదాస్సు (సీ. పీ.), కదాసు (స్యా.)] భవిస్సతి.

౧౪౫. ‘‘కదాహం మిథిలం ఫీతం, విసాలం సబ్బతోపభం;