౬. నతందళ్హవగ్గో
౨౦౧. బన్ధనాగారజాతకం (౨-౬-౧)
౧౦౧. న తం దళ్హం బన్ధనమాహు ధీరా, యదాయసం దారుజపబ్బజఞ్చ [బబ్బజఞ్చ (సీ.)];
సారత్తరత్తా మణికుణ్డలేసు, పుత్తేసు దారేసు చ యా అపేక్ఖా.
౧౦౨. ఏతం దళ్హం బన్ధనమాహు ధీరా, ఓహారినం సిథిలం దుప్పముఞ్చం;
ఏతమ్పి ఛేత్వాన వజన్తి ధీరా, అనపేక్ఖినో కామసుఖం పహాయాతి.
బన్ధనాగారజాతకం పఠమం.
౨౦౨. కేళిసీలజాతకం (౨-౬-౨)
౧౦౩. హంసా కోఞ్చా మయూరా చ, హత్థయో [హత్థినో (సీ.), హత్థియో (స్యా. పీ.)] పసదా మిగా;
సబ్బే సీహస్స భాయన్తి, నత్థి కాయస్మి తుల్యతా.
౧౦౪. ఏవమేవ మనుస్సేసు, దహరో చేపి పఞ్ఞవా;
సో హి తత్థ మహా హోతి, నేవ బాలో సరీరవాతి.
కేళిసీలజాతకం దుతియం.
౨౦౩. ఖణ్డజాతకం (౨-౬-౩)
౧౦౫. విరూపక్ఖేహి మే మేత్తం, మేత్తం ఏరాపథేహి మే;
ఛబ్యాపుత్తేహి మే మేత్తం, మేత్తం కణ్హాగోతమకేహి చ.
అపాదకేహి మే మేత్తం, మేత్తం ద్విపాదకేహి మే;
చతుప్పదేహి మే మేత్తం, మేత్తం బహుప్పదేహి మే.
మా మం అపాదకో హింసి, మా మం హింసి ద్విపాదకో;
మా మం చతుప్పదో హింసి, మా మం హింసి బహుప్పదో.
సబ్బే సత్తా సబ్బే పాణా, సబ్బే భూతా చ కేవలా;
సబ్బే భద్రాని పస్సన్తు, మా కఞ్చి [కిఞ్చి (స్యా. క.)] పాపమాగమా.
౧౦౬. అప్పమాణో బుద్ధో, అప్పమాణో ధమ్మో;
అప్పమాణో సఙ్ఘో, పమాణవన్తాని సరీసపాని [సిరిసపాని (సీ. స్యా. పీ.)];
అహివిచ్ఛికసతపదీ, ఉణ్ణనాభి [ఉణ్ణానాభి (సీ. స్యా. పీ.)] సరబూమూసికా.
కతా మే రక్ఖా కతా మే పరిత్తా, పటిక్కమన్తు భూతాని;
సోహం నమో భగవతో, నమో సత్తన్నం సమ్మాసమ్బుద్ధానన్తి.
ఖణ్డజాతకం తతియం.
౨౦౪. వీరకజాతకం (౨-౬-౪)
౧౦౭. అపి వీరక పస్సేసి, సకుణం మఞ్జుభాణకం;
మయూరగీవసఙ్కాసం, పతిం మయ్హం సవిట్ఠకం.
౧౦౮. ఉదకథలచరస్స పక్ఖినో, నిచ్చం ఆమకమచ్ఛభోజినో;
తస్సానుకరం సవిట్ఠకో, సేవాలే పలిగుణ్ఠితో మతోతి.
వీరకజాతకం చతుత్థం.
౨౦౫. గఙ్గేయ్యజాతకం (౨-౬-౫)
౧౦౯. సోభతి మచ్ఛో గఙ్గేయ్యో, అథో సోభతి యామునో [సోభన్తి మచ్ఛా గఙ్గేయ్యా, అథో సోభన్తి యామునా (స్యా. పీ.)];
చతుప్పదోయం పురిసో, నిగ్రోధపరిమణ్డలో;
ఈసకాయత [ఈసమాయత (క.)] గీవో చ, సబ్బేవ అతిరోచతి.
౧౧౦. యం పుచ్ఛితో న తం అక్ఖాసి [అక్ఖా (సీ. స్యా. పీ.)], అఞ్ఞం అక్ఖాసి [అక్ఖాతి (స్యా. పీ.)] పుచ్ఛితో;
అత్తప్పసంసకో పోసో, నాయం అస్మాక రుచ్చతీతి.
గఙ్గేయ్యజాతకం పఞ్చమం.
౨౦౬. కురుఙ్గమిగజాతకం (౨-౬-౬)
౧౧౧. ఇఙ్ఘ వద్ధమయం [వద్ధమయం (సీ. స్యా. పీ.)] పాసం, ఛిన్ద దన్తేహి కచ్ఛప;
అహం తథా కరిస్సామి, యథా నేహితి లుద్దకో.
౧౧౨. కచ్ఛపో పావిసీ వారిం, కురుఙ్గో పావిసీ వనం;
సతపత్తో దుమగ్గమ్హా, దూరే పుత్తే అపానయీతి.
కురుఙ్గమిగజాతకం ఛట్ఠం.
౨౦౭. అస్సకజాతకం (౨-౬-౭)
౧౧౩. అయమస్సకరాజేన, దేసో విచరితో మయా;
అనుకామయ కామేన [అనుకామయవనుకామేన (సీ. పీ.)], పియేన పతినా సహ.
౧౧౪. నవేన సుఖదుక్ఖేన, పోరాణం అపిధీయతి [అపిథీయతి (సీ. పీ.), అపిథియ్యతి (స్యా.)];
తస్మా అస్సకరఞ్ఞావ, కీటో పియతరో మమాతి.
అస్సకజాతకం సత్తమం.
౨౦౮. సుసుమారజాతకం (౨-౬-౮)
౧౧౫. అలం మేతేహి అమ్బేహి, జమ్బూహి పనసేహి చ;
యాని పారం సముద్దస్స, వరం మయ్హం ఉదుమ్బరో.
౧౧౬. మహతీ వత తే బోన్ది, న చ పఞ్ఞా తదూపికా;
సుసుమార [సుంసుమార (సీ. స్యా. పీ.)] వఞ్చితో మేసి, గచ్ఛ దాని యథాసుఖన్తి.
సుసుమారజాతకం అట్ఠమం.
౨౦౯. కుక్కుటజాతకం (౨-౬-౯)
౧౧౭. దిట్ఠా మయా వనే రుక్ఖా, అస్సకణ్ణా విభీటకా [విభేదకా (స్యా. క.)];
న తాని ఏవం సక్కన్తి, యథా త్వం రుక్ఖ సక్కసి.
౧౧౮. పురాణకుక్కుటో [కక్కరో (సీ. స్యా. పీ.)] అయం, భేత్వా పఞ్జరమాగతో;
కుసలో వాళపాసానం, అపక్కమతి భాసతీతి.
కుక్కుట [కక్కర (సీ. స్యా. పీ.)] జాతకం నవమం.
౨౧౦. కన్దగలకజాతకం (౨-౬-౧౦)
౧౧౯. అమ్భో కో నామ యం రుక్ఖో, సిన్నపత్తో [సీనపత్తో (సీ. పీ.)] సకణ్టకో;
యత్థ ఏకప్పహారేన, ఉత్తమఙ్గం విభిజ్జితం [విసాటికం (సీ. స్యా. పీ.), విఘాటితం (సీ. నియ్య)].
౧౨౦. అచారి వతాయం వితుదం వనాని, కట్ఠఙ్గరుక్ఖేసు అసారకేసు;
అథాసదా ఖదిరం జాతసారం [జాతిసారం (క.)], యత్థబ్భిదా గరుళో ఉత్తమఙ్గన్తి.
కన్దగలక [కన్దలక (క.)] జాతకం దసమం.
నతందళ్హవగ్గో ఛట్ఠో.
తస్సుద్దానం –
దళ్హబన్ధన హంసవరో చ పున, విరూపక్ఖ సవిట్ఠక మచ్ఛవరో;
సకురుఙ్గ సఅస్సక అమ్బవరో, పున కుక్కుటకో గరుళేన దసాతి.