౫. రుహకవగ్గో

౧౯౧. రుహకజాతకం (౨-౫-౧)

౮౧. అపి [అమ్భో (స్యా. క. సీ.)] రుహక ఛిన్నాపి, జియా సన్ధీయతే పున;

సన్ధీయస్సు పురాణియా, మా కోధస్స వసం గమి.

౮౨. విజ్జమానేసు వాకేసు [విజ్జమానాసు మరువాసు (సీ.), విజ్జమానాసు మరూద్వాసు (పీ.)], విజ్జమానేసు కారిసు;

అఞ్ఞం జియం కరిస్సామి, అలఞ్ఞేవ పురాణియాతి.

రుహకజాతకం పఠమం.

౧౯౨. సిరికాళకణ్ణిజాతకం (౨-౫-౨)

౮౩. ఇత్థీ సియా రూపవతీ, సా చ సీలవతీ సియా;

పురిసో తం న ఇచ్ఛేయ్య, సద్దహాసి మహోసధ.

౮౪. సద్దహామి మహారాజ, పురిసో దుబ్భగో సియా;

సిరీ చ కాళకణ్ణీ చ, న సమేన్తి కుదాచనన్తి.

సిరికాళకణ్ణిజాతకం దుతియం.

౧౯౩. చూళపదుమజాతకం (౨-౫-౩)

౮౫. అయమేవ సా అహమపి [అహమ్పి (సీ. స్యా. పీ.), అహస్మి (క.)] సో అనఞ్ఞో, అయమేవ సో హత్థచ్ఛిన్నో అనఞ్ఞో;

యమాహ ‘‘కోమారపతీ మమ’’న్తి, వజ్ఝిత్థియో నత్థి ఇత్థీసు సచ్చం.

౮౬. ఇమఞ్చ జమ్మం ముసలేన హన్త్వా, లుద్దం ఛవం పరదారూపసేవిం;

ఇమిస్సా చ నం పాపపతిబ్బతాయ, జీవన్తియా ఛిన్దథ కణ్ణనాసన్తి.

చూళపదుమజాతకం తతియం.

౧౯౪. మణిచోరజాతకం (౨-౫-౪)

౮౭. న సన్తి దేవా పవసన్తి నూన, న హి నూన సన్తి ఇధ లోకపాలా;

సహసా కరోన్తానమసఞ్ఞతానం, న హి నూన సన్తీ పటిసేధితారో.

౮౮. అకాలే వస్సతీ తస్స, కాలే తస్స న వస్సతి;

సగ్గా చ చవతి ఠానా, నను సో తావతా హతోతి.

మణిచోరజాతకం చతుత్థం.

౧౯౫. పబ్బతూపత్థరజాతకం (౨-౫-౫)

౮౯. పబ్బతూపత్థరే [పబ్బతపత్థరే (సీ. స్యా. పీ.)] రమ్మే, జాతా పోక్ఖరణీ సివా;

తం సిఙ్గాలో అపాపాయి [అపాపాసి (సీ. స్యా. పీ.)], జానం సీహేన రక్ఖితం.

౯౦. పివన్తి చే [పివన్తి వే (సీ.), పివన్తివ (పీ.), పివన్తేవ (?)] మహారాజ, సాపదాని మహానదిం;

న తేన అనదీ హోతి, ఖమస్సు యది తే పియాతి.

పబ్బతూపత్థర [పబ్బతపత్థర (సీ. స్యా. పీ.)] జాతకం పఞ్చమం.

౧౯౬. వలాహకస్సజాతకం (౨-౫-౬)

౯౧. యే న కాహన్తి ఓవాదం, నరా బుద్ధేన దేసితం;

బ్యసనం తే గమిస్సన్తి, రక్ఖసీహివ వాణిజా.

౯౨. యే చ కాహన్తి ఓవాదం, నరా బుద్ధేన దేసితం;

సోత్థిం పారం గమిస్సన్తి, వలాహేనేవ [వాలాహేనేవ (సీ. పీ.)] వాణిజాతి.

వలాహకస్స [వాలాహస్స (సీ. పీ.)] జాతకం ఛట్ఠం.

౧౯౭. మిత్తామిత్తజాతకం (౨-౫-౭)

౯౩. న నం ఉమ్హయతే దిస్వా, న చ నం పటినన్దతి;

చక్ఖూని చస్స న దదాతి, పటిలోమఞ్చ వత్తతి.

౯౪. ఏతే భవన్తి ఆకారా, అమిత్తస్మిం పతిట్ఠితా;

యేహి అమిత్తం జానేయ్య, దిస్వా సుత్వా చ పణ్డితోతి.

మిత్తామిత్తజాతకం సత్తమం.

౧౯౮. రాధజాతకం (౨-౫-౮)

౯౫. పవాసా ఆగతో తాత, ఇదాని నచిరాగతో;

కచ్చిన్ను తాత తే మాతా, న అఞ్ఞముపసేవతి.

౯౬. న ఖో పనేతం సుభణం, గిరం సచ్చుపసంహితం;

సయేథ పోట్ఠపాదోవ, ముమ్మురే [ముమ్మురే (స్యా.), మం పురే (క.) ముమ్మురసద్దో థుసగ్గిమ్హి కుక్కుళే చ వత్తతీతి సక్కతాభిధానేసు] ఉపకూథితోతి [ఉపకూసితోతి (సీ. స్యా. పీ.), ఉపకూలితో (క.)].

రాధజాతకం అట్ఠమం.

౧౯౯. గహపతిజాతకం (౨-౫-౯)

౯౭. ఉభయం మే న ఖమతి, ఉభయం మే న రుచ్చతి;

యాచాయం కోట్ఠమోతిణ్ణా, నాద్దసం ఇతి భాసతి.

౯౮. తం తం గామపతి బ్రూమి, కదరే అప్పస్మి జీవితే;

ద్వే మాసే సఙ్గరం కత్వా [కారం కత్వాన (సీ. పీ.), సంకరం కత్వా (క.)], మంసం జరగ్గవం కిసం;

అప్పత్తకాలే చోదేసి, తమ్పి మయ్హం న రుచ్చతీతి.

గహపతిజాతకం నవమం.

౨౦౦. సాధుసీలజాతకం (౨-౫-౧౦)

౯౯. సరీరదబ్యం వుడ్ఢబ్యం [వద్ధబ్యం (సీ. పీ.)], సోజచ్చం సాధుసీలియం;

బ్రాహ్మణం తేవ పుచ్ఛామ, కన్ను తేసం వనిమ్హసే [వణిమ్హసే (సీ. పీ.)].

౧౦౦. అత్థో అత్థి సరీరస్మిం, వుడ్ఢబ్యస్స నమో కరే;

అత్థో అత్థి సుజాతస్మిం, సీలం అస్మాక రుచ్చతీతి.

సాధుసీలజాతకం దసమం.

రుహకవగ్గో పఞ్చమో.

తస్సుద్దానం –

అపిరుహక రూపవతీ ముసలో, పవసన్తి సపఞ్చమపోక్ఖరణీ;

అథ ముత్తిమవాణిజ ఉమ్హయతే, చిరఆగత కోట్ఠ సరీర దసాతి.