౪. అసదిసవగ్గో
౧౮౧. అసదిసజాతకం (౨-౪-౧)
౬౧. ధనుగ్గహో అసదిసో, రాజపుత్తో మహబ్బలో;
దూరేపాతీ అక్ఖణవేధీ, మహాకాయప్పదాలనో.
౬౨. సబ్బామిత్తే రణం కత్వా, న చ కఞ్చి విహేఠయి;
భాతరం సోత్థిం కత్వాన, సంయమం అజ్ఝుపాగమీతి.
అసదిసజాతకం పఠమం.
౧౮౨. సఙ్గామావచరజాతకం (౨-౪-౨)
౬౩. సఙ్గామావచరో సూరో, బలవా ఇతి విస్సుతో;
కిం ను తోరణమాసజ్జ, పటిక్కమసి కుఞ్జర.
౬౪. ఓమద్ద ఖిప్పం పలిఘం, ఏసికాని చ అబ్బహ [ఉబ్బహ (స్యా.), అబ్భుహ (క.)];
తోరణాని చ మద్దిత్వా, ఖిప్పం పవిస కుఞ్జరాతి.
సఙ్గామావచరజాతకం దుతియం.
౧౮౩. వాలోదకజాతకం (౨-౪-౩)
౬౫. వాలోదకం అప్పరసం నిహీనం, పిత్వా [పీత్వా (సీ. పీ.)] మదో జాయతి గద్రభానం;
ఇమఞ్చ పిత్వాన రసం పణీతం, మదో న సఞ్జాయతి సిన్ధవానం.
౬౬. అప్పం పివిత్వాన నిహీనజచ్చో, సో మజ్జతీ తేన జనిన్ద పుట్ఠో [ఫుట్ఠో (సీ. స్యా.), ముట్ఠో (క.)];
ధోరయ్హసీలీ చ కులమ్హి జాతో, న మజ్జతీ అగ్గరసం పివిత్వాతి.
వాలోదకజాతకం తతియం.
౧౮౪. గిరిదత్తజాతకం (౨-౪-౪)
౬౭. దూసితో గిరిదత్తేన [గిరిదన్తేన (పీ.)], హయో సామస్స పణ్డవో;
పోరాణం పకతిం హిత్వా, తస్సేవానువిధియ్యతి [నువిధీయతి (సీ. పీ.)].
౬౮. సచే చ తనుజో పోసో, సిఖరాకార [సిఙ్గారాకార (స్యా.)] కప్పితో;
ఆననే నం [తం (సీ. స్యా. పీ.)] గహేత్వాన, మణ్డలే పరివత్తయే;
ఖిప్పమేవ పహన్త్వాన, తస్సేవానువిధియ్యతీతి.
గిరిదత్తజాతకం చతుత్థం.
౧౮౫. అనభిరతిజాతకం (౨-౪-౫)
౬౯. యథోదకే ఆవిలే అప్పసన్నే, న పస్సతి సిప్పికసమ్బుకఞ్చ;
సక్ఖరం వాలుకం మచ్ఛగుమ్బం, ఏవం ఆవిలమ్హి [ఆవిలే హి (సీ.)] చిత్తే;
న పస్సతి అత్తదత్థం పరత్థం.
౭౦. యథోదకే అచ్ఛే విప్పసన్నే, సో పస్సతి సిప్పికసమ్బుకఞ్చ;
సక్ఖరం వాలుకం మచ్ఛగుమ్బం, ఏవం అనావిలమ్హి చిత్తే;
సో పస్సతి అత్తదత్థం పరత్థన్తి.
అనభిరతిజాతకం పఞ్చమం.
౧౮౬. దధివాహనజాతకం (౨-౪-౬)
౭౧. వణ్ణగన్ధరసూపేతో, అమ్బోయం అహువా పురే;
తమేవ పూజం లభమానో, కేనమ్బో కటుకప్ఫలో.
౭౨. పుచిమన్దపరివారో, అమ్బో తే దధివాహన;
మూలం మూలేన సంసట్ఠం, సాఖా సాఖా [సాఖం (స్యా. క.)] నిసేవరే [నివీసరే (క.)];
అసాతసన్నివాసేన, తేనమ్బో కటుకప్ఫలోతి.
దధివాహనజాతకం ఛట్ఠం.
౧౮౭. చతుమట్ఠజాతకం (౨-౪-౭)
౭౩. ఉచ్చే విటభిమారుయ్హ, మన్తయవ్హో రహోగతా;
నీచే ఓరుయ్హ మన్తవ్హో, మిగరాజాపి సోస్సతి.
౭౪. యం సువణ్ణో సువణ్ణేన [యం సుపణ్ణో సుపణ్ణేన (సీ. స్యా. పీ.)], దేవో దేవేన మన్తయే;
కిం తేత్థ చతుమట్ఠస్స, బిలం పవిస జమ్బుకాతి.
చతుమట్ఠజాతకం సత్తమం.
౧౮౮. సీహకోత్థుజాతకం (౨-౪-౮)
౭౫. సీహఙ్గులీ సీహనఖో, సీహపాదపతిట్ఠితో;
సో సీహో సీహసఙ్ఘమ్హి, ఏకో నదతి అఞ్ఞథా.
౭౬. మా త్వం నది రాజపుత్త, అప్పసద్దో వనే వస;
సరేన ఖో [మా (క.)] తం జానేయ్యుం, న హి తే పేత్తికో సరోతి.
సీహకోత్థుజాతకం అట్ఠమం.
౧౮౯. సీహచమ్మజాతకం (౨-౪-౯)
౭౭. నేతం సీహస్స నదితం, న బ్యగ్ఘస్స న [బ్యగ్ఘస్స న చ (క.)] దీపినో;
పారుతో సీహచమ్మేన, జమ్మో నదతి గద్రభో.
౭౮. చిరమ్పి ఖో తం ఖాదేయ్య, గద్రభో హరితం యవం;
పారుతో సీహచమ్మేన, రవమానోవ దూసయీతి.
సీహచమ్మజాతకం నవమం.
౧౯౦. సీలానిసంసజాతకం (౨-౪-౧౦)
౭౯. పస్స సద్ధాయ సీలస్స, చాగస్స చ అయం ఫలం;
నాగో నావాయ వణ్ణేన, సద్ధం వహతుపాసకం.
౮౦. సబ్భిరేవ సమాసేథ, సబ్భి కుబ్బేథ సన్థవం;
సతఞ్హి సన్నివాసేన, సోత్థిం గచ్ఛతి న్హాపితోతి.
సీలానిసంసజాతకం దసమం.
అసదిసవగ్గో చతుత్థో.
తస్సుద్దానం –
ధనుగ్గహ కుఞ్జర అప్పరసో, గిరిదత్తమనావిలచిత్తవరం;
దధివాహన జమ్బూక సీహనఖో, హరితయవ నాగవరేన దసాతి.