౩. కల్యాణవగ్గో
౧౭౧. కల్యాణధమ్మజాతకం (౨-౩-౧)
౪౧. కల్యాణధమ్మోతి యదా జనిన్ద, లోకే సమఞ్ఞం అనుపాపుణాతి;
తస్మా న హియ్యేథ [హీయేథ (సీ.)] నరో సపఞ్ఞో, హిరియాపి సన్తో ధురమాదియన్తి.
౪౨. సాయం సమఞ్ఞా ఇధ మజ్జ పత్తా, కల్యాణధమ్మోతి జనిన్ద లోకే;
తాహం సమేక్ఖం ఇధ పబ్బజిస్సం, న హి మత్థి ఛన్దో ఇధ కామభోగేతి.
కల్యాణధమ్మజాతకం పఠమం.
౧౭౨. దద్దరజాతకం (౨-౩-౨)
౪౩. కో ను సద్దేన మహతా, అభినాదేతి దద్దరం;
తం సీహా నప్పటినదన్తి [కిం సీహా నప్పటినదన్తి (సీ. పీ.), న సీహా పటినదన్తి (క.)], కో నామేసో మిగాధిభూ.
౪౪. అధమో మిగజాతానం, సిఙ్గాలో తాత వస్సతి;
జాతిమస్స జిగుచ్ఛన్తా, తుణ్హీ సీహా సమచ్ఛరేతి.
దద్దరజాతకం దుతియం.
౧౭౩. మక్కటజాతకం (౨-౩-౩)
౪౫. తాత మాణవకో ఏసో, తాలమూలం అపస్సితో;
అగారకఞ్చిదం అత్థి, హన్ద దేమస్సగారకం.
౪౬. మా ఖో త్వం తాత పక్కోసి, దూసేయ్య నో అగారకం;
నేతాదిసం ముఖం హోతి, బ్రాహ్మణస్స సుసీలినోతి.
మక్కటజాతకం తతియం.
౧౭౪. దుబ్భియమక్కటజాతకం (౨-౩-౪)
౪౭. అదమ్హ తే వారి పహూతరూపం, ఘమ్మాభితత్తస్స పిపాసితస్స;
సో దాని పిత్వాన [పీత్వాన (సీ. పీ.)] కిరిఙ్కరోసి [కికింకరోసి (సీ. స్యా. పీ.)], అసఙ్గమో పాపజనేన సేయ్యో.
౪౮. కో తే సుతో వా దిట్ఠో వా, సీలవా నామ మక్కటో;
ఇదాని ఖో తం ఓహచ్ఛం [ఊహచ్చ (సీ. పీ.), ఓహచ్చం (స్యా.), ఉహజ్జం (క.)], ఏసా అస్మాక ధమ్మతాతి.
దుబ్భియమక్కటజాతకం చతుత్థం.
౧౭౫. ఆదిచ్చుపట్ఠానజాతకం (౨-౩-౫)
౪౯. సబ్బేసు కిర భూతేసు, సన్తి సీలసమాహితా;
పస్స సాఖామిగం జమ్మం, ఆదిచ్చముపతిట్ఠతి.
౫౦. నాస్స సీలం విజానాథ, అనఞ్ఞాయ పసంసథ;
అగ్గిహుత్తఞ్చ ఉహన్నం [ఊహన్తం (సీ.), ఊహనం (స్యా.), ఊహన్తి (పీ.), ఉహదం (క.)], ద్వే చ భిన్నా కమణ్డలూతి.
ఆదిచ్చుపట్ఠానజాతకం పఞ్చమం.
౧౭౬. కళాయముట్ఠిజాతకం (౨-౩-౬)
౫౧. బాలో వతాయం దుమసాఖగోచరో, పఞ్ఞా జనిన్ద నయిమస్స విజ్జతి;
కళాయముట్ఠిం [కలాయముట్ఠిం (సీ. పీ.)] అవకిరియ కేవలం, ఏకం కళాయం పతితం గవేసతి.
౫౨. ఏవమేవ మయం రాజ, యే చఞ్ఞే అతిలోభినో;
అప్పేన బహుం జియ్యామ, కళాయేనేవ వానరోతి.
కళాయముట్ఠిజాతకం ఛట్ఠం.
౧౭౭. తిన్దుకజాతకం (౨-౩-౭)
౫౩. ధనుహత్థకలాపేహి, నేత్తిం సవరధారిభి;
సమన్తా పరికిణ్ణమ్హ, కథం మోక్ఖో భవిస్సతి.
౫౪. అప్పేవ బహుకిచ్చానం, అత్థో జాయేథ కోచి నం;
అత్థి రుక్ఖస్స అచ్ఛిన్నం, ఖజ్జథఞ్ఞేవ తిన్దుకన్తి.
తిన్దుకజాతకం సత్తమం.
౧౭౮. కచ్ఛపజాతకం (౨-౩-౮)
౫౫. జనిత్తం మే భవిత్తం మే, ఇతి పఙ్కే అవస్సయిం;
తం మం పఙ్కో అజ్ఝభవి, యథా దుబ్బలకం తథా;
తం తం వదామి భగ్గవ, సుణోహి వచనం మమ.
౫౬. గామే వా యది వా రఞ్ఞే, సుఖం యత్రాధిగచ్ఛతి;
తం జనిత్తం భవిత్తఞ్చ, పురిసస్స పజానతో;
యమ్హి జీవే తమ్హి గచ్ఛే, న నికేతహతో సియాతి.
కచ్ఛపజాతకం అట్ఠమం.
౧౭౯. సతధమ్మజాతకం (౨-౩-౯)
౫౭. తఞ్చ అప్పఞ్చ ఉచ్ఛిట్ఠం, తఞ్చ కిచ్ఛేన నో అదా;
సోహం బ్రాహ్మణజాతికో, యం భుత్తం తమ్పి ఉగ్గతం.
౫౮. ఏవం ధమ్మం నిరంకత్వా [నిరాకత్వా (?) ని + ఆ + కర + త్వా], యో అధమ్మేన జీవతి;
సతధమ్మోవ లాభేన, లద్ధేనపి న నన్దతీతి.
సతధమ్మజాతకం నవమం.
౧౮౦. దుద్దదజాతకం (౨-౩-౧౦)
౫౯. దుద్దదం దదమానానం, దుక్కరం కమ్మ కుబ్బతం;
అసన్తో నానుకుబ్బన్తి, సతం ధమ్మో దురన్నయో.
౬౦. తస్మా సతఞ్చ అసతం, నానా హోతి ఇతో గతి;
అసన్తో నిరయం యన్తి, సన్తో సగ్గపరాయణాతి [పరాయనా (స్యా. క.)].
దుద్దదజాతకం దసమం.
కల్యాణవగ్గో తతియో.
తస్సుద్దానం –
సుసమఞ్ఞమిగాధిభూ మాణవకో, వారిపహూతరూపాదిచ్చుపట్ఠానా;
సకళాయసతిన్దుకపఙ్క పున, సతధమ్మ సుదుద్దదకేన దసాతి.