౨. సన్థవవగ్గో
౧౬౧. ఇన్దసమానగోత్తజాతకం (౨-౨-౧)
౨౧. న సన్థవం [సన్ధవం (క.)] కాపురిసేన కయిరా, అరియో అనరియేన పజానమత్థం;
చిరానువుత్థోపి కరోతి పాపం, గజో యథా ఇన్దసమానగోత్తం.
౨౨. యం త్వేవ జఞ్ఞా సదిసో మమన్తి, సీలేన పఞ్ఞాయ సుతేన చాపి;
తేనేవ మేత్తిం కయిరాథ సద్ధిం, సుఖో హవే సప్పురిసేన సఙ్గమోతి.
ఇన్దసమానగోత్తజాతకం పఠమం.
౧౬౨. సన్థవజాతకం (౨-౨-౨)
౨౩. న సన్థవస్మా పరమత్థి పాపియో, యో సన్థవో [సన్ధవో (క.)] కాపురిసేన హోతి;
సన్తప్పితో సప్పినా పాయసేన [పాయాసేన (క.)], కిచ్ఛాకతం పణ్ణకుటిం అదయ్హి [అదడ్ఢహి (సీ. స్యా.), అదట్ఠహి (పీ.), అదద్దహి (?)].
౨౪. న సన్థవస్మా పరమత్థి సేయ్యో, యో సన్థవో సప్పురిసేన హోతి;
సీహస్స బ్యగ్ఘస్స చ దీపినో చ, సామా ముఖం లేహతి సన్థవేనాతి.
సన్థవజాతకం దుతియం.
౧౬౩. సుసీమజాతకం (౨-౨-౩)
౨౫. కాళా మిగా సేతదన్తా తవీమే [తవ ఇమే (సీ. స్యా. పీ.)], పరోసతం హేమజాలాభిఛన్నా [హేమజాలాభిసఞ్ఛన్నా (సీ.)];
తే తే దదామీతి సుసీమ బ్రూసి, అనుస్సరం పేత్తిపితామహానం.
౨౬. కాళా మిగా సేతదన్తా మమీమే [మమ ఇమే (సీ. పీ.)], పరోసతం హేమజాలాభిచ్ఛన్నా;
తే తే దదామీతి వదామి మాణవ, అనుస్సరం పేత్తిపితామహానన్తి.
సుసీమజాతకం తతియం.
౧౬౪. గిజ్ఝజాతకం (౨-౨-౪)
౨౭. యం ను గిజ్ఝో యోజనసతం, కుణపాని అవేక్ఖతి;
కస్మా జాలఞ్చ పాసఞ్చ, ఆసజ్జాపి న బుజ్ఝసి.
౨౮. యదా పరాభవో హోతి, పోసో జీవితసఙ్ఖయే;
అథ జాలఞ్చ పాసఞ్చ, ఆసజ్జాపి న బుజ్ఝతీతి.
గిజ్ఝజాతకం చతుత్థం.
౧౬౫. నకులజాతకం (౨-౨-౫)
౨౯. సన్ధిం కత్వా అమిత్తేన, అణ్డజేన జలాబుజ;
వివరియ దాఠం సేసి [సయసి (సీ. స్యా. పీ.)], కుతో తే భయమాగతం.
౩౦. సఙ్కేథేవ [సఙ్కతేవ (క.)] అమిత్తస్మిం, మిత్తస్మిమ్పి న విస్ససే;
అభయా భయముప్పన్నం, అపి మూలాని కన్తతీతి [మూలం నికన్తతీతి (సీ.)].
నకులజాతకం పఞ్చమం.
౧౬౬. ఉపసాళకజాతకం (౨-౨-౬)
౩౧. ఉపసాళకనామాని [ఉపసాళ్హకనామానం (సీ. స్యా. పీ.)], సహస్సాని చతుద్దస;
అస్మిం పదేసే దడ్ఢాని, నత్థి లోకే అనామతం.
౩౨. యమ్హి సచ్చఞ్చ ధమ్మో చ, అహింసా సంయమో దమో;
ఏతం అరియా సేవన్తి, ఏతం లోకే అనామతన్తి.
ఉపసాళకజాతకం ఛట్ఠం.
౧౬౭. సమిద్ధిజాతకం (౨-౨-౭)
౩౩. అభుత్వా భిక్ఖసి భిక్ఖు, న హి భుత్వాన భిక్ఖసి;
భుత్వాన భిక్ఖు భిక్ఖస్సు, మా తం కాలో ఉపచ్చగా.
౩౪. కాలం వోహం న జానామి, ఛన్నో కాలో న దిస్సతి;
తస్మా అభుత్వా భిక్ఖామి, మా మం కాలో ఉపచ్చగాతి.
సమిద్ధిజాతకం సత్తమం.
౧౬౮. సకుణగ్ఘిజాతకం (౨-౨-౮)
౩౫. సేనో బలసా పతమానో, లాపం గోచరఠాయినం;
సహసా అజ్ఝప్పత్తోవ, మరణం తేనుపాగమి.
౩౬. సోహం నయేన సమ్పన్నో, పేత్తికే గోచరే రతో;
అపేతసత్తు మోదామి, సమ్పస్సం అత్థమత్తనోతి.
సకుణగ్ఘిజాతకం అట్ఠమం.
౧౬౯. అరకజాతకం (౨-౨-౯)
౩౭. యో వే మేత్తేన చిత్తేన, సబ్బలోకానుకమ్పతి;
ఉద్ధం అధో చ తిరియం, అప్పమాణేన సబ్బసో.
౩౮. అప్పమాణం హితం చిత్తం, పరిపుణ్ణం సుభావితం;
యం పమాణకతం కమ్మం, న తం తత్రావసిస్సతీతి.
అరకజాతకం నవమం.
౧౭౦. కకణ్టకజాతకం (౨-౨-౧౦)
౩౯. నాయం పురే ఉణ్ణమతి [ఉన్నమతి (స్యా.)], తోరణగ్గే కకణ్టకో;
మహోసధ విజానాహి, కేన థద్ధో కకణ్టకో.
౪౦. అలద్ధపుబ్బం లద్ధాన, అడ్ఢమాసం కకణ్టకో;
అతిమఞ్ఞతి రాజానం, వేదేహం మిథిలగ్గహన్తి.
కకణ్టకజాతకం దసమం.
సన్థవవగ్గో దుతియో.
తస్సుద్దానం –
అథ ఇన్దసమాన సపణ్ణకుటి, సుసిముత్తమ గిజ్ఝ జలాబుజకో;
ఉపసాళక భిక్ఖు సలాపవరో, అథ మేత్తవరో దసపుణ్ణమతీతి.