౫౧౭. దకరక్ఖసజాతకం (౭)

౨౨౪. సచే వో వుయ్హమానానం, సత్తన్నం ఉదకణ్ణవే;

మనుస్సబలిమేసానో, నావం గణ్హేయ్య రక్ఖసో;

అనుపుబ్బం కథం దత్వా, ముఞ్చేసి దకరక్ఖసా [దకరక్ఖతో (పీ.)].

౨౨౫. మాతరం పఠమం దజ్జం, భరియం దత్వాన భాతరం;

తతో సహాయం దత్వాన, పఞ్చమం దజ్జం [దజ్జ (స్యా.)] బ్రాహ్మణం;

ఛట్ఠాహం దజ్జమత్తానం, నేవ దజ్జం మహోసధం.

౨౨౬. పోసేతా తే జనేత్తీ చ, దీఘరత్తానుకమ్పికా;

ఛబ్భీ తయి పదుస్సతి [పదుట్ఠస్మిం (సీ. స్యా.)], పణ్డితా అత్థదస్సినీ;

అఞ్ఞం ఉపనిసం కత్వా, వధా తం పరిమోచయి.

౨౨౭. తం తాదిసిం [తాదిసం (క.)] పాణదదిం, ఓరసం గబ్భధారినిం [గబ్భధారిణిం (సీ. స్యా.)];

మాతరం కేన దోసేన, దజ్జాసి దకరక్ఖినో [దకరక్ఖతో (పీ.)].

౨౨౮. దహరా వియలఙ్కారం, ధారేతి అపిళన్ధనం;

దోవారికే అనీకట్ఠే, అతివేలం పజగ్ఘతి [సఞ్జగ్ఘతి (క.)].

౨౨౯. అథోపి పటిరాజూనం, సయం దూతాని సాసతి;

మాతరం తేన దోసేన, దజ్జాహం దకరక్ఖినో.

౨౩౦. ఇత్థిగుమ్బస్స పవరా, అచ్చన్తం పియభాణినీ [అచ్చన్తపియవాదినీ (సీ. పీ.)];

అనుగ్గతా [అనుబ్బతా (స్యా.), అనుపుబ్బతా (క.)] సీలవతీ, ఛాయావ అనపాయినీ.

౨౩౧. అక్కోధనా పుఞ్ఞవతీ [పఞ్ఞవతీ (సీ. పీ.)], పణ్డితా అత్థదస్సినీ;

ఉబ్బరిం [ఉప్పరిం (సీ.)] కేన దోసేన, దజ్జాసి దకరక్ఖినో.

౨౩౨. ఖిడ్డారతిసమాపన్నం, అనత్థవసమాగతం;

సా మం సకాన పుత్తానం, అయాచం యాచతే ధనం.

౨౩౩. సోహం దదామి సారత్తో [సారతో (స్యా.)], బహుం ఉచ్చావచం ధనం;

సుదుచ్చజం చజిత్వాన, పచ్ఛా సోచామి దుమ్మనో;

ఉబ్బరిం తేన దోసేన, దజ్జాహం దకరక్ఖినో.

౨౩౪. యేనోచితా జనపదా [జానపదా (సీ. స్యా. పీ.)], ఆనీతా చ పటిగ్గహం;

ఆభతం పరరజ్జేభి, అభిట్ఠాయ బహుం ధనం.

౨౩౫. ధనుగ్గహానం పవరం, సూరం తిఖిణమన్తినం;

భాతరం కేన దోసేన, దజ్జాసి దకరక్ఖినో.

౨౩౬. యేనోచితా [మయోచితా (సీ.), మయాచితా (పీ.)] జనపదా, ఆనీతా చ పటిగ్గహం;

ఆభతం పరరజ్జేభి, అభిట్ఠాయ బహుం ధనం.

౨౩౭. ధనుగ్గహానం పవరో, సూరో తిఖిణమన్తి చ [తిఖిణమన్తినో (క.)];

మయాయం [మయా సో (సీ. పీ.)] సుఖితో రాజా, అతిమఞ్ఞతి దారకో.

౨౩౮. ఉపట్ఠానమ్పి మే అయ్యే, న సో ఏతి యథా పురే;

భాతరం తేన దోసేన, దజ్జాహం దకరక్ఖినో.

౨౩౯. ఏకరత్తేన ఉభయో, త్వఞ్చేవ ధనుసేఖ చ [ధనుసేఖవా (సీ. స్యా. పీ.)];

ఉభో జాతేత్థ పఞ్చాలా, సహాయా సుసమావయా.

౨౪౦. చరియా తం అనుబన్ధిత్థో [అనుబన్ధో (క.)], ఏకదుక్ఖసుఖో తవ;

ఉస్సుక్కో తే దివారత్తిం, సబ్బకిచ్చేసు బ్యావటో;

సహాయం కేన దోసేన, దజ్జాసి దకరక్ఖినో.

౨౪౧. చరియా మం అయం [చరియాయ అయం (సీ. పీ.)] అయ్యే, పజగ్ఘిత్థో [సఞ్జగ్ఘిత్థో (స్యా.)] మయా సహ;

అజ్జాపి తేన వణ్ణేన, అతివేలం పజగ్ఘతి.

౨౪౨. ఉబ్బరియాపిహం అయ్యే, మన్తయామి రహోగతో;

అనామన్తో [అనామన్తా (సీ.)] పవిసతి, పుబ్బే అప్పటివేదితో.

౨౪౩. లద్ధద్వారో [లద్ధవారో (సీ. పీ.)] కతోకాసో, అహిరికం అనాదరం;

సహాయం తేన దోసేన, దజ్జాహం దకరక్ఖినో.

౨౪౪. కుసలో సబ్బనిమిత్తానం, రుతఞ్ఞూ [రుదఞ్ఞూ (సీ. స్యా. పీ.)] ఆగతాగమో;

ఉప్పాతే సుపినే యుత్తో, నియ్యానే చ పవేసనే.

౨౪౫. పట్ఠో [పద్ధో (సీ. పీ.)] భూమన్తలిక్ఖస్మిం, నక్ఖత్తపదకోవిదో;

బ్రాహ్మణం కేన దోసేన, దజ్జాసి దకరక్ఖినో.

౨౪౬. పరిసాయమ్పి మే అయ్యే, ఉమ్మీలిత్వా ఉదిక్ఖతి;

తస్మా అచ్చభముం లుద్దం, దజ్జాహం దకరక్ఖినో.

౨౪౭. ససముద్దపరియాయం, మహిం సాగరకుణ్డలం;

వసున్ధరం ఆవససి, అమచ్చపరివారితో.

౨౪౮. చాతురన్తో మహారట్ఠో, విజితావీ మహబ్బలో;

పథబ్యా ఏకరాజాసి, యసో తే విపులం గతో.

౨౪౯. సోళసిత్థిసహస్సాని, ఆముత్తమణికుణ్డలా;

నానాజనపదా నారీ, దేవకఞ్ఞూపమా సుభా.

౨౫౦. ఏవం సబ్బఙ్గసమ్పన్నం, సబ్బకామసమిద్ధినం;

సుఖితానం పియం దీఘం, జీవితం ఆహు ఖత్తియ.

౨౫౧. అథ త్వం కేన వణ్ణేన, కేన వా పన హేతునా;

పణ్డితం అనురక్ఖన్తో, పాణం చజసి దుచ్చజం.

౨౫౨. యతోపి ఆగతో అయ్యే, మమ హత్థం మహోసధో;

నాభిజానామి ధీరస్స, అనుమత్తమ్పి దుక్కటం.

౨౫౩. సచే చ కిస్మిచి కాలే, మరణం మే పురే సియా;

సో మే పుత్తే [పుత్తే చ మే (సీ. స్యా. పీ.] పపుత్తే చ, సుఖాపేయ్య మహోసధో.

౨౫౪. అనాగతం పచ్చుప్పన్నం, సబ్బమత్థమ్పి పస్సతి [సబ్బమత్థం విపస్సతి (సీ. స్యా. పీ.)];

అనాపరాధకమ్మన్తం, న దజ్జం దకరక్ఖినో.

౨౫౫. ఇదం సుణాథ పఞ్చాలా, చూళనేయ్యస్స [చూళనీయస్స (సీ.)] భాసితం;

పణ్డితం అనురక్ఖన్తో, పాణం చజతి దుచ్చజం.

౨౫౬. మాతు భరియాయ భాతుచ్చ, సఖినో బ్రాహ్మణస్స చ;

అత్తనో చాపి పఞ్చాలో, ఛన్నం చజతి జీవితం.

౨౫౭. ఏవం మహత్థికా [ఖహిద్ధియా (స్యా.), మహిద్ధికా (క.)] పఞ్ఞా, నిపుణా సాధుచిన్తినీ;

దిట్ఠధమ్మహితత్థాయ, సమ్పరాయసుఖాయ చాతి.

దకరక్ఖసజాతకం సత్తమం.