౪౯౯. సివిజాతకం (౩)
౫౨. దూరే అపస్సం థేరోవ, చక్ఖుం యాచితుమాగతో;
ఏకనేత్తా భవిస్సామ, చక్ఖుం మే దేహి యాచితో.
౫౩. కేనానుసిట్ఠో ఇధ మాగతోసి, వనిబ్బక [వణిబ్బక (సీ.)] చక్ఖుపథాని యాచితుం;
సుదుచ్చజం యాచసి ఉత్తమఙ్గం, యమాహు నేత్తం పురిసేన దుచ్చజం.
౫౪. యమాహు దేవేసు సుజమ్పతీతి, మఘవాతి నం ఆహు మనుస్సలోకే;
తేనానుసిట్ఠో ఇధ మాగతోస్మి, వనిబ్బకో చక్ఖుపథాని యాచితుం.
౫౫. వనిబ్బతో [వనిబ్బకో (స్యా. పీ.)] మయ్హ వనిం [వనం (క.), వణిం (సీ. స్యా. పీ.)] అనుత్తరం, దదాహి తే చక్ఖుపథాని యాచితో;
దదాహి మే చక్ఖుపథం అనుత్తరం, యమాహు నేత్తం పురిసేన దుచ్చజం.
౫౬. యేన అత్థేన ఆగచ్ఛి [ఆగఞ్ఛి (సీ. పీ.)], యమత్థమభిపత్థయం;
తే తే ఇజ్ఝన్తు సఙ్కప్పా, లభ చక్ఖూని బ్రాహ్మణ.
౫౭. ఏకం తే యాచమానస్స, ఉభయాని దదామహం;
స చక్ఖుమా గచ్ఛ జనస్స పేక్ఖతో, యదిచ్ఛసే త్వం తదతే సమిజ్ఝతు.
౫౮. మా నో దేవ అదా చక్ఖుం, మా నో సబ్బే పరాకరి [పరక్కరి (స్యా. క. అట్ఠ.), పరిక్కరి (క.) పరి + ఆ + కరి = పరాకరి];
ధనం దేహి మహారాజ, ముత్తా వేళురియా బహూ.
౫౯. యుత్తే దేవ రథే దేహి, ఆజానీయే చలఙ్కతే;
నాగే దేహి మహారాజ, హేమకప్పనవాససే.
౬౦. యథా తం సివయో [సీవియో (స్యా.)] సబ్బే, సయోగ్గా సరథా సదా;
సమన్తా పరికిరేయ్యుం [పరికరేయ్యుం (స్యా. పీ.)], ఏవం దేహి రథేసభ.
౬౧. యో వే దస్సన్తి వత్వాన, అదానే కురుతే మనో;
భూమ్యం [భూమ్యా (సీ. పీ.)] సో పతితం పాసం, గీవాయం పటిముఞ్చతి.
౬౨. యో వే దస్సన్తి వత్వాన, అదానే కురుతే మనో;
పాపా పాపతరో హోతి, సమ్పత్తో యమసాధనం.
౬౩. యఞ్హి యాచే తఞ్హి దదే, యం న యాచే న తం దదే;
స్వాహం తమేవ దస్సామి, యం మం యాచతి బ్రాహ్మణో.
౬౪. ఆయుం ను వణ్ణం ను సుఖం బలం ను, కిం పత్థయానో ను జనిన్ద దేసి;
కథఞ్హి రాజా సివినం అనుత్తరో, చక్ఖూని దజ్జా పరలోకహేతు.
౬౫. న వాహమేతం యససా దదామి, న పుత్తమిచ్ఛే న ధనం న రట్ఠం;
సతఞ్చ ధమ్మో చరితో పురాణో, ఇచ్చేవ దానే రమతే మనో మమ [మమం (సీ. పీ.)].
౬౬. సఖా చ మిత్తో చ మమాసి సీవిక [సీవక (సీ. పీ.)], సుసిక్ఖితో సాధు కరోహి మే వచో;
ఉద్ధరిత్వా [ఉద్ధత్వ (సీ.), లద్ధ త్వం (పీ.)] చక్ఖూని మమం జిగీసతో, హత్థేసు ఠపేహి [ఆవేసి (సీ.)] వనిబ్బకస్స.
౬౭. చోదితో సివిరాజేన, సివికో వచనఙ్కరో;
రఞ్ఞో చక్ఖూనుద్ధరిత్వా [చక్ఖూని ఉద్ధత్వా (సీ. పీ.)], బ్రాహ్మణస్సూపనామయి;
సచక్ఖు బ్రాహ్మణో ఆసి, అన్ధో రాజా ఉపావిసి.
౬౮. తతో సో కతిపాహస్స, ఉపరూళ్హేసు చక్ఖుసు;
సూతం ఆమన్తయీ రాజా, సివీనం రట్ఠవడ్ఢనో.
౬౯. యోజేహి సారథి యానం, యుత్తఞ్చ పటివేదయ;
ఉయ్యానభూమిం గచ్ఛామ, పోక్ఖరఞ్ఞో వనాని చ.
౭౦. సో చ పోక్ఖరణీతీరే [పోక్ఖరణియా తీరే (సీ. పీ.)], పల్లఙ్కేన ఉపావిసి;
తస్స సక్కో పాతురహు, దేవరాజా సుజమ్పతి.
౭౧. సక్కోహమస్మి దేవిన్దో, ఆగతోస్మి తవన్తికే;
వరం వరస్సు రాజీసి, యం కిఞ్చి మనసిచ్ఛసి.
౭౨. పహూతం మే ధనం సక్క, బలం కోసో చనప్పకో;
అన్ధస్స మే సతో దాని, మరణఞ్ఞేవ రుచ్చతి.
౭౩. యాని సచ్చాని ద్విపదిన్ద, తాని భాసస్సు ఖత్తియ;
సచ్చం తే భణమానస్స, పున చక్ఖు భవిస్సతి.
౭౪. యే మం యాచితుమాయన్తి, నానాగోత్తా వనిబ్బకా;
యోపి మం యాచతే తత్థ, సోపి మే మనసో పియో;
ఏతేన సచ్చవజ్జేన, చక్ఖు మే ఉపపజ్జథ.
౭౫. యం మం సో యాచితుం ఆగా, దేహి చక్ఖున్తి బ్రాహ్మణో;
తస్స చక్ఖూని పాదాసిం, బ్రాహ్మణస్స వనిబ్బతో [వణిబ్బినో (సీ.), వనిబ్బినో (పీ.)].
౭౬. భియ్యో మం ఆవిసీ పీతి, సోమనస్సఞ్చనప్పకం;
ఏతేన సచ్చవజ్జేన, దుతియం మే ఉపపజ్జథ.
౭౭. ధమ్మేన భాసితా గాథా, సివీనం రట్ఠవడ్ఢన;
ఏతాని తవ నేత్తాని, దిబ్బాని పటిదిస్సరే.
౭౮. తిరోకుట్టం తిరోసేలం, సమతిగ్గయ్హ పబ్బతం;
సమన్తా యోజనసతం, దస్సనం అనుభోన్తు తే.
౭౯. కో నీధ విత్తం న దదేయ్య యాచితో, అపి విసిట్ఠం సుపియమ్పి అత్తనో;
తదిఙ్ఘ సబ్బే సివయో సమాగతా, దిబ్బాని నేత్తాని మమజ్జ పస్సథ.
౮౦. తిరోకుట్టం తిరోసేలం, సమతిగ్గయ్హ పబ్బతం;
సమన్తా యోజనసతం, దస్సనం అనుభోన్తి మే.
౮౧. న చాగమత్తా పరమత్థి కిఞ్చి, మచ్చానం ఇధ జీవితే;
దత్వాన మానుసం [దత్వా మానుసకం (సీ.)] చక్ఖుం, లద్ధం మే [మే ఇతి పదం నత్థి సీ. పోత్థకే] చక్ఖుం అమానుసం.
౮౨. ఏతమ్పి దిస్వా సివయో, దేథ దానాని భుఞ్జథ;
దత్వా చ భుత్వా చ యథానుభావం, అనిన్దితా సగ్గముపేథ ఠానన్తి.
సివిజాతకం తతియం.