౪౯౬. భిక్ఖాపరమ్పరజాతకం (౧౩)

౨౭౦. సుఖుమాలరూపం దిస్వా [దిస్వాన (క. సీ. అట్ఠ.)], రట్ఠా వివనమాగతం;

కూటాగారవరూపేతం, మహాసయనముపాసితం [ముపోచితం (బహూసు)].

౨౭౧. తస్స తే పేమకేనాహం, అదాసిం వడ్ఢమోదనం [బద్ధమోదనం (సీ. పీ.)];

సాలీనం విచితం భత్తం, సుచిం మంసూపసేచనం.

౨౭౨. తం త్వం భత్తం పటిగ్గయ్హ, బ్రాహ్మణస్స అదాసయి [అదాపయి (సీ. స్యా. పీ.)];

అత్తానం [అత్తనా (పీ. అట్ఠ. పాఠన్తరం)] అనసిత్వాన, కోయం ధమ్మో నమత్థు తే.

౨౭౩. ఆచరియో బ్రాహ్మణో మయ్హం, కిచ్చాకిచ్చేసు బ్యావటో [వావటో (క.)];

గరు చ ఆమన్తనీయో [ఆమన్తణీయో (సీ. పీ.)] చ, దాతుమరహామి భోజనం.

౨౭౪. బ్రాహ్మణం దాని పుచ్ఛామి, గోతమం రాజపూజితం;

రాజా తే భత్తం పాదాసి, సుచిం మంసూపసేచనం.

౨౭౫. తం త్వం భత్తం పటిగ్గయ్హ, ఇసిస్స భోజనం అదా;

అఖేత్తఞ్ఞూసి దానస్స, కోయం ధమ్మో నమత్థు తే.

౨౭౬. భరామి పుత్త [పుత్తే (సీ. పీ.)] దారే చ, ఘరేసు గధితో [గథితో (సీ. పీ.)] అహం;

భుఞ్జే మానుసకే కామే, అనుసాసామి రాజినో.

౨౭౭. ఆరఞ్ఞికస్స [ఆరఞ్ఞకస్స (సీ. పీ.)] ఇసినో, చిరరత్తం తపస్సినో;

వుడ్ఢస్స భావితత్తస్స, దాతుమరహామి భోజనం.

౨౭౮. ఇసిఞ్చ దాని పుచ్ఛామి, కిసం ధమనిసన్థతం;

పరూళ్హకచ్ఛనఖలోమం, పఙ్కదన్తం రజస్సిరం.

౨౭౯. ఏకో అరఞ్ఞే విహరసి [విహాసి (క.)], నావకఙ్ఖసి జీవితం;

భిక్ఖు కేన తయా సేయ్యో, యస్స త్వం భోజనం అదా.

౨౮౦. ఖణన్తాలుకలమ్బాని [ఖణమాలుకలమ్బాని (స్యా. క.)], బిలాలితక్కలాని చ [బిళాలితక్కళాని చ (సీ. పీ.)];

ధునం సామాకనీవారం, సఙ్ఘారియం పసారియం [సంహారియం పహారియం (స్యా.), సంసారియం పసారియం (క.)].

౨౮౧. సాకం భిసం మధుం మంసం, బదరామలకాని చ;

తాని ఆహరిత్వా [ఆహత్వ (సీ. స్యా.)] భుఞ్జామి, అత్థి మే సో పరిగ్గహో.

౨౮౨. పచన్తో అపచన్తస్స, అమమస్స సకిఞ్చనో [అకిఞ్చనో (క.)];

అనాదానస్స సాదానో, దాతుమరహామి భోజనం.

౨౮౩. భిక్ఖుఞ్చ దాని పుచ్ఛామి, తుణ్హీమాసీన సుబ్బతం;

ఇసి తే భత్తం పాదాసి, సుచిం మంసూపసేచనం.

౨౮౪. తం త్వం భత్తం పటిగ్గయ్హ, తుణ్హీ భుఞ్జసి ఏకకో;

నాఞ్ఞం కఞ్చి [కిఞ్చి (క.)] నిమన్తేసి, కోయం ధమ్మో నమత్థు తే.

౨౮౫. న పచామి న పాచేమి, న ఛిన్దామి న ఛేదయే;

తం మం అకిఞ్చనం ఞత్వా, సబ్బపాపేహి ఆరతం.

౨౮౬. వామేన భిక్ఖమాదాయ, దక్ఖిణేన కమణ్డలుం;

ఇసి మే భత్తం పాదాసి, సుచిం మంసూపసేచనం.

౨౮౭. ఏతే హి దాతుమరహన్తి, సమమా సపరిగ్గహా;

పచ్చనీకమహం మఞ్ఞే, యో దాతారం నిమన్తయే.

౨౮౮. అత్థాయ వత మే అజ్జ, ఇధాగచ్ఛి రథేసభో;

సోహం అజ్జ పజానామి [ఇతో పుబ్బే న జానామి (సీ. పీ.)], యత్థ దిన్నం మహప్ఫలం.

౨౮౯. రట్ఠేసు గిద్ధా రాజానో, కిచ్చాకిచ్చేసు బ్రాహ్మణా;

ఇసీ మూలఫలే గిద్ధా, విప్పముత్తా చ భిక్ఖవోతి.

భిక్ఖాపరమ్పరజాతకం తేరసమం.

తస్సుద్దానం –

సువ కిన్నర ముక్క ఖరాజినసో, భిసజాత మహేసి కపోతవరో;

అథ మోర సతచ్ఛక వాణిజకో, అథ రాజ సబ్రాహ్మణ భిక్ఖపరన్తి.

పకిణ్ణకనిపాతం నిట్ఠితం.