౪౯౨. తచ్ఛసూకరజాతకం (౯)

౧౬౦. యదేసమానా విచరిమ్హ, పబ్బతాని వనాని చ;

అన్వేసం విచరిం [విపులే (స్యా. క.)] ఞాతీ, తేమే అధిగతా మయా.

౧౬౧. బహుఞ్చిదం మూలఫలం, భక్ఖో చాయం అనప్పకో;

రమ్మా చిమా గిరీనజ్జో [గిరినదియో (సీ. పీ.)], ఫాసువాసో భవిస్సతి.

౧౬౨. ఇధేవాహం వసిస్సామి, సహ సబ్బేహి ఞాతిభి;

అప్పోస్సుక్కో నిరాసఙ్కీ, అసోకో అకుతోభయో.

౧౬౩. అఞ్ఞమ్పి [అఞ్ఞం హి (సీ. పీ.)] లేణం పరియేస, సత్తు నో ఇధ విజ్జతి;

సో తచ్ఛ సూకరే హన్తి, ఇధాగన్త్వా వరం వరం.

౧౬౪. కో నుమ్హాకం [కో నమ్హాకం (సీ. పీ.)] ఇధ సత్తు, కో ఞాతీ సుసమాగతే;

దుప్పధంసే [అప్పధంసే (సీ. పీ.)] పధంసేతి, తం మే అక్ఖాథ పుచ్ఛితా.

౧౬౫. ఉద్ధగ్గరాజీ మిగరాజా, బలీ దాఠావుధో మిగో;

సో తచ్ఛ సూకరే హన్తి, ఇధాగన్త్వా వరం వరం.

౧౬౬. న నో దాఠా న విజ్జన్తి [ను విజ్జన్తి (క.)], బలం కాయే సమోహితం;

సబ్బే సమగ్గా హుత్వాన, వసం కాహామ ఏకకం.

౧౬౭. హదయఙ్గమం కణ్ణసుఖం, వాచం భాససి తచ్ఛక;

యోపి యుద్ధే పలాయేయ్య, తమ్పి పచ్ఛా హనామసే.

౧౬౮. పాణాతిపాతా విరతో ను అజ్జ, అభయం ను తే సబ్బభూతేసు దిన్నం;

దాఠా ను తే మిగవధాయ [మిగ విరియం (సీ. స్యా. పీ.)] న సన్తి, యో సఙ్ఘపత్తో కపణోవ ఝాయసి.

౧౬౯. న మే దాఠా న విజ్జన్తి, బలం కాయే సమోహితం;

ఞాతీ చ దిస్వాన సామగ్గీ ఏకతో, తస్మా చ ఝాయామి వనమ్హి ఏకకో.

౧౭౦. ఇమస్సుదం యన్తి దిసోదిసం పురే, భయట్టితా లేణగవేసినో పుథు;

తే దాని సఙ్గమ్మ వసన్తి ఏకతో, యత్థట్ఠితా దుప్పసహజ్జ తే మయా.

౧౭౧. పరిణాయకసమ్పన్నా, సహితా ఏకవాదినో;

తే మం సమగ్గా హింసేయ్యుం, తస్మా నేసం న పత్థయే [అపత్థవే (పీ.)].

౧౭౨. ఏకోవ ఇన్దో అసురే జినాతి, ఏకోవ సేనో హన్తి దిజే పసయ్హ;

ఏకోవ బ్యగ్ఘో మిగసఙ్ఘపత్తో, వరం వరం హన్తి బలఞ్హి తాదిసం.

౧౭౩. న హేవ ఇన్దో న సేనో, నపి బ్యగ్ఘో మిగాధిపో;

సమగ్గే సహితే ఞాతీ, న బ్యగ్ఘే [బ్యగ్ఘే చ (సీ. పీ.), బ్యగ్ఘో న (స్యా.)] కురుతే వసే.

౧౭౪. కుమ్భీలకా సకుణకా, సఙ్ఘినో గణచారినో;

సమ్మోదమానా ఏకజ్ఝం, ఉప్పతన్తి డయన్తి చ.

౧౭౫. తేసఞ్చ డయమానానం, ఏకేత్థ అపసక్కతి [అపవత్తతి (సీ. పీ.)];

తఞ్చ సేనో నితాళేతి, వేయ్యగ్ఘియేవ సా గతి.

౧౭౬. ఉస్సాహితో జటిలేన, లుద్దేనామిసచక్ఖునా;

దాఠీ దాఠీసు పక్ఖన్ది, మఞ్ఞమానో యథా పురే.

౧౭౭. సాధు సమ్బహులా ఞాతీ, అపి రుక్ఖా అరఞ్ఞజా;

సూకరేహి సమగ్గేహి, బ్యగ్ఘో ఏకాయనే హతో.

౧౭౮. బ్రాహ్మణఞ్చేవ బ్యగ్ఘఞ్చ, ఉభో హన్త్వాన సూకరా.

ఆనన్దినో పముదితా, మహానాదం పనాదిసుం.

౧౭౯. తే సు ఉదుమ్బరమూలస్మిం, సూకరా సుసమాగతా;

తచ్ఛకం అభిసిఞ్చింసు, ‘‘త్వం నో రాజాసి ఇస్సరో’’తి.

తచ్ఛసూకరజాతకం నవమం.